Avropa İttifaqı və ABŞ Navalnının həbsinə görə Rusiya məmurlarına qarşı sanksiya tətbiq edib
Avropa İttifaqı müxalif siyasətçi Aleksey Navalnının həbsi və təqib edilməsinə görəRusiyanın yüksəkvəzifəli şəxslərinə qarşı sanksiya tətbiq edib.
Rusiyanın «Новая газета» nəşrinin məlumatına görə, sanksiya tətbiq olunanlar arasında Rusiyanın baş prokuroru İqor Krasnov, İstintaq Komitəsinin sədri Aleksandr Bastrıkin, Rusiya Qvardiyasının direktoru Viktor Zolotov və Federal Cəzaların İcrası Xidmətinin direktoru Aleksandr Kalaşnikov da var.
“Noviçok” kimyəvi silahı ilə zəhərləndikdən sonra möcüzə nəticəsində həyatda qalan müxalif siyasətçi Aleksey Navalnı müalicə aldığı Almaniyadan Rusiyaya qayıdarkən elə aeroportdaca həbs edilib.
Rusiya məhkəməsi onun şərti cəzasını üç il yarım azadlıqdan məhrumetmə cəzası ilə əvəz edib.
Avropa İttifaqı ölkələrinin XİN rəhbərləri fevralın 22-də Brüsseldə keçirilən görüşdə Rusiyaya qarşı fərdi sanksiyaların genişləndirilməsi haqda razılığa gəlmişdilər. Aİ-nin xarici siyasət xidmətinin rəhbəri Jozep Borrelin sözlərinə görə, bu sanksiyalar “onun həbsinə, ittihamın və hökmün irəli sürülməsinə görə məsuliyyət daşıyanları” əhatə edəcək.
- Fənərlər, sevgi və Navalnı – Rusiyada müxalifətçiyə dəstək aksiyalarından fotoreportaj
- “Navalnıya azadlıq!” Bütün Rusiyada müxalifətçiyə dəstək aksiyaları. Foto
Sanksiyanın təsiri altına düşənlərə Aİ-ə giriş qadağan olunacaq, Avropa İttifaqında yerləşən bank aktivləri dondurulacaq.
Avropa İttifaqı ötən ilin oktyabrında Navalnıya qarşı “Noviçok” qrupundan olan zəhərli maddə ilə sui-qəsdə görə artıq Rusiya məmurlarına sanksiya tətbiq edib.
Martın 2-də ABŞ da rusiyalı müxalifətçi Aleksey Navalnının zəhərlənməsi və həbs edilməsinə görə məsuliyyət daşıyan rusiyalılara qarşı sanksiya tətbiq edib.
Bu haqda ABŞ-ın prezident administrasiyasının nümayəndələri bildiriblər. Qara siyahıya həm fiziki, həm də hüquqi şəxslər düşüb – bəyanatda deyilir. Məlumatda onların adları hələlik açıqlanmır.
ABŞ bu addımları Avropa İttifaqı ilə koordinasiya şəklində atıb.
