Avropa Komissiyasının prezidenti: "Vizasız rejimin dayandırılması Gürcüstanın bütün əhalisinə şamil oluna bilər"
Fon der Lyayendən gürcü müxalifətinə cavab
Gürcüstan müxalifətinin liderləri Gürcüstanda baş verən son hadisələrlə bağlı Avropa Komissiyasının prezidenti Ursula fon der Lyayenə məktub ünvanlayaraq hakim “Gürcü Arzusu” partiyasına qarşı sanksiyaların sərtləşdirilməsinə çağırıblar.
Fon der Lyayen cavabında bildirib ki, Avropa İttifaqına üzv dövlətlər Gürcüstan hökumətinə qarşı mümkün əlavə tədbirləri müzakirə edirlər, lakin sanksiyalar məsələsində hələlik konsensus əldə olunmayıb.
Müxalifət nümayəndələrinin göndərdiyi məktubda deyilir: “Avropa İttifaqına üzv dövlətlərdən birinin cənab Bidzina İvanişvili və onun Kremllə əlaqəli şəbəkəsinə qarşı Avropa Komissiyasının ciddi sanksiyalar qəbul etmək cəhdlərinə sistemli şəkildə mane olduğu bizə məlumdur. Ümid edirik ki, bu müqavimət zamanla aradan qalxacaq, lakin hazırda yenilənmiş Vizasız Rejimin Dayandırılması Mexanizmi real irəliləyiş yolu təklif edir”.
Ursula fon der Lyayenin cavab məktubu
“Birgə məktubunuza görə təşəkkür edirəm. Məktubda Gürcüstanda baş verən cari siyasi hadisələrlə bağlı narahatlıq ifadə olunub.
Vurğulamaq istəyirəm ki, Avropa İttifaqı Gürcüstan xalqının demokratik və sabit Avropa gələcəyinin təmin edilməsi üçün səylərini davam etdirəcək. Biz Gürcüstandakı bütün siyasi aktorları bu məqsədə nail olmaq üçün çalışmağa çağırırıq.
Son dövrlər Gürcüstanda baş vermiş mənfi hadisələrlə əlaqədar olaraq Avropa İttifaqı qəti reaksiya verib və Gürcüstan hakimiyyətini bütün jurnalistləri, fəalları və ədalətsiz şəkildə saxlanılan şəxsləri azad etməyə çağırıb. Seçkilərdə pozuntular, dinc etirazçılara qarşı zorakılıq, repressiv qanunvericiliyin qəbulu və məhkəmə sisteminin repressiyalar üçün alətə çevrilməsi ilə bağlı narahatlığımızı ifadə etmişik. Bu addımlar Avropa İttifaqının fundamental dəyərləri və prinsiplərinə ziddir.
Cari hadisələrə cavab olaraq Avropa Komissiyası müvafiq tədbirlər qəbul edib, o cümlədən Gürcüstan hökumətinə göstərilən ikitərəfli maliyyə dəstəyini dayandırıb və siyasi təmasların səviyyəsini aşağı salıb. Bundan əlavə, Komissiyanın təklifi əsasında Avropa Şurası Gürcüstan vətəndaşları üçün vizasız rejimi qismən dayandırıb ki, bu da Gürcüstanın diplomatik və xidməti pasport sahiblərinə şamil olunur. 2024-cü ilin iyun və oktyabr aylarında Avropa Şurasının gəldiyi nəticəyə uyğun olaraq, Gürcüstanın Avropa İttifaqına üzvlük prosesi faktiki olaraq dayandırılıb.
19 dekabr 2025-ci il tarixində dərc edilmiş Vizasız Rejimin Dayandırılması Mexanizmi üzrə son hesabatda Komissiya belə qənaətə gəlib ki, Gürcüstan idarəetmə, hüququn aliliyi, viza uyğunluğu və korrupsiyaya qarşı mübarizə kimi vizasız rejimin əsasını təşkil edən fundamental meyarlardan daha da geri çəkilib. Bu geriləmənin sistemli və məqsədli xarakterini nəzərə alaraq, Komissiya yenilənmiş Vizasız Rejimin Dayandırılması Mexanizmi çərçivəsində əlavə tədbirlərin görülməsi proseduruna başlayıb.
Yeni qaydalara əsasən, birinci mərhələdə dayandırma Gürcüstan hakimiyyəti tərəfindən verilmiş diplomatik, xidməti və rəsmi pasport sahiblərinə şamil olunacaq ki, bu da bütün Aİ üzv dövlətlərində vahid tətbiqi təmin edəcək. İkinci mərhələdə isə, əgər Gürcüstan rəsmiləri demokratik geriləməni və insan hüquqları pozuntularını davam etdirərsə, dayandırma ölkənin bütün əhalisinə şamil oluna bilər.
Aİ-yə üzv dövlətlər Gürcüstana münasibətdə mümkün əlavə tədbirləri müzakirə edirlər. Sanksiyalar məsələsində hələlik konsensus əldə olunmasa da, demokratik geriləmə və insan hüquqları pozuntularına görə məsuliyyət daşıyan şəxslərin cavabdehliyə cəlb edilməsi ilə bağlı müzakirələr davam edir. Sanksiyalarla bağlı bütün qərarlar Aİ-yə üzv dövlətlər tərəfindən yekdilliklə qəbul olunur.
Avropa İttifaqı Gürcüstanda demokratik prinsiplərin, insan hüquqlarının və hüququn aliliyinin dəstəklənməsinə sadiq qalır. Əmin ola bilərsiniz ki, Avropa İttifaqı Gürcüstan xalqını və onun Avropa gələcəyinə yönəlmiş istəklərini qətiyyətlə dəstəkləməyə davam edir.
Hörmətlə, Ursula fon der Lyayen.”
Fon der Lyayendən gürcü müxalifətinə cavab
