Bəxtiyar Hacıyev 10 il müddətinə azadlıqdan məhrum edilib
Azərbaycanda həbslər – Bəxtiyar Hacıyev
Azərbaycanda ictimai fəal Bəxtiyar Hacıyevin işi üzrə məhkəmə prosesi başa çatıb. Bir sıra iqtisadi cinayətlər törətməkdə, habelə xuliqanlıqda ittiham olunan fəal uzun müddətə azadlıqdan məhrum edilib.
- İran “Zəngəzur dəhlizi” məsələsində geri çəkilirmi? Bakıdan baxış
- Azərbaycanda maaşlarla yanaşı, kommunal xidmətlərin tarifləri də artıb
- Azərbaycan prezidenti: “Faşizm məhv edilməlidir. Bunu ya Ermənistan rəhbərliyi məhv edəcək, ya da biz”
Yanvarın 13-də Bakı Ağır Cinayətlər Məhkəməsində hakim Əli Məmmədovun sədrliyi ilə keçirilən prosesdə hökm oxunub. Məhkəmənin hökmü ilə Bəxtiyar Hacıyev 10 il müddətinə azadlıqdan məhrum edilib.
Hökmə əsasən, fəalın Bakı şəhəri, Q.Zərdabi küçəsindəki evi və bank hesablarında olan pul vəsaitləri müsadirə olunacaq. Məhkəmə həmçinin onun azadlığa çıxdıqdan sonra bir il müddətində tərbiyə işləri ilə məşğul olmasının qadağan edilməsi barədə qərar çıxarıb.
Bundan öncəki məhkəmə iclasında prokuror Bəxtiyar Hacıyevin 11 il müddətinə azadlıqdan məhrum edilməsini istəmişdi.
Hacıyev haqqında çıxarılan hökmü siyasi motivli adlandırıb. Qeyd edib ki, ona qarşı irəli sürülən bütün ittihamlar qanuni olaraq təkzib edilib.
“Xuliqanlıq ittihamına gəlincə, bu iş “hakimiyyətdəki kuratorlarının” əmrini yerinə yetirən Ülviyyə Alovlunun şikayəti əsasında saxtalaşdırılıb”, – deyə ictimai fəal bildirib.
Hacıyev bütün digər iqtisadi ittihamları absurd adlandırıb.
“Bu ittihamlar guya mənim Qərb təşkilatlarından qrant almağıım və Azərbaycanda dövlət çevrilişi törətməyi planlaşdırmaöım haqqında anonim elektron məktub əsasında irəli sürülüb”.
Hacıyev bu ittihamları “tamamilə uydurma” adlandırıb. Fəal həbsinin əsl səbəbinin Azərbaycanda insan hüquqlarını pozanlara qarşı sanksiyaların tətbiq edilməsinə yönəlmiş fəaliyyəti ilə əlaqələndirib.
O, DİN-in Mütəşəkkil Cinayətkarlığa qarşı Mübarizə Baş İdarəsinin əməkdaşına qarşı ünvanlı sanksiyalar tətbiq edildikdən dərhal sonra həbs olunub.
Hacıyev ailəsinə, jurnalistlərə (xüsusilə həbs edilmiş jurnalistlərə), həmçinin beynəlxalq qurumlara – ABŞ Dövlət Departamentinə, Konqresə, Aİ-yə, AŞPA-ya, Avropa Şurasına, Avropa Parlamentinə minnətdarlığını bildirib.
Eyni zamanda, o, sonradan özü də həbs edilən Rüfət Səfərovun onun müdafiəsinə verdiyi töhfəni xüsusi olaraq qeyd edib.
“Rüfət Səfərov son ana qədər insan hüquqlarını müdafiə edirdi. O, vəzifə və imtiyazların deyil, vicdanlı işin və insan hüquqlarının müdafiəsinin əsas olduğunu göstərib”, – Hacıyev deyib.
Bəxtiyar Hacıyev 2022-ci ilin dekabrında həbs olunub. İlkin olaraq ona qarşı Cinayət Məcəlləsinin 221.2.2-ci (ictimai qaydanın qorunması üzrə vəzifəni yerinə yetirən şəxsə qarşı müqavimət göstərməklə xuliqanlıq) və 289.1-ci (məhkəməyə hörmətsizlik) maddələrilə ittiham irəli sürülüb.
Hacıyev jurnalist Ülviyyə Alovlunun şikayəti ilə bağlı xuliqanlıqda ittiham olunur. Hacıyevlə Alovlu arasında çoxdan münaqişə var və onlar qarşılıqlı olaraq bir-birini böhtanda ittiham ediblər. Məhkəmələrin birində onların arasında sözlü atışma başlayıb və davaya çevrilib. İddiaya görə, görə, həmin insident zamanı Hacıyev həm Alovluya, həm də icra məmuru Orxan Abdullayevə qarşı zorakılıq edib.
Alovlu ilə münaqişə pişik balalarına görə başlayıb. Belə ki, tərəflərdən birinin pişiyinin balalarını digərinə vermək istəmədiyinə görə jurnalistlə fəal arasında dava düşüb. Məişət mübahisəsi qarşılıqlı ittihamlar və məhkəmə çəkişmələri ilə nəticələnib.
Bəxtiyar Hacıyev dəfələrlə bəyan edib ki, hakimiyyət onun tənqidinin qisasını almaq üçün bu faktdan istifadə edir.
2023-cü il iyunun 16-da fəala qarşı yeni ittihamlar irəli sürülüb. Bu ittihamlar əsasən maliyyə məsələlərilə – ayrılan qrantların təyinatı üzrə xərclənməməsilə bağlıdır. Ona həmçinin Cinayət Məcəlləsinin 192-ci (qanunsuz sahibkarlıq), 193-1-ci (cinayət yoluyla əldə edilmiş əmlakı leqallaşdırma), 206-cı (qaçaqmalçılıq), 320-ci (saxta sənədlərdən istifadə) maddələrilə ittiham verilib.
Həmin ilin noyabrında isə ona qarşı daha bir ittiham irəli sürülüb. Bu dəfə Hacıyev Cinayət Məcəlləsinin 213.1-ci (vergidən yayınma) maddəsilə təqsirləndirilib.
Bəxtiyar Hacıyev bu ittihamların heç birini qəbul etmir. Fəal özünü təqsirli bilmir, sifarişlə həbs olunduğunu, daxili işlər naziri Vilayət Eyvazovun ünvanına səsləndirdiyi tənqidlərə görə cəzalandırıldığını deyir.
Daxili İşlər Nazirliyi isə bu ittihamların əsassız olduğunu bəyan edib.
42 yaşlı Bəxtiyar Hacıyev ABŞ-ın Harvard Universitetində magistr dərəcəsi alıb. O, Azərbaycan hakimiyyətinin siyasətinin kəskin tənqidçisi kimi tanınır.
Dəfələrlə saxlanılıb, repressiyalara məruz qalıb. 2011-ci ildə hərbi xidmətdən yayınma ittihamı ilə azadlıqdan məhrum edilib. Həmin vaxt Hacıyev siyasi məhbus kimi tanınıb. Bir il sonra isə şərti azadlığa buraxılıb.
2022-ci ilin avqustunda o, hüquqlarının pozulmasına görə Azərbaycan vətəndaşlığından imtina haqda prezident administrasiyasına ərizə təqdim edib. Ərizə baxılmamış qalıb.
