Avropa Məhkəməsi bloklanmış 4 mediaya görə Azərbaycanı cərimələdi
AİHM-in Azərbaycanla bağlı qərarları
Avropa İnsan Hüquqları Məhkəməsi (AİHM) iyunun 13-də Azərbaycandan göndərilmiş şikayətlər üzrə daha 2 qərar və qərardadını elan edib. Birinci iş ölkədə dörd media qurumunun internet saytlarının bloklanması, ikinci iş isə Nardaran hadisələrinə görə həbs olunanların işgəncəyə və pis rəftara məruz qalması ilə bağlıdır. Ümumilikdə bu iki qərara görə Azərbaycan hakimiyyəti 77 500 avro məbləğində cərimələnib.
- “Abzas Media” əməkdaşlarının həbs müddəti uzadılıb
- Tbilisidə aktivist parlament sədri tərəfindən sosial şəbəkələrdə tənqid olunandan bir saat sonra döyülüb
- Paşinyan: “Biz KTMT-dən çıxacağıq, başqa yol yoxdur”
“RFE/RL Inc. (Azadlıq Radiosu) və başqaları (3) Azərbaycana qarşı”
Məhkəmə blok edilmiş 4 medianın iddia etdikləri pozuntuları tanıyıb.
Bunlar Azad Avropa/Azadlıq Radiosu (azadliq.org), “anaxeber.az” onlayn xəbər portalının təsisçisi və redaktoru Azər Talıbov, “az24saat.org” onlayn xəbər portalının təsisçisi Vüqar Ələkbərov və “xural.com” saytının baş redaktoru Əvəz Zeynallıdır.
2017-2018-ci illərdə Azərbaycanda “İnformasiya, informasiyalaşdırma və informasiyanın mühafizəsi haqqında” Qanuna və İnzibati Xətalar Məcəlləsinə informasiyaların yayılması ilə bağlı tənzimləmələri dəyişdirən dəyişikliklər edilmişdi.
Həmin dəyişikliklərdən sonra ərizəçi olan dörd onlayn mediaya Azərbaycan daxilindən giriş tamamilə blok edilmişdi.
Yerli məhkəmələr qərarlarını qanunvericiliyə edilmiş dəyişikliklərlə əsaslandırmışdılar.
Ərizəçilər AİHM qarşısında iddia edirdilər ki, konkret məzmunlara yox, bütün internet resursuna blokun qoyulması ifrat dərəcədə ağır olub.
Onlara görə, bloklama hansısa qanunsuz məzmunun yayılmasının önlənməsi məqsədi yox, hökuməti tənqid edən məzmunların qarşısının alınması məqsədi daşıyıb.
Ərizəçilər onlara münasibətdə Konvensiyanın 6-cı, 10-cu, 13-cü və 18-ci maddələrinin pozulduğunu iddia edirdilər.
Avropa Məhkəməsi bu işdə mediaların blok edilməsinin onların ifadə azadlığı hüququnu poizduğu qənaətinə gəlib.
Məhkəmənin qərarına əsasən, hökumət 4 ərizəçinin hər birinə 5 min avro mənəvi zərər əvəzi ödəməlidir.
Bununla yanaşı, ərizəçilərdən “anaxeber.az”, “az24saat.org” və “xural.com” saytlarının rəhbərlərinə hüquqi xərclər əvəzi 1000 avro ödənilməlidir.
Bu qərar internet resurslara tətbiq edilmiş bloklamanın qaldırılmasını ehtiva edir.
Ərizəçiləri AİHM-də vəkillər Elçin və Zibeydə Sadıqovlar təmsil ediblər.
“Zakir Mustafayev və başqaları Azərbaycana qarşı”
Bu məhkəmə işi 2015-ci ildə Nardaran hadisələri zamanı həbs olunanların işgəncə və qeyri-insani rəftara məruz qalmalarına dair iddialarını əhatə edir.
2015-ci ilin noyabrında Bakının kənarındakı Nardaran qəsəbəsində polis əməkdaşları ilə yerli sakinlər arasında qarşıdurma yaranıb. Toqquşmalar nəticəsində 7 nəfər (iki polis, beş kənd sakini) həlak olub, 4 nəfər yaralanıb, 14 nəfər həbs edilib.
Ərizəçilər iddia edirdilər ki, onlardan etirafedici ifadələr alınması məqsədilə işgəncəyə məruz qalıblar.
Müxtəlif bədən xəsarətləri aldıqlarını, öz seçdikləri vəkillərə çatıma imkan verilmədiyini, ailələrinin həbsləri haqda bilgiləndirilmədiyini iddia edən ərizəçilər AİHM qarşısında Konvensiyanın 3-cü və 10-cu maddələrinin pozuntusunu mübahisələndirmişdilər.
AİHM hesab edib ki, ərizəçilərin hər birinə münasibətdə Konvensiyanın 3-cü maddəsinin pozuntusu baş verib.
Məhkəmə həmçinin ərizəçilərdən Abbas Hüseynov, Əlibala Vəliyev, Abbas Quliyev, Rasim Cəbrayılov, Əli Nuriyevə münasibətdə Konvensiyanın 3 maddəsinin maddi aspektdən də pozulmasına qərar verib.
Məhkəmənin qərarına görə, hökumət mənəvi zərər əvəzi olaraq, ərizəçilərdən Abbas Hüseynov, Əlibala Vəliyev, Abbas Quliyev, Rasim Cəbrayılov, Əli Nuriyevin hər birinə 7500, Zakir Mustafayev, Ramin Yarıyevin hər birinə isə 5000 avro ödəməlidir.
Bunlardan başqa ərizəçilərin hər birinə 1000 avro hüquqi xərclər əvəzi ödənilməlidir.
Ərizəçiləri AİHM-də vəkillər Elçin və Zibeydə Sadıqovlar, Nemət Kərimli, Fariz Namazlı və Yalçın İmanov təmsil ediblər.
