Azərbaycanda toylara icazə verilib, amma ciddi şərtlərlə

Azərbaycanda koronavirus pandemiyasına görə kütləvi tədbirlərin keçirilməsinə qoyulan qadağadan on altı ay sonra toy və digər ailə şənliklərinin keçirilməsinə icazə verilib. Amma onları əvvəlki kimi keçirmək alınmayacaq, qonaqların sayına limit qoyulub və onların hamısının COVID-pasportu olmalıdır.

Azərbaycanın Nazirlər Kabineti 2021-ci il iyulun 1-dən toy və digər kütləvi tədbirlərin keçirilməsinə icazə verib, amma bəzi ciddi şərtlərlə.

• Toylar qadağandır: Azərbaycanda bu nə deməkdir
• “Qayınanam komandirlik edir, ona cavab qaytarmaq olmaz”. Gürcüstanın Marneuli şəhərindən altı qadının hekayəsi
• Hamıdan qaçan qəribə musiqiçi: salyanlı gitara ifaçısı Səxavətin ilk və son müsahibəsi

Karantin rejimində toy

Beləliklə, toyda (nişan mərasimində, ad günündə və sairə) qonaqların sayı 150 nəfəri aşmamalıdır. Bununla yanaşı mərasimin keçiriləcəyi mənakların sahibləri hər bir zalın sahəsinə uyğun olaraq iştirakçıların maksimum sayını müəyyən etməlidir.

Toyda iştirak edən 18 yaşdan yuxarı hər kəs COVID-pasporta sahib olmalıdır. Azərbaycanda bu elektron sertifikat koronavirusa qarşı peyvəndin hər ikidozasını vurduranlara və ya son altı ayda virusa yoluxub sağalanlara verilir.

Qonaqların tibbi maska və ya əlcək taxması mütləq deyil. Amma musiqiçilər istisna olmaqla bütün xidmət göstərən personal üçün bu, məcburidir. Üstəlik musiqiçilər və ofisiantlar da COVID-pasporta sahib olmalıdırlar.

Toy bürokratiyası

Təyin olunmuş toy tarixinə ən azı beş gün qalmış mərasim məkanının sahibi planlaşdırılan şənlik haqda bütün informasiyanı xüsusi dövlət portalına daxil etməlidir. Burada o, zalın tutumunu, mərasimin başlama və bitmə (gecə 12-dən gec olmayaraq) vaxtını, qonaqların sayını qeyd etməlidir.

Bundan başqa, mərasim zalının sahibi toy təşkilatçısı ilə birlikdə tədbirin keçirilməsi ilə bağlı birgə məsuliyyət haqda öhdəlik sənədi də imzalamalıdır.

Qeyd olunub ki, bu şərtlərin pozulması ilə toyların keçirilməsi qadağandır və inzibati məsuliyyət nəzərdə tutur. Müəyyən olunmuş qaydalara əməl olunmasına nəzarət funksiyası eyni zamanda üç dövlət qurumu – Daxili İşlər Nazirliyi, Qida Təhlükəsizliyi Dövlət Agentliyi və Vergilər Xidməti üzərinə qoyulub.

Qonaqların sayı 50 nəfərdən az olsa

Qonaqların sayı 50 nəfərə çatmırsa, tədbir iştirakçılarının COVID-pasporta sahib olmaları mütləq deyil. Amma hamısı tibbi maska taxmalıdır.

Bununla belə, Nazirlər Kabinetinin qərarında göstərilən bütün sənədlərin doldurulması bu cür azsaylı mərasimlər üçün də mütləqdir.

Avqustun 1-dən COVİD-pasport mütləq olacaq

2021-ci il iyulun 1-dən Azərbaycanda xidmət sahəsində çalışanların minimum 80 faizi koronavirusa qarşı vaksinin birinci dozasını almalıdır, ya da immunitet sertifikatına sahib olmalıdır.

İmmunitet sertifikatı son altı ay ərzində COVİD-19 virusuna yoluxub sağalanlara verilir. Sertifikatda göstərilən müddətdən sonra bu şəxslər vaksinasiyadan keçməlidir. Maraqlıdır ki, COVID-pasportlarınmüddəti yoxdur.

2021-ci il avqustun 1-dən xidmət sektorunda fəaliyyət göstərən müəssisələrin işçilərinin minimum 80 faizi COVID-pasport təqdim etməlidir.

Əhalinin ancaq 10 faizi tam vaksinasiyadan keçib

2021-ci il iyunun 21-ə olan rəsmi məlumata əsasən, Azərbaycanda əhalinin ancaq 10,4 faizi koronavirusa qarşı peyvəndin hər iki dozasını alıb. Vaksinin birinci dozasını vurduranlar ölkə vətəndaşlarının 19,5 faizini təşkil edir.

Hazırda Azərbaycanda koronavirusa qarşı dörd vaksindən istifadə olunur.

Kütləvi olaraq ölkənin bütün poliklinikalarında Çin istehsalı CoronaVac (Sinovac) peyvəndindən istifadə edilir.

60 yaşdan yuxarı şəxslərin eyni zamanda AstraZeneca peyvəndini vurdurmaq imkanı da var.

18 yaşdan yuxarı bütün arzu edənlər isə özəl klinikalara müraciət edərək Sputnik V və Pfizer  preparatlarını pulsuz vurdura bilər.

Şərhlər

Nazirlər Kabinetinin qərarı dərc olunandan dərhal sonra sosial şəbəkələrin Azərbaycan seqmentində toyların keçirilməsilə bağlı yeni qaydaların qızğın müzakirəsi başlayıb.

Bəzi xarakterik şərhlər:

“Tezliklə belə yazışmalar olacaq:

— Sizi oğlumun toyuna dəvət edirəm.

— Mənnuniyyətlə gələrdim, amma pasportum yoxdur”.

“Sadəcə nikah kəsdirmək, həyatı bi qədər mürəkkəbləşdirməkdən daha yaxşıdır”.

“Başqasının COVID-pasportunu götürüb getsəm necə? Lap elə hamını şəxsiyyət vəsiqəsilə yoxlayacaqlar?”

Türkiyənin futbol millisinin baş məşqçisi Şenol Günəşin  şəkli ilə mem də yaranıb. Fotoya belə yazı əlavə olunub: “Qonaqların sayını 150 nəfərə salmağa çalışırsan”.