Azərbaycanda müstəqil KİV-lər qeydiyyata alınmayıb
Müstəqil KİV-lər qeydiyyata alınmayıb
Azərbaycanda bir neçə müstəqil KİV dövlət qeydiyyatına alınmayıb. Bu haqda hüquqşünas Xalid Ağaliyev bildirib. Media orqanlarının dövlət qeydiyyatından keçməsi həm Azərbaycanda, həm də beynəlxalq təşkilatlar tərəfindən kəskin tənqid olunan “Media haqqında” yeni qanunun tələblərindən biridir. Qanunun medianın da qeydiyyatdan keçməzdən əvvəl müəyyən “iş təcrübəsi” olmasını tələb edən maddəsi digərləri ilə yanaşı Avropa Şurasının Venesiya Komissiyası tərəfindən rədd edilib.
- Ləpirsalan. Seks-terapevt Bakı məktəbində cinsi tərbiyə dərsi keçməyə başlayıb
- Azərbaycanda kuir media
- Radiasiya təhlükəsi üzündən Azərbaycanda apteklərdən yod yoxa çıxıb
2022-il oktyabrın 14-dən Medianın İnkişaf Agentliyi (MEDİA) Azərbaycan KİV-lərinin dövlət qeydiyyatı üçün müraciətləri qəbul edir. Amma hüquqşünas Xalid Ağaliyevin bildirdiyinə görə, qurum bununla bağlı bəzi media orqanlarına rədd cavabı verir.
Medianın İnkişaf Agentliyi Azərbaycan prezidentinin 2022-ci il 12 yanvar fərmanına əsasən medianın inkişafı sahəsində siyasətin yürüdülməsi məqsədilə yaradılıb. “Media haqqında” qanun 2021-ci il dekabrın 30-da parlament tərəfindən qəbul edilib və 2022-ci il fevralın 8-də prezident fərmanı ilə təsdiqlənib.
Ağaliyev konkret hansı media orqanlarının qeydiyyat müraciətlərinin rədd edildiyini açıqlamayıb, amma bir çox ekspertlərin fikrincə, söhbət müstəqil mediadan gedir.
Agentlik rədd cavabını “Media haqqında” qanunun KİV-lərin fəaliyyət müddəti ilə bağlı olan 74.1.2-ci maddəsilə əsaslandırıb. Bu maddə digərləri ilə yanaşı Avropa Şirasının Venesiya Komissiyası tərəfindən rədd edilib və bildirilib ki, AŞ üzvü ölkələrdə belə tələblər irəli sürülə bilməz – hüquqşünas vurğulayıb.
Bu maddəyə əsasən, qeydiyyat üçün müraciət edənə qədər müəyyən müddət fəaliyyət göstərmiş olmalıdır. Amma hansı müddətdn söhbət getdiyi aydın deyil.
“Belə tələb ifadə azadlığını məhdudlaşdırır və senzuradan başqa bir şey deyil”, – “Turan” informasiya agentliyi Ağaliyevdən sitat gətirib.
“Qeydiyyatı rədd edilmiş KİV-lər arasında MEDİA rəhbərləri hələ məktəbdə oxuduqları zamanlardan bəri fəaliyyət göstərənlər var. Bu jurnalistlər artıq tanınırlar və onlar haqda məhkəmə qərarları var. Müvafiq olaraq, dövlət o vaxt bu KİV-ləri və jurnalistləri tanıyırdı, amma Agentlik qeydiyyata almaqdan imtina edir”, – Ağaliyev əlavə edib.
Onun fikrincə, yaxın zamanda rədd edilmiş KİV-lərin iddiaları üzrə məhkəmə proseslərinin başlanmasını gözləmək lazımdır.
Maraqlıdır ki, Agentliyin saytında “statistika” bölməsində reyestrdə qeydiyyatdan keçmiş və rədd edilmiş KİV-lərin adları yoxdur.
Agentliyin özü bu qərarları heç cür şərh etmir.
