AXCP sədri Əli Kərimli böhtanda ittiham olunur
AXCP sədri Əli Kərimlinin məhkəməsi
Bu gün müxalif Azərbaycan Xalq Cəbhəsi Partiyasının (AXCP) sədri Əli Kərimli məhkəmə qarşısına çıxıb. O, böhtanda ittiham olunur. Bu ittihamla onu 6 aya qədər həbs gözləyir. Müxalifətçi hesab edir ki, o özü hakimiyyətin böhtanının qurbanına çevrilib.
- Cənubi Qafqaz ölkələrinin Rusiya ilə iqtisadi münasibətləri necə dəyişib? – Bakıdan icmal
- Gürcüstan. İvanişvili ailəsi 2024-cü ildə Moskva vilayətində mülk alıb – araşdırma
- “Hər bir tərəf öz şərtləri ilə münaqişələrini həll etmək üçün gözlənilməz, qəfil bir yardım gözləyir.” Avropa İttifaqının xüsusi nümayəndəsi Toyvo Klaar ilə müsahibə
Avqustun 13-də Bakının Nəsimi rayon Məhkəməsində hakim Babək Pənahovun sədrliyi ilə Aydın Əliyevin AXCP lideri Əli Kərimliyə qarşı xüsusi ittiham qaydasında verdiyi şikayət üzrə məhkəmənin hazırlıq iclası keçirilib.
Həmin partiyanın keçmiş üzvü olan Əliyev Kərimlinin Azərbaycan Cinayət Məcəlləsinin 147.1-ci (böhtan) maddəsilə məsuliyyətə cəlb olunmasını tələb edir. Bu ittihamla onu cərimə və ya 6 aya qədər həbs cəzası gözləyir.
Aydın Əliyev artıq AXCP-yə qarşı iki məhkəmə işini udub
Aydın Əliyev 2019-cu ilə qədər AXCP Nəzarət-Təftiş Komissiyasının sədri olub. Daha sonra Rəyasət Heyətinin qərarı ilə o, “hakimiyyətlə əməkdaşlıq etdiyinə və partiyanın prinsiplərinə zidd mövqe tutduğuna” görə partiya sıralarından xaric edilib.
Bundan sonra Aydın Əliyev sosial şəbəkələrdə tez-tez Əli Kərimlinin ünvanına ittihamlar səsləndirib. O, partiya liderini “xarici ölkələrdən külli miqdarda pul alıb, rahat yaşamaqda” ittiham edib.
Üstəlik, 2020-ci ildə Əliyev məhkəməyə müraciət edərək AXCP Rəyasət Heyətinin onun partiyadan xaric edilməsi ilə bağlı qərarına etiraz edib və məhkəmə onu AXCP Nəzarət-Təftiş Komissiyasının sədri vəzifəsinə bərpa edib.
2023-cü il iyunun 24-də keçirilən partiyanın sonuncu qurultayından sonra Aydın Əliyev bu dəfə partiya qurultayının nəticələrini mübahisələndirmək üçün yenidən məhkəməyə üz tutub. 2024-cü il iyulun 5-də məhkəmə Əliyevin iddiasını təmin edərək qurultayın nəticələrini ləğv edib.
Bu dəfə isə Aydın Əliyev Əli Kərimlinin ona “böhtan atdığına” görə həbs olunmasını istəyib.
“Partiyanın siyasi kursundan yayındığına, hakimiyyətlə əməkdaşlığa görə Azərbaycan Xalq Cəbhəsi Partiyasından xaric edilən Aydın Əliyev məhkəmənin qərarı ilə zorla nəzarət-təftiş komissiyasının rəhbəri vəzifəsinə bərpa edilib. Partiyaya zorla bərpa edilmiş bu şəxsin şikayəti əsasında 05.07.2024-cü il tarixində Nəsimi Rayon Məhkəməsi 24.06.2023-cü il tarixli qurultayın qərarlarını etibarsız sayıb, qərar 287 lehinə, bir səs əleyhinə olmaqla qəbul edilmişdi”.
Kərimlinin qeyd etdiyi kimi, hazırkı proses “Azərbaycanın məhkəmə sistemi üçün sınaq olacaq. Məhkəmə şikayəti təmin edərsə, bu, rejimin özü üçün utancverici olacaq, çünki “hakimiyyətlə əməkdaşlıq” şərəf və ləyaqətin təhqiri kimi tanınacaq”, – AXCP lideri qeyd edib.
Məhkəmə iclası bir həftə sonraya təxirə salınıb
Bu iş üzrə məhkəmə iclası iddiaçının şikayəti “prosessual qaydalara uyğun tərtib olunmadığından” avqustun 19-na təxirə salınıb. Bu barədə Kərimli məhkəmə iclasından sonra jurnalistlərə bildirib. O, şikayəti əsassız və absurd adlandırıb.
“Bu, repressiya maşınının növbəti saxtakarlığıdır. Onu deyim ki, heç bir cinayət işi, həbs təhlükəsi, hətta real həbs bizim azadlıq və ədalət uğrunda mübarizəmizi dayandırmayacaq”, – deyə Kərimli qeyd edib.
Əvvəllər də onun cinayət məsuliyyətinə cəlb edilməsinə cəhdlər olub. Hələ 1994-cü ildə Kərimlini qanunsuz döyüş sursatı gəzdirməkdə ittiham etməyə çalışıblar. 2006-cı ildən isə ona xarici pasport verilmir.
Avropa İnsan Haqları Məhkəməsi Kərimlinin beynəlxalq pasportdan məhrum edilməsini qanunsuz hesab edib. Lakin Azərbaycan hakimiyyəti hələ də bu qərara məhəl qoymur.
Avropa Parlamentinin üzvü Aİ-ni tədbir görməyə çağırır
Avropa Parlamentinin üzvü İzabel Santos AXCP sədri Əli Kərimliyə qarşı təqibə yol verməmək üçün Avropa İttifaqını hərəkət etməyə çağırıb.
Bu barədə Avropa Parlamentinin üzvü “ X” platformasında qeyd edib.
“O, siyasi qərəzli məhkəmə qarşısına çıxarılacaq. Bu barədə Avropa İttifaqı hərəkət etməlidir”, – deyə o qeyd edib.
Bir sıra Avropa ölkələrinin səfirləri Əli Kərimli ilə görüşüblər
Məhkəmə ərəfəsində bir sıra Avropa ölkələrinin səfirləri Əli Kərimli ilə görüşüblər.
Əli Kərimnli bildirib ki, əvvəlcə Böyük Britaniya Birləşmiş Krallığının Azərbaycandakı səfiri Fergus Auldi ilə görüşü olub.
“Görüşdə Azərbaycan Xalq Cəbhəsi Partiyası ətrafında yaranmış vəziyyət, partiyanın fəaliyyətinə yaradılan maneələr, mənə qarşı başlanmış cinayət işi, parlament seçkilərini partiyanın boykot etməsi, ölkədəki irimiqyaslı repressiyalar və bütövlükdə ictimai-siyasi vəziyyət, Azərbaycan-Böyük Britaniya münasibətləri müzakirə olundu”, – o, Facebook səhifəsində qeyd edib.
Kərimlinin sözlərinə görə, Avropa İttifaqının Bakıdakı nümayəndəliyində səfir Peter Mixalkonun təşkilatçılığı ilə Avropa İttifaqına üzv dövlətlərin səfir və digər diplomatları ilə də ətraflı görüşü olub.
“Avropa İttifaqına üzv ölkələrin səfirlərilə görüşümüzdə də mənə qarşı başladılmış cinayət işi, partiyamızın fəaliyyətilə bağlı davam edən məhkəmə işləri, Tofiq Yaqublu başda olmaqla, siyasi məhbusların taleyi, parlament seçkiləri ərəfəsi ölkədəki ictimai-siyasi vəziyyət, Azərbaycan-Avropa İttifaqı münasibətləri ətraflı müzakirə olundu”, – deyə o qeyd edib.
