Azərbaycan və Türkiyə qarşılıqlı hərbi yardımla bağlı razılığa gəlib

İkinci Qarabağ müharibəsi nəticəsində azad edilən Şuşa şəhərində Azərbaycan və Türkiyə arasında müttəfiqlik bəyannaməsi imzalanıb. Bəyannaməyə bütün sahələrdə müttəfiqlik münasibətləri haqda, o cümlədən də qarşılıqlı hərbi yardım haqda razılaşmalar daxildir. Yaxın zamanda Şuşada Türkiyənin baş konsulluğu açılacaq.

• Şuşa Azərbaycanın mədəniyyət paytaxtı elan olundu
• Türkiyənin Şuşada məktəb tikintisi layihəsi niyə alınmadı?
• Azərbaycanda saxlanılan 15 erməni hərbçi minalanmış sahələrin xəritəsi müqabilində Ermənistana qaytarılıb
• Azərbaycanlı deputat “Zəngəzur dəhlizi”ni icarəyə götürməyi təklif edib

Azərbaycan prezidenti İlham Əliyev türkiyəli həmkarını 2020-ci ilin payızında ikinci Qarabağ müharibəsi nəticəzində işğaldan azad edilən Füzuli rayonunda qarşılayıb. Onlar birlikdə Şuşaya yollanıblar.

Şuşa bələdiyyəsinin binası qarşısında rəsmi mərasimdən sonra iki ölkə prezidenti tet-a-tet görüş keçirib. Daha sonra iki ölkənin nümayəndə heyətləri qarşısında Azərbaycan və Türkiyə arasında müttəfiqlik haqda Şuşa Bəyannaməsi imzalanıb.

Bəyannamədə nə deyilir?

Azərbaycan prezidenti İlham Əliyev və Türkiyə prezidenti Rəcəb Tayyib Ərdoğan tərəfindən imzalanan müttəfiqlik haqda bəyanata aşağıdakı maddələr daxildir:

Ortaq maraq kəsb edən regional və beynəlxalq strateji məsələlərdə fəaliyyətlərin qarşılıqlı şəkildə əlaqələndirilməsi;

• Ortaq maraq kəsb edən regional və beynəlxalq strateji məsələlərdə fəaliyyətlərin qarşılıqlı şəkildə əlaqələndirilməsi;

• Müdafiə sənayesi sahəsində əməkdaşlıq və qarşılıqlı hərbi yardım məsələləri;

• Azərbaycan və Türkiyəni birləşdirən Zəngəzur dəhlizinin açılması məsələsi;

• Qafqaz regionunda sabitliyin və təhlükəsizliyin möhkəmləndirilməsi, bütün iqtisadi və nəqliyyat əlaqələrinin bərpası, eləcə də region dövlətləri arasında münasibətlərin normallaşdırılması və uzunmüddətli sülhün təmin edilməsi;

• Tərəflərdən hər hansı birinin müstəqilliyinə, suverenliyinə, ərazi bütövlüyünə, beynəlxalq səviyyədə tanınmış sərhədlərinin toxunulmazlığına və ya təhlükəsizliyinə qarşı üçüncü dövlət və ya dövlətlər tərəfindən təhdid və ya təcavüz edildiyi təqdirdə, birgə məsləhətləşmələr aparılması;

• Silahlı qüvvələrimizin müasir tələblərə uyğun olaraq yenidən formalaşdırılması və modernləşdirilməsi istiqamətində birgə səylərin göstərilməsi;

• Həmçinin hər iki ölkənin təhlükəsizlik şuralarının milli təhlükəsizlik məsələləri üzrə müntəzəm olaraq birgə iclaslarının keçirilməsi və bu iclaslarda milli mənafe, ölkələrin maraqlarına toxunan regional və beynəlxalq təhlükəsizlik məsələlərinin müzakirəsinin aparılması və sairə daxildir.

Qarabağda Türkiyənin diplomatik missiyası

Bəyannamənin imzalanmasından sonra Azərbaycan prezidenti bildirib ki, bu sənəd 100 yaşı tamam olan Qars müqaviləsinə əsaslanır.

Qeyd olunub ki, imzalanmış razılaşmalar sayəsində yaxın zamanda Azərbaycanda Türkiyə nümunəsi dronnların istehsalına başlanılacaq.

Cavab nitqində Türkiy prezidenti Rəcəb Tayyib Ərdoğan bildirib ki, yaxın zamanda Şuşada Türkiyənin Azərbaycandakı növbəti baş konsulluğu açılacaq.

O Türkiyə şirkətlərinin azad edilmiş ərazilərin bərpasında mühüm rolunu da qeyd edib.

Ərdoğandan “3+3” formulu

““3+3” əməkdaşlıq platformasını irəli sürdük. “3+3” platformasında Rusiya, Türkiyə, Azərbaycan, Ermənistan, Gürcüstan və İranın iştirakı nəzərdə tutulur.

Bu platforma ilə birlikdə bölgənin sülh içərisində yaşamasını istəyirik. Bu addımı atmaq üçün biz qardaşımla birlikdə hər cür fədakarlığa hazırıq. Hörmətli Vladimir Putin də bu cür fədakarlığa hazırdır.

Bu məsələdə atılacaq addımlarla bölgədə sülh bərqərar olunacaq. Bu tarixi fürsətin gerçək olmayan həvəslər, çıxışlar və əməllərlə qaçırılmaması ən böyük diləyimizdir. Bölgədə yeni vəziyyətə fayda vermək istəyən hər kəs nifrət və təhrik siyasətindən vaz keçərək sülh və əməkdaşlığı təşviq etməsi şərtdir”, – Ərdoğan bildirib.

Türkiyə prezidentinin Ermənistana müraciəti

Türkiyə prezidenti Rəcəb Tayyib Ərdoğan Ermənistana müraciət edib.

“Atəşkəs anlaşmasından sonra bütün tərəflər arasında yeni əməkdaşlıq imkanları yaranıb. Azərbaycanlı qardaşlarımızın bu məsələdəki səmimiyyətlərinə yaxından şahidik. Türkiyə olaraq biz də coğrafi qonşuluq əlaqələrimizi daha dərin əməkdaşlıqlara yönəltmək istəyirik”, – Türkiyə dövlətinin başçısı qeyd edib.