Bundan sonra Azərbaycanda vaksinasiyadan keçməyənlər qapalı məkanlara mənfi PCR-test sertifikatı təqdim etməklə gedə biləcəklər. Bu cür sertifikatlar cəmi 72 saat qüvvədə olacaq. Buna baxmayaraq, yerli sakinlər bu cür imkana sevinirlər.
Noyabrın 29-da Azərbaycanın baş naziri Əli Əsədov koronavirusla mübarizə üzrə Operativ Qərargahın geniş tərkibli iclasını çağırıb. Pandemiya ilə bağlı cari vəziyyət – yoluxma miqyası, xəstələrin müalicəsi, vaksinasiya sürəti, yeni ştam və sairə müzakirə olunub.
Nazirlər Kabineti hazırda Azərbaycanda qüvvədə olan COVID sertifikatılarının müddəti ilə bağlı qərar qəbul edib:
Tam vaksinasiyanı təsdiqləyən COVID-pasportlar – müddətsiz;
Şəxsin xəstələnib, sağaldığını və immunitetinin yarandığını təsdiqləyən sertifikat – 6 ay;
Vaksinasiyaya əks-göstərişi təsdiqləyən sertifikat – Azərbaycan Səhiyyə Nazirliyinin rəyi əsasında müəyyən edilmiş müddət;
Mənfi PCR-testini təsdiqləyən arayış – 72 saat;
Əcnəbilərin xaricdə aldığı COVID-sertifikatların müddəti beynəlxalq təcrübədə nəzərdə tutulmuş razılaşmalarla müəyyən edilir.
Nazirlər Kabinetinin qərarındakı yeniliklər
Azərbaycan vətəndaşlarının COVID-pasport və ya tibbi əks-göstəriş olmadan qapalı məkanlara buraxılması yenilik olub.
“Mənim üçün bu, xoş xəbərdir. Mən süd verirəm və vaksinlərə ehtiyatla yanaşıram. Buna görə də vaksinasiyaya əks-göstəriş olduuğu haqda arayış almışam. Amma bu arayışın müddəti çox deyil. Bunu mənə üç aylıq veriblər. Növbəti belə arayış almaq üçün təxminən altı ay gözləməliyəm.
Amma mənfi PCR-testlə uşaqla ticarət və əyləncə mərkəzlərinə gedə biləcəyəmsə, bu çox yaxşıdır. Ən azı bütün ayı evdə oturub tibbi əks-göstəriş haqda növbəti arayışı gözləməli olmayacağam”, – Türkan Hüseynzadə JAMnews-a deyib.
Azərbaycanda vaksinasiya
Noyabrın 29-a olan rəsmi məlumata əsasən, Azərbaycanda əhalinin 50,7 faizi koronavirusa qarşı peyvəndin ilk dozasını alıb. Hər iki dozanı vurduranlar əhalinin 45,6 faizini təşkil edir.
Azərbaycanın bütün əhalisinin 8,5 faizi peyvəndin üçüncü – “buster” dozasını vurdurub.
