Azərbaycanda “Abzas Media işi” üzrə məhkəmə prosesi başlayıb
“Abzas Media işi” üzrə məhkəmə
13 ay davam edən ibtidai istintaqdan sonra “Abzas Media işi” üzrə məhkəmə prosesi başlayıb. Bu iş üzrə qaçaqmalçılıq da daxil olmaqla bir sıra iqtisadi cinayətlərdə təqsirləndirilən media nümayəndələri bütün ittihamları rədd edir və həbslərini apardıqları korrupsiya araşdırmaları ilə əlaqələndirirlər.
- Azərbaycanda hərbi xidmətə çağırış yaşının yuxarı həddi 30 yaşa endiriləcək
- DTX ölkədə təxribatlar planlaşdıran ekstremist qruplaşmanı ifşa etdiyini açıqlayıb
- Azərbaycanda fəal 3 il azadlıqdan məhrum edilib, jurnalistə qarşı ittiham yumşaldılıb
Dekabrın 17-də Bakı Ağır Cinayətlər Məhkəməsində hakim Rasim Sadıxovun sədrliyi ilə “Abzas Media işi” üzrə hazırlıq iclası keçirilib. Müttəhimlər kürsüsündə müstəqil “Abzas Media” internet nəşrinin direktoru Ülvi Həsənli, direktor müavini Məhəmməd Kəkalov, baş redaktor Sevinc Vaqifqızı, reportyorlar Nərgiz Absalamova və Elnarə Qasımova, araşdırmaçı jurnalist Hafiz Babalı və bu nəşrlə heç bir əlaqəsinin olmadığını bildirən iqtisadçı Fərid Mehralıyev əyləşib.
Jurnalistlər “yer yoxdur” bəhanəsi ilə məhkəmə zalına buraxılmayıb. Məhkəmə zalına daxil ola bilməyən jurnalistlərin özlərinin də qeyd etdiyi kimi, prosesin keçirildiyi otaq əvvəlcədən təqsirləndirilən şəxslərlə heç bir əlaqəsi olmayan şəxslərlə doldurulub.
“Həbs olunan jurnalistlərin qohumları çətinliklə içəri keçə bildilər, məhkəməni işıqlandırmaq istəyən həmkarlarını isə buraxmadılar, dedilər ki, içəridə yer yoxdur”, – zala girə bilməyən JAMnews-un əməkdaşı bildirib.
Bununla bağlı həbs olunmuş jurnalistlər və onların vəkilləri də vəsatət qaldırıblar.
“Biz dörd-beş məsələ ilə bağlı vəsatət qaldırdıq. Vəsatətlərdən biri jurnalistlərin və həbs olunanların yaxınlarının məhkəmə zalına keçə bilməməsi ilə bağlı idi. Ülvi zalda bu işlə heç bir əlaqəsi olmayan xeyli adamın olduğunu dedi və məhkəmədən bu şəxslərin zaldan çıxarılmasını, onların əvəzinə dostlarının, qohumlarının, xüsusən də prosesi işıqlandırmalı olan jurnalistlərin iştirakının təmin edilməsini istədi”, – Ülvi Həsənlinin vəkili Zibeydə Sadıqova bildirib.
Vəkilin sözlərinə görə, məhkəmə jurnalistlərin prosesə buraxılması və iclasların videoçəkilişinin təmin edilməsinə dair vəsatəti təmin etməyib.
Digər vəsatətlərdə müdafiəçilər məhkəmədən cinayət təqibinə xitam verilməsini və həbs edilən jurnalistlərin ev dustaqlığına buraxılmasını istəyiblər.
“Məhkəmə cinayət təqibinə xitam verilməsi ilə bağlı vəsatətə baxmaqdan imtina edib, jurnalistlərin ev dustaqlığına buraxılması ilə bağlı vəsatəti təmin etməyib. Baxmayaraq ki, müdafiə etdiyim Nərgiz və digərləri heç bir səbəb olmadan bir ildən artıqdır ki, həbsdə qalıblar”, – Nərgiz Absalamovanın vəkili Rövşanə Rəhimli jurnalistlərə bildirib.
Onun sözlərinə görə, bütün vəkillərin yalnız bir vəsatəti təmin edilib: həbs olunmuş jurnaistlərə şüşə qəfəsdən çıxıb müdafiəçilərinin yanında oturmağa icazə verilib.
Məhkəmənin növbəti mahiyyəti üzrə iclası dekabrın 28-nə təyin edilib.
Jurnalistlərin yaxınlarının dediyinə görə, onlar hakim qarşısında da bütün ittihamları rədd ediblər və məhkəmədə əhval-ruhiyyələri yaxşı olub. Təqsirləndirilən jurnalist Hafiz Babalı hakim Rasim Sadıxovu “siyasi sifarişi yerinə yetirməməyə və işə obyektiv baxmağa” çağırıb.
Prosesi bir sıra Qərb ölkələrinin Bakıda akkreditə olunmuş səfirliklərinin nümayəndələri müşahidə ediblər.
“Abzas Media işi”
“Abzas Media işi” üzrə cinayət təqibi 20 noyabr 2023-cü ildə başlayıb. Məhz bu gün nəşrin direktoru Ülvi Həsənli və onun müavini Məhəmməd Kekalov, ertəsi gün isə baş redaktor Sevinc Vaqifqızı ölkəyə qayıdarkən elə hava limanındaca saxlanılıblar.
2024-cü il yanvarın 13-ə qədər “Abzas Media”nın daha üç əməkdaşı – reportyorlar Nərgiz Absalamova və Elnarə Qasımova, araşdırmaçı jurnalist Hafiz Babalı həbs ediliblər.
İyunun 1-də tanınmış iqtisadçı-ekspert Fərid Mehralızadə “Abzas Media işi” üzrə saxlanılıb. Lakin o, bu media ilə əlaqəsini inkar edir. “Abzas Media” redaksiyası da həbsdə olan iqtisadçı ilə heç vaxt əməkdaşlıq etmədikləri barədə bəyanat yayıb.
İş üzrə bütün təqsirləndirilənlər ilkin olaraq qaçaqmalçılıqda ittiham olunublar. Daha sonra onlara qarşı Azərbaycan Cinayət Məcəlləsinin daha 7 ağır maddəsi – 192.3.2 (külli miqdarda gəlir əldə etməklə qanunsuz sahibkarlıq), 193-1.3.1 və 193-1.3.2 (mütəşəkkil dəstə tərəfindən cinayət yolu ilə əldə edilmiş gəlirləri leqallaşdırma), 206.4 (mütəşəkkil dəstə tərəfindən qaçaqmalçılıq), 320.1 və 320.2 (sənədləri saxtalaşdırma və saxta sənədlərdən istifadə), habelə 213.2.1 (qrup şəklində vergidən yayınma) ilə ittiham irəli sürülüb.
Bu ittihamlarla onları 12 ilədək həbs cəzası gözləyir.
Jurnalistlər bütün ittihamları rədd edir və həbslərini “Abzas Media”da dərc olunan korrupsiya araşdırmaları ilə əlaqələndirirlər.
Hüquq müdafiəçilərinin bildirdiyinə görə, müstəqil “Abzas Media” nəşri yüksək vəzifəli məmurlar və onların yaxınları ilə bağlı korrupsiya araşdırmalarının dərcinə görə repressiyaya məruz qalıb.
