Azərbaycanda koronavirus səbəbilə donor qanı qıtlığı yaranıb
Koronavirus pandemiyası talassemiya xəstələri üçün lazım olan donor qanı qıtlığına səbəb olub – bu haqda Azərbaycan Talassemiya Federasiyasının rəhbəri Nailə Quliyeva bildirib. Onun sözlərinə görə, panika səbəbilə donorlar qan verməkdən çəkinir, vəziyyət çox pisdir və talassemiyalı xəstələrin ölümünə gətirib çıxara bilər.
Talassemiya genetik qan xəstəliyidir, dünyanın müəyyən ölkələrində və regionlarında yayılıb. Azərbaycanda bu xəstəliyin yayılmasına coğrafi amildən başqa qohum nikahlar da səbəb olur, məhz qohum nikahlardan uşaqların talassemiyalı doğulması riski yüksək olur. Hazırda ölkədə 1500 nəfərdən çox insan mütəmadi (2-3 həftədən bir) qan köçürülməsinə ehtiyac duyur və bu qan donordan maksimum bir həftə əvvəl alınmış olmalıdır.
“Qanköçürmə pulsuzdur. Biz daima donorluğun təbliğatını aparırıq, müxtəlif təşkilat və şirkətlərdə qanvermə aksiyaları keçiririk. Hazırda pandemiya səbəbilə insanların kütləvi şəkildə toplanması qadağan edilib və evdən işləmək tövsiyə olunur. Martın əvvəlindən öncədən planlaşdırılmış qanvermə aksiyaları təxirə salınıb”, – Nailə Quliyeva danışır.
Media və sosial şəbəkələr vasitəsilə Nailə Quliyeva potensial donorlara yardım üçün müraciət edib. Çoxlarının pandemiya şəraitində qan verməkdən qorxduğunu nəzərə alaraq, o, insanları qanvermə prosedurunun tam steril şəraitdə həyata keçirildiyinə və bu yolla yoluxmaq ehtimalının olmadığına əmin edir.
Rəsmi məlumata görə, Azərbaycanda martın 24-ə qədər 72 nəfərdə koronavirusa yoluxma halı qeydə alınıb. Yoluxnanlardan biri ölüb, on nəfər sağalıb.