Azərbaycanda koronavirusa qarşı vaksinasiyanın üçüncü mərhələsi başlayır

Fevralın 17-dən Azərbaycanda koronavirusa qarşı vaksinasiyanın üçüncü mərhələsi başlayacaq. Bu mərhələdə yaşı 50-ni keçmiş şəxslərə peyvənd vurulacaq. Bunun üçün xüsusi saytda qeydiyyatdan keçərək növbə götürmək lazımdır.

• Tbilisidə məktəblər və açıq məkanlı restoranlar açılıb
• Sorğu: Bakı sakinləri koronavirus vaksininə etibar edirlərmi? – Video
• Boğucu maskalar – pandemiyanın görünməyən effektləri barədə

Ölkənin Səhiyyə Nazirliyinin, İcbari Tibbi Sığorta üzrə Dövlət Agentliyi və Tibbi Ərazi Bölmələrini İdarəetmə Birliyinin birgə yaydığı məlumatda qeyd olunur ki, yaşı 50 və daha yuxarı olan şəxslər randevu.its.gov.az saytına daxil olaraq, şəxsiyyət vəsiqələrinin məlumatlarını daaxil etməlidirlər.

Bundan sonra onlar təqdim olunan siyahıdan peyvənd məntəqəsini, randevu tarixini və saatını seçib, mobil nömrəsini daxil etməlidirlər.

Peyvəndin birinci dozası vurulduqdan 28 gün sonra ikinci dozanın vurulması üçün təkrar qeydiyyatdan keçməyə ehtiyac yoxdur. Çünki ilkin müraciət zamanı artıq ikinci doza üçün də eyni saat aralığına və məkana avtomatik elektron növbə verilir.

Azərbaycanda yanvarın 18-dən etibarən COVID-19 əleyhinə vaksinasiya prosesinə başlanılıb. Fevralın 8-dən isə 65 yaşdan yuxarı şəxslərin və bəzi dövlət qurumlarında çalışanların peyvəndlənməsi aparılır.

Peyvəndləmə könüllüdür və dövlət hesabına həyata keçirilir.