“Azərbaycan Rusiyanın işğalçı siyasətini dəstəkləmir” – Bakıdan şərh
Rusiyanın işğalçılıq siyasəti
Azərbaycan Avropaya təbii qaz ixracını iki dəfə artıracaq. Aİ-ə çatdırılan “mavi yanacağın” həcminin hətta iki qat artırıldığı təqdirdə belə Azərbaycan qazının bu ölkələrin tələbatının sadəcə 4 faizini təmin edə biləcəyinə baxmayaraq, ölkənin ekspert çevrəsində Rusiya təhdidi haqda danışmağa başlayıblar. Siyasi elmlər doktoru Cümşüd Nuriyevin fikrincə, Rusiya təxribatları Orta Asiyadan Qafqaza – Gürcüstana və Azərbaycana keçə bilər.
- “Rusiya ağlını itirmiş yaralı ayıdır” – Bakıdan şərh
- “Qərb hər şeyi tərsinə edir” – Bakıdan şərh
- “Ola bilər ki, hər şey plan üzrə gedir, amma planın müəllifi Putin deyil” – Bakıdan şərh
Bu həftənin əvvəlində Azərbaycan və Avropa İttifaqı arasında “Avropa Komissiyası tərəfindən təmsil olunan Avropa İttifaqı ilə Azərbaycan Respublikası arasındanerji sahəsində Strateji Tərəfdaşlığa dair Anlaşma Memorandumu” imzalanıb. Sənədi Azərbaycan prezidenti İlham Əliyev və Avropa Komissiyasının prezidenti Ursula Fon der Lyayen imzalayıb.
Memoranduma əsasən, Azərbaycan Aİ ölkələrinə ixrac etdiyi “mavi yanacağın” həcmini ildə 20 milyard kummetrə qədər yüksəldəcək.
Hazırda “Cənub Qaz Dəhlizi” vasitəsilə Azərbaycandan Avtopa İttifaqı ölkələrinə hər il 10 milyard kubmetr “mavi yanacaq” çatdırılır.
İqtisadçıların dəyərləndirməsinə görə, Avropa İttifaqı dövlətlərinin təbii qaza olan illik tələbatı 500 milyard kubmetr təşkil edir. Bu həcmin 60%-i Rusiya qazının payına düşür və Aİ RF-dən idxal edilən qazın həcmini ciddi azaltmaq niyyətindədir.
Aİ-ə çatdırılan “mavi yanacağın” həcminin hətta iki qat artırıldığı təqdirdə belə Azərbaycan qazının bu ölkələrin tələbatının sadəcə 4 faizini təmin edə biləcəyinə baxmayaraq, ölkənin ekspert çevrəsində Bakının qaz ixracında Rusiyanı “sıxışdırmaq” niyyətinə görə Rusiya təhdidi haqda danışmağa başlayıblar.
“2020-ci il noyabrın 10-da gərginlik mövcud idi”
Milli Məclisin keçmiş deputatı, siyasi elmlər doktoru, professor Cümşüd Nuriyevin sözlərinə görə, Azərbaycan müstəqilliyini elan edəndən bəri Bakı və Kreml arasında münasibətlər heç vaxt xüsusi mehribanlığı ilə seçilməyib.
“Hansısa mərhələlərdə və dövrlərdə münasibətlərdə gərginlik özünü daha qabarıq göstərib. Zənnimcə, 2020-ci il noyabrın 10-da gərginlik mövcud idi. Amma bu, getdikcə azalmağa başladı”, – Nuriyev deyib.
O əmindir ki, Türkiyə və Rusiya arasındakı ikitərəfli münasibətlərin yaxşılaşması bu kontekstdə Azərbaycanın xeyrinə olan amildir. Bundan başqa, 2022-ci il 23 fevralda Əliyev və Putin arasında imzalanan bəyannamə Azərbaycan-Rusiya münasibətlərinə iqtisadi, siyasi və hərbi istiqamətdə yeni baxışları gündəmə gətirdi.
“İndiki mərhələdə Azərbaycan-Rusiya münasibətlərində açıq görünə bilən gərginlik çox aşağı səviyyədədir. Amma Rusiyada hərbi elitanın müəyyən xətləri var, bu daha çox ermənilərlə bağlıdır. Onların Azərbaycana qarşı olan münasibətində xəyanətkarlıq var.
Xüsusilə, onlar Ukraynadakı uğursuzluğu digər müstəviyə keçirməklə bunu ört-basdır etməyə çalışırlar. Ona görə də Rusiya-Azərbaycan münasibətlərində açıq deyil, gizli qarşıdurmaya cəhd var”, – o əlavə edib.
“Təxribatların Orta Asiyadan Qafqaza transfer edilməsi təhlükəsi var”
Cümşüd Nuriyev bildirib ki, bu, ölkə daxilində gedən proseslər, müxalifətin fəallaşması və xaricdəkilərin hərəkətləri göstərir ki, Azərbaycana qarşı hansısa təxribatlar ola bilər:
“Bu, istisna olunmur. Əvvəlcədən də demişdik ki, Qazaxıstan və Özbəkistandan sonra çalışacaqlar ki, Gürcüstana və Azərbaycana müəyyən transferlər olsun. Əsas odur ki, biz bütün bunlara öncədən hazırlıqlı olaq”.
“Moskva koloniya siyasəti aparır”
Azərbaycan parlamentinin deputatı, iqtisadçı Vahid Əhmədov da bildirib ki, Rusiyanın Azərbaycana qarşı münasibəti heç vaxt dostca olmayıb. “Son vaxtlarda da müəyyən təhdidlər var, gəlib-gedirlər”, – o deyib.
“Qarabağ məsələsini götürək. 2020-ci ilin 10 noyabrında imzalanan üçtərəfli bəyannamənin hansı maddəsi yerinə yetirilib? Nə sərhədlərin delimitasiya və demarkasiyası, nə oradan erməni silahlı birləşmələrinin çıxarılması, nə də Zəngəzur dəhlizinin [eks-klav Naxçıvanı Azərbaycanın əsas hissəsi ilə birləşdirən] tikintisinə başlanması baş verib.
Düzdür, bir çox hallarda bunun təqsirini Yerevanda görürük, amma onun arxasında duran Rusiyadır. Odur ki, bizə münasibət bəllidir.
Rusiyada koloniya siyasəti mövcuddur. Moskva istəyir ki, Azərbaycanı da öz koloniyası kimi saxlasın. Bu da mümkün deyil. Azərbaycanın dövlət başçısı müstəqil siyasət aparır və çalışır ki, Azərbaycan öz məsələlərini müstəqil formada həll etsin. Buna da müəyyən qədər nail olub. Bu da onların xoşuna gəlmir”.
“Dünya da, Azərbaycan da dəyişib”
Əhmədov qeyd edib ki, Azərbaycanın Türkiyə ilə sıx əlaqələri və bağlanılan müttəfiqlik sazişləri Rusiyanı daha da qıcıqlandırır.
“Türkiyənin bölgədə söz sahibi olması, Azərbaycanla isti münasibətlər qurması onların xoşuna gəlmir. Çalışırlar ki, təsir göstərsinlər. Lakin mümkün deyil.
Artıq dünya, elə Azərbaycan da dəyişib. Türkiyə ilə ciddi siyasi, iqtisadi, hərbi, humanitar əlaqələrimiz var. Bizim təhlükəsizliyimizə Türkiyə, Türkiyənin təhlükəsizliyinə Azərbaycan təminat verir”.
“Rusiyanın işğalçı siyasətini tanımırıq”
Azərbaycanlı deputat qeyd edib ki, Azərbaycan heç vaxt Rusiya ilə tərəfdaşlıq münasibətlərini kəsməyib.
“Azərbaycan-Rusiya münasibətləri daim var. Rusiya bizə qonşu dövlətdir. Siyasi, iqtisadi, humanitar əlaqələrimiz var. Azərbaycanın dövlət başçısı hər zaman Rusiya ilə yaxşı münasibətlərdə olub.
Amma biz işğalçılıq siyasətini qəbul etmirik. Biz suveren dövlətik. Rusiya isə işğalçılıq siyasəti aparır.
Moldova, Gürcüstan və nəhayət, Ukraynada nə kimi hadisələrin baş verdiyi ortadadır. Amma Azərbaycanla bu, gətirdiyim səbəblər üzündən mümkün deyil.
Rusiya özü çalışmalıdır ki, Azərbaycanla daha sıx iqtisadi, siyasi əlaqələri olsun”, – Vahid Əhmədov sözlərini yekunlaşdırıb.
