Azərbaycanda “müharibə əleyhdarı” fəalların həbsi
Müharibə əleyhdarı fəallar
Sentyabrın 19-dan Azərbaycanda Qarabağda hərbi əməliyyatlara qarşı çıxan dörd fəal və bir jurnalist müxtəlif ittihamlarla həbs edilib. Hüquq-mühafizə orqanlarının bütün bu şəxslərin konkret əməllərinə görə həbs edildiyi barədə açıqlamalarına baxmayaraq, onların özləri təqib olunmalarının əsl səbəbinin məhz sosial şəbəkələrdəki paylaşımları olduğunu bildirirlər.
- “Bu etnik təmizləmə deyil”. Bakıdakı ekspertlər antiterror əməliyyatının nəticələri haqda
- Qarabağda müharibə. Azərbaycan antiterror əməliyyatı keçirir. CANLI
- Azərbaycan Qarabağda antiterror əməliyyatına başladı
Jurnalist saxlanılma zamanı zorakılığa məruz qaldığını bildirib
Sentyabrın 21-də jurnalist Nurlan Qəhrəmanlı (Libre ) 30 sutka inzibati həbs cəzasına məhkum edilib. Məhkəmə iclasında jurnalist zorakılığa məruz qaldığını bildirib.
“Nurlan məhkəmədə bildirib ki, Sumqayıt polisi onu evindən çıxararaq Baş Prokurorluğun Korrupsiyaya Qarşı Mübarizə Baş İdarəsinə təhvil verib. Yolda Nurlanı təhqir edib, aşağılayıblar. Şöbədə 3 nəfər onu prokurorun gözü qarşısında döyüb, telefonunun şifrəsini öyrənməyə çalışıblar”, – deyə məhkəmədə iştirak edən fəallardan biri bildirib.
Onun sözlərinə görə, Nurlan Qəhrəmanlının qollarında və ayaqlarında qançırlar olub.
Jurnalist İnzibati Xətalar Məcəlləsinin 388-1.1.1-ci (İnternet informasiya ehtiyatında və ya informasiya-telekommunikasiya şəbəkəsində yayılması qadağan olunmuş məlumatların yayılması, habelə bu cür məlumatların yayılmasına mane olmama) maddəsi ilə ittiham olunub.
Nurlan Qəhrəmanlı günahsız olduğunu bəyan edib və qeyd edib ki, həbsi onun müharibə əleyhinə çıxışları ilə bağlıdır.
Bundan bir neçə gün əvvəl, sentyabrın 13-də jurnalist Dövlət Təhlükəsizliyi Xidmətinə çağırılmışdı. O, sosial şəbəkələrdəki paylaşımlarına görə orada zorlama ilə hədələndiyini bildirmişdi.
Dövlət Təhlükəsizlik Xidməti jurnalistin açıqlamasına cavab verməyib.
Keçmiş diplomat da qadağan olunmuş məlumatları yaymaqda ittiham olunub
Bir gün əvvəl ictimai fəal Emin İbrahimov da eyni ittihamla 30 sutka inzibati həbs cəzası alıb.
O, keçmiş diplomatdır, Azərbaycanın ABŞ-dakı səfirliyində, ölkənin Uruqvaydakı diplomatik nümayəndəliyində və s. çalışıb.
İbrahimovun vəkili Aqil Layıç bildirib ki, müdafiə etdiyi şəxs görüş zamanı ona həbsinin əsl səbəbinin sosial şəbəkələrdəki tənqidləri olduğunu deyib.
“Onlar onun qapısını döyərək özlərini “Azərsu”nun işçisi kimi təqdim ediblər. O, qapını açan kimi mülki geyimli bir neçə şəxs mənzilə soxularaq onu zor tətdiq eedərək saxlayıblar. Bundan əlavə, məhkəmə qərarı olmadan evdə axtarış aparıb, çoxlu əşyaları götürüblər. Bunlara telefonlar, kompüterlər və sair daxildir.
Emin İbrahimov Baş Prokurorluğun Cinayət Tədqiqatlarından Kənar İşlər üzrə İstintaq İdarəsinə aparılıb”, – vəkil bildirib.
İbrahimov vəkilinə həmçinin bildirib ki, onu bu idarəyə ayaqqabısız və corabsız gətiriblər. Prokurorluqda onu sosial şəbəkələrdəki paylaşımlarına görə “terrorçuluğu dəstəkləməkdə” ittiham ediblər.
Məhkəmənin 30 sutkalıq inzibati həbs qərarında Samsung və iPhone telefonlarının, HP kompüterinin və DVR-nin geri qaytarılması məsələsi də öz əksini tapıb. Məsələnin icrası prokurorluğa həvalə edilib. Bu, həmin əşyaların evdən oğurlandığını sübut edir. Bu əşyaların hansı hüquqi əsaslarla götürüldüyü məhkəmə qərarından bəlli deyil.
“Onun sosial şəbəkələrdəki hesablarında paylaşdığı postlarda terrora dəstəkdən söhbət getmir. Emin İbrahimovun fikrinə görə həbs olunduğunun möhürünü artıq məhkəmə qərarının özündə də görmək mümkündür”, – Aqil Layıc bildirib.
Emin İbrahimov Qarabağdakı əməliyyatların Rusiyanın maraqları çərçivəsində həyata keçirildiyini hesab edib və bu barədə Facebook sosial şəbəkəsindəki son paylaşımlarında yazıb.
İkinci Qarabağ müharibəsinin iştirakçısı da hərbi əməliyyatların əleyhinədir
Sentyabrın 20-də digər fəal Nemət Abbasova barəsində inzibati həbs cəzası verilib. Fəalın İnzibati Xətalar Məcəlləsinin 535.1-ci (Polis və ya hərbi qulluqçunun qanuni tələbinə qəsdən tabe olmama) maddəsi ilə saxlanıldığı bildirilir. Nemət Abbasovun yaxınları onun əslində müharibə əleyhinə çıxışlarına görə həbs edildiyini bildirirlər:
“Nemət özü 2020-ci ildə müharibə iştirakçısı olsa da, hazırda müharibənin əleyhinədir və buna görə cəzalandırılır”.
İctimai fəal Əmrax Təhməzov da 30 sutka inzibati həbs cəzası alanlardandır. Təhməzov həbsindən bir gün əvvəl Dövlət Təhlükəsizliyi Xidmətinə çağırıldığını bildirib. Onun sözlərinə görə, çağırışına səbəb sosial şəbəkələrdə müharibə əleyhinə yazıları olub.
Təhməzov İnzibati Xətalar Məcəlləsinin 388-1.1.1-ci (İnternet informasiya ehtiyatında və ya informasiya-telekommunikasiya şəbəkəsində qadağan olunmuş məlumatların yerləşdirilməsi, habelə bu cür məlumatların yerləşdirilməsinə mane olmama) maddəsi ilə ittiham olunub.
“Özünü yaraladı və bıçağı üstümə atdı”
Sentyabrın 19-da “İşçi Masası” Həmkarlar İttifaqları Konfederasiyasının sədri Afiəddin Məmmədov saxlanılıb. O, bıçaqla xəsarət yetirməkdə ittiham olunur. Yaralının kimliyi ictimaiyyətə açıqlanmayıb.
“Afiəddin Məmmədov dostunun toyuna getmək üçün evdən çıxanda həyətdə bir vaxtlar onu həbs etmiş mülki polis əməkdaşlarını görüb və öz-özünə fikirləşib ki, niyə burdadırlar, bəlkə yenə onu tutmağa gəliblər. Dönüb getmək istəyəndə ani zərbədən yerə yıxılıb. Burnundan vurulub və bütün köynəyi qan içində qalıb. Zərbədən özünə gəlib ayağa qalxanda artıq qollarının qandallı olduğunu görüb. Əllərini qandallayandan sonra polis asanlıqla bıçağı onun əlinə sıxışdırıb və barmaq izlərini alıblar”, – deyə məhkəmə iclasında iştirak edən fəal Gülnarə Mehdiyeva yazıb.
Afiəddin Məmmədovun sözlərinə görə, o, heç kimə xəsarət yetirməyib, qəfil qarşısına çıxan heç tanımadığı şəxs özünə xəsarət yetirib və bıçağı onun üstünə atıb.
Məhkəmənin qərarı ilə fəal haqda istintaq müddətinə 4 aylıq həbs-qətimkan tədbiri seçilib.
Afiyəddin Məmmədov dəfələrlə inzibati həbsə məruz qalıb. O, sonuncu dəfə avqustun 1-də həbs edilib, avqustun 31-də azadlığa çıxmışdı.
Bütün bu həbslərdən əlavə, Daxili İşlər Nazirliyinin rəsmi məlumatlarına görə, son günlərdə həyata keçirilən hərbi əməliyyatlar barədə “yanlış məlumat yaydığına görə” 10-dan çox şəxs polis bölmələrinə dəvət edilib. “Onlarla profilaktik söhbətlər aparılıb”, – DİN-in məlumatında deyilir.
