Azərbaycan Ermənistanı Laçın dəhlizindən Qarabağa mina ötürməkdə ittiham edib
Azərbaycandan Ermənistana mina ittihamı
Azərbaycan XİN dünya birliyini beynəlxalq öhdəliklərini yerinə yetirməsi üçün Ermənistana təzyiq göstərməyə çağırıb. Qurumun bəyanatında qeyd olunub ki, Ermənistan tərəfi Azərbaycan ərazisində çox sayda mina yerləşdirməyə davam edir. “Ermənistandan piyada əleyhinə minaların müharibədən sonra da Azərbaycan ərazisinə ötürülməsi bir daha nümayiş etdirir ki, Laçın dəhlizindən Ermənistanın qeyri-qanuni hərbi fəaliyyətləri üçün sui-istifadə halları davam edir”, – sənəddə deyilir.
- Türkiyə Rusiyanın sanksiyalardan yayınmasına şərait yaradır? İstanbuldan icmal
- Azərbaycan və Türkiyə liderləri Zəngilanda yeni beynəlxalq hava limanını açıblar
- Özünü rahat hiss etmək üçün nə qədər pul qazanmalısan? Bakı, Yerevan və Tbilisidə sorğu
Ötən həftəsonu Azərbaycanın Tərtər rayonunda mina partlaması nəticəsində 26 yaşlı yerli sakin yaralanıb. Onun iki ayağı amputasiya olunub.
“Yerevanın cəzalandırılmaması nəticəsində 262 vətəndaşımız mina partlayışından zərər çəkib”, – XİN-in hadisədən dərhal sonra yaydığı bəyanatda deyilir.
Azərbaycan XİN-in yeni bəyanatı
Oktyabrın 25-də Azərbaycan XİN növbəti bəyanatla çıxış edib və dünya ictimaiyyətini beynəlxalq öhdəliklərini yerinə yetirməsi üçün Ermənistana təzyiq göstərməyə çağırıb.
“Ermənistan, 10 noyabr 2020-ci il tarixli Üçtərəfli bəyanatın 4-cü bəndinə zidd şəkildə Azərbaycan ərazilərində qanunsuz hərbi fəaliyyəti davam etdirir”, – sənəddə deyilir.
Xarici İşlər Nazirliyindən bildirilib ki, Ermənistan “qüvvələrini Azərbaycan ərazisindən tam çıxartmamaqla yanaşı, Azərbaycan ərazilərində külli miqdarda piyada əleyhinə minalar yerləşdirməkdə davam edir və bu yalnız keçmiş təmas xətti boyunca deyil, digər ərazilərdə də insanların minaya düşməsi hallarının artmasına səbəb olur”.
Ev kandarlarında mina tələləri
“Ümumilikdə, son 30 il ərzində Azərbaycanda mina qurbanlarının sayı 3345 nəfər təşkil edib ki, onların da 38 nəfəri qadın, 357 nəfəri isə uşaq olub.
2020-ci il Vətən müharibəsinin başa çatmasından etibarən bu günədək 266 vətəndaşımız mina partlayışından zərər çəkib, onlardan 3 nəfər jurnalist daxil 45 nəfər həlak olub.
Cari ilin avqust ayından etibarən qeyri-qanuni məskunlaşmış ermənilərin Laçın rayonu ərazisini tərk etməsindən sonra yalnız Laçın rayonu ərazisində 1400-dən artıq 2021-ci il Ermənistan istehsalı E-001M markalı piyada əleyhinə minalar aşkarlanıb.
Habelə cari ilin 3 oktyabr tarixində Laçın rayonunun Zabux və Sus kəndlərində evlərin giriş qapılarında və həyətyanı sahələrdə yeni quraşdırılmış mina tələlərin aşkarlanması təhlükənin miqyası və ağırlığının, regionda Ermənistan tərəfindən sülh və təhlükəsizliyə nə dərəcədə ciddi zərbə vurulmasının göstəricisidir”, – deyə bəyanatda qeyd olunub.
Azərbaycan Respublikasının Minatəmizləmə Agentliyinin (ANAMA) 2022-ci il oktyabrın 6-da dərc olunan son məlumatına əsasən, 2020-ci il noyabrın 20-dən 54 841 ha sahə minalardan təmizlənib. 25 751 piyadalar əleyhinə və 12 547 tank əleyhinə mina aşkarlanıb.
Minaların Laçın dəhlizindən ötürülməsi
Azərbaycan XİN öz bəyanatında qeyd edir ki, “2021-ci ildə Ermənistanda istehsal edilən piyada əleyhinə minaların Azərbaycan ərazisinə ötürülməsi bir daha nümayiş etdirir ki, Üçtərəfli bəyanatın 6-cı bəndinə uyğun olaraq Laçın dəhlizinin yalnız vətəndaşların, malların və nəqliyyat vasitələrinin keçidi üçün nəzərdə tutulmasına baxmayaraq, bu yoldan Ermənistanın qeyri-qanuni hərbi fəaliyyətləri üçün sui-istifadə halları davam edir”.
“12-13 sentyabr tarixlərində Ermənistan silahlı qüvvələrinin bölmələrinin Azərbaycana qarşı genişmiqyaslı təxribatının və hücumlarının əsas başlanğıc nöqtəsi də havanın qaranlığı və mürəkkəb relyef şəraitindən istifadə edərək, Ermənistan hərbçilərinin Azərbaycan silahlı qüvvələrinin yerləşən mövqeləri arasında təminat yollarını və əraziləri minalamağa cəhd etməsi olub”, – nazirliyin bəyanatında deyilir.
Minalı sahələrin xəritələrinin etibarlılığı haqda
“Ermənistanın beynəlxalq təzyiq nəticəsində təqdim etdiyi kiçik qisim mina xəritələrinin etibarlılığının yalnız 25% təşkil etdiyi məlumdur. Qeyd edək ki, son mina partlayışlarının təqribən 55%-i Ermənistan tərəfindən təhvil verilən xəritələrdən kənar ərazilərdə baş verib.
Qeyd edilənlər bir daha göstərir ki, Ermənistan tərəfi məqsədyönlü şəkildə Azərbaycana qarşı hərbi təhdidləri davam etdirir. Ermənistanın bu fəaliyyəti müharibə cinayətidir, beynəlxalq humanitar hüququn və Ermənistan öhdəliklərinin ciddi pozuntusudur”, – bəyanatda bildirilir.
Dünya birliyinə çağırış
Rəsmi Bakı beynəlxalq ictimaiyyətə müraciət edərək, bildirib ki, “Ermənistanın Üçtərəfli bəyanat və beynəlxalq hüquq çərçivəsində öhdəliklərini yerinə yetirməsi, Azərbaycanın suverenliyi və ərazi bütövlüyünə qarşı fəaliyyətlərdən əl çəkməsi, bütün silahlı qüvvələrini nəhayət Azərbaycan ərazisindən çıxarması, Ermənistanın fərq qoymadan Azərbaycan ərazilərində mina yerləşdirməsi fəaliyyətini dayandırması, mina təmizləmə fəaliyyəti istiqamətində əməkdaşlıq etməsi və dəqiq mina xəritələrini Azərbaycana təqdim etməsi üçün Ermənistana təzyiq göstərilməlidir”.
“Bu addımlar bölgədə sülh və əminamanlığın təmin edilməsinə töhfə verəcəkdir”, – deyə XİN bəyanatını yekunlaşdırıb.
