Ələsgər Məmmədli və Ruslan İzzətlinin yaxınları onların səhhətlərindən narahatdırlar
Azərbaycanda həbslər – “ToplumTV işi”
Azərbaycanda “Toplum TV işi” üzrə həbs edilən Ələsgər Məmmədli və Ruslan İzzətlinin yaxınları onların səhhətlərindən narahatdırlar. Yaxınları bildirirlər ki, həbsxanada onların tibbi yardım almaq hüququna məhəl qoyulmur, həyatları riskə atılır. Bu arada BMT-nin İşgəncələrə Qarşı Komitəsi ölkədə hüquq müdafiəçiləri və jurnalistlərin fiziki və məhkəmə təzyiqinə, bəzi hallarda isə işgəncə və pis rəftara məruz qalması ilə bağlı iddialardan narahatlığını bildirib.
- Gürcüstanda xarici agentlər haqqında qanuna etiraz edən fəallar evlərinin qarşısında döyülür
- “Azərbaycandan çıxış qadağandır” – onlarla fəal və jurnalistə qarşı səfər məhdudiyyəti
- ABŞ-ın Bakıdakı səfiri ilə görüş kömək etmədi – məhkəmə jurnalistləri həbsdə saxladı
“Ələsgər Məmmədlinin vəziyyəti pisləşib”
Tanınmış media hüququ eksperti, “Toplum TV” müstəqil onlayn televiziyasının təsisçisi, həbsdə olan Ələsgər Məmmədlinin səhhəti pisləşib. Bu barədə onun qardaşı Nəsimi Məmmədli məlumat verib. Onun sözlərinə görə, qardaşının müalicəsi dayanıb.
“Həkimin Ələsgərə yazdığı müalicə kursu bitib, yenisi isə başlamayıb. 10 gün əvvəl qardaşımın analizlərini alıblar, amma hələlik nəticələrini özünə deməyiblər deyə, yeni müalicə kursunu başlaya bilmir. Analiz götürüləndə biopsiya müayinəsindən də keçiriləcəyi bildirilib. Hətta bu analizi harada vermək istədiyini da soruşublar, amma hələlik heç bir nəticə yoxdur”, – Nəsimi Məmmədli bildirib.
“Bu gün Ələsgər bəylə telefon danışığımız oldu. Səsində hiss ediləcək dərəcədə ciddi dəyişiklik var. Səbəbi məlum olduğu kimi qalxanabənzər vəzidəki şişlə bağlıdır. Ölçülərdə böyümələr var və bu da səs tellərinə təsir edir. Üç həftədir ki, edilən müayinələrdən cavab yoxdur”, – Ələsgər Məmmədlinin həyat yoldaşı Günay Məmmədli sosial şəbəkədə yazıb.
Ələsgər Məmmədlinin xərçəng olması ilə bağlı şübhələr var.
Aprelin 26-da Ələsgər Məmmədli Daxili İşlər Nazirliyinin xəstəxanasında müayinə olunub və qan analizləri götürülüb. Daha sonra o, istintaq təcridxanasına qaytarılıb. Müayinənin nəticələri barədə nə Məmmədliyə, nə də vəkilinə məlumat verilməyib.
O, 2024-cü il martın əvvəlində qalxanabənzər vəzisindəki şişin xarakterini müəyyən etmək üçün biopsiya müayinəsinə getdiyi klinikanın qarşısında saxlanılıb.
Martın 8-də media hüququ eksperti Cinayət Məcəlləsinin 206.3.2-ci (qabaqcadan əlbir olaraq qaçaqmalçılıq) maddəsi ilə ittiham olunaraq 4 ay müddətinə həbs edilib. O vaxtdan bəri Pentensiar Xidmətə çoxsaylı müraciətlərə baxmayaraq, biopsiya hələ də aparılmayıb.
“Ruslan İzzətlinin öd kisəsindəki daşlar həyati təhlükə yaradır”
Eyni “Toplum TV işi” üzrə həbs edilən Ruslan İzzətlinin həyat yoldaşı Günay Manaflı da ərinin səhhətindən narahat olduğunu bildirib.
“Ruslan İzzətlidən təcridxanada götürülən qan analizlərinin cavabı nəhayət ki, çıxıb. Analiz nəticələrinə görə şəkəri, xolesterini artıb. Digər problemlər də var. Əvvəllər də şəkəri olub, müalicə almışdı. Görünür, xəstəlik yenidən baş qaldırıb. Təkrar analiz və müalicəyə ehtiyac var. Analizi göstərdiyim həkim nəticəyə əsasən bildirdi ki, müalicə olunmazsa, gələcəkdə damar tıxanıqlığına, infarkta səbəb ola bilər. Həmçinin qarın boşluğunun USM müayinəsinə, ürəyinin də yoxlanılmasına ehtiyac olduğunu dedi.
Qeyd edim ki, ödündəki daşlar da həyati təhlükə yaradır. Daşın olduğunu müayinə nəticəsində özləri də təsdiqləyiblər.
Xəstə insanları girovluqda saxlamaqla onların səhhətlərində əlavə problemlərə yol açırsınız! Dərhal azad edilməsini tələb edirəm!”, – o sosial şəbəkədə yazıb.
Martın 6-da Toplum TV-nin, Demokratik Təşəbbüslər İnstitutunun və III Respublika Platformasının 7 təmsilçisi saxlanılıb. Onlardan 5-i həbs edilib, daha ikisi polis nəzarəti altında sərbəst buraxılıb. İki gün sonra eyni iş üzrə Ələsgər Məmmədli və Ruslan İzzətli də saxlanılıblar.
Onların hər biri Azərbaycan Cinayət Məcəlləsinin 206.3.2-ci (qaçaqmalçılıq, qabaqcadan əlbir olan qrup tərəfindən törədildikdə) ilə ittiham olunur. Bu ittihamla onları beş ildən səkkiz ilədək müddətə azadlıqdan məhrum etmə cəzası gözləyir.
BMT-nin İşgəncələrə Qarşı Komitəsi Azərbaycandakı vəziyyətdən narahatdır
BMT-nin İşgəncələrə Qarşı Komitəsi sonuncu sessiyasında altı iştirakçı dövlətin fəaliyyətini nəzərdən keçirdikdən sonra Avstriya, Azərbaycan, Finlandiya, Honduras, Lixtenşteyn və Şimali Makedoniya ilə bağlı nəticələri dərc edib.
BMT-nin İşgəncələrə Qarşı Komitəsinin məlumatında deyilir ki, nəticələr komitənin adı sadalanan hər bir ölkədə işgəncə və digər qəddar, qeyri-insani və ya ləyaqəti alçaldan rəftar və ya cəzaya qarşı Konvensiyanın icrası ilə bağlı əsas narahatlıqlarını və tövsiyələrini ehtiva edir.
Məlumatın Azərbaycana aid hissəsində ölkədə hüquq müdafiəçilərinin və jurnalistlərin hələ də fiziki və məhkəmə təzyiqlərinə, bəzi hallarda işgəncə və pis rəftara məruz qalması ilə bağlı iddialardan narahatlıq ifadə olunub.
“Komitə ölkədə vətəndaş məkanının daralmasından narahat olub, azad və müstəqil vətəndaş cəmiyyətinin işgəncə və pis rəftarın qarşısının alınmasının açarı olduğunu xatırladıb. Komitə iştirakçı dövləti insan hüquqları müdafiəçiləri və jurnalistlərin təhdid, repressiya, zorakılıq və digər təqiblərdən azad olaraq öz işlərini yerinə yetirmələri üçün əlverişli mühit təmin etməyə çağırıb”, – məlumatda qeyd edilir.
Rəsmi Bakı bir qayda olaraq beynəlxalq tənqidləri qəbul etmir və qərəzli sayır. Ölkə rəhbərləri fundamental azadlıqların tam təmin edildiyini, insanların iradəsinə görə təqib edilmədiyini bəyan edir.
