Abxaziyada Rusiya ilə sərhədin açılmasını tələb edirlər, yoluxma halları artır

Abxaziyada Rusiya ilə sərhədlərin bağlı qalmasının uzadılmasına qarşı etiraz edirlər – respublikada koronavirusa yoluxma hallarının artması fonunda. Prezident xüsusi bəyanatla çıxış edib. Abxaziya parlamentinin deputatında koronavirus diaqnozu təsdiqlənib, bununla əlaqədar olaraq bütün parlamentarilərin koronavirus testindən keçirilməsi qərara alınıb.

Qaqra şəhərində aksiya

Qaqra şəhərinin (Rusiya sərhədinin yaxınlığında) Abxaziyadakı vəziyyətdən narahat olan sakinləri mitinq təşkil ediblər. Şəhər sakinlərinin bir qismi  Rusiya ilə sərhədin açılmasını istəyir, digərləri koronavirusun yayılmasından narahatdır, üçüncülərin isə maddi dəstəyə ehtiyacı var.

Əsasən insanlar hökumətin atdığı addımlara aydınlıq gətirilməsini tələb ediblər. İndən belə onları nələrin gözlədiyini bilmək istəyiblər. Meydana çıxmaq üçün əsas motivasiya respublikanın əsas kurort rayonunun sakinlərinin üzləşdiyi iqtisadi çətinliklər olub. İnsanlar deyirlər ki, bütün ehtiyatlarını tükədiblər və qışdan necə çıxacaqlarını bilmirlər.

“Bizə hər ailə üzvünə görə 10 min rubl (135 dollara yaxın) lazımdır! Hətta əgər ayın dördü sərhəd açılsa da, bizə bu, heç cürə kömək etməyəcək. Uşaqları məktəbə necə geyindirək? Necə hazırlayaq? Bir uşağın paltarı 20 minə (270 dollara yaxın) başa gəlir!” – şəhər sakinləri mitinqdə çıxış ediblər.

Onların tələblərini rayon məclisinin deputatları və Qaqra rayon Administrasiyasının rəhbəri Yuri Xaquş dinləyib. Rayon deputatları və məmurları cavab veriblər ki, pandemiya zamanı dəfələrlə sakinlərə yardım edilib. Amma bununla belə, insanların istəkləri dinlənilib və prezidentə çatdırılacaq.

Mitinqçilər dinc şəkildə dağılışıblar. Sosial şəbəkələrdə isə həmvətənlərinin bu aksiyası birmənalı qarşılanmayıb.

“Əhalisinin sayı 250 min olduğu halda hər ailə üzvünə 10 min 2,5 milyard rubl (34 milyon dollara yaxın) eləyir. Dövlətimiz ayda bu qədər məbləği ödəməlidir? Adama kalkulyator bağışlayın. Bu, ölkəmizin illik büdcəsidir”, – istifadəçilərdən biri yazıb.

“Bəs digər rayonlar – Oçamçir, Tkuarçalu (Abxaziyanın şərqi hissəsi – red.) neyləsinlər? Vicdansızlar, sanki son tikə çörəyi yeyirlər. Qorxurlar ki, mövsümün sonuna yeni Leksus ala bilməyəcəklər, ya da mehmanxananın daha bir mərtəbəsini ucalda bilməyəcəklər”, – digəri hesab edir.

Xatırladaq ki, iyulun 28-də Abxaziya prezidenti Aslan Bjaniya Rusiya ilə dövlət sərhədində məhdudiyyəti avqustun 4-ə qədər uzadıb.

Bununla yanaşı Abxaziyada COVID-19 xəstələrinin kəskin artımı müşahidə olunur. İyulun 20-də hakimiyyət rəsmən bəyan edib ki, sonuncu koronavirus xəstəsi müalicə olunub, amma bir neçə gündən sonra yeni yoluxanlar qeydə alınıb. Hazırda 24 nəfərdə virus təsdiqlənib. Xəstələrdən biri vəfat edib.

Prezidentin müraciəti

Abxaziya prezidenti Aslan Bjaniya yaranmış vəziyyətdən çıxış edərək pandemiya başlayandan bəri ilk dəfə xalqa xüsusi müraciətlə çıxış edib:

“Ölkə rəhbərliyi vəziyyətin bütün çətinliyini dərk edir. Biz dövlət sərhədinin bağlanmasına görə vətəndaşların hansı duruma düşdüyünü anlayırıq. Amma biz ondan çıxış edirik ki, dövlət üçün vətəndaşın həyatı və sağlamlığından daha önəmli heç nə ola bilməz”.

Prezidentin sözlərinə görə, Rusiya Federasiyası ilə dövlət sərhədi birtərəfli şəkildə açıla bilməz, amma Abxaziya hakimiyyəti “hər iki ölkənin vətəndaşlarının həyatı və sağlamlığı üçün ən təhlükəsiz həll yolunun hazırlanması üçün Rusiya tərəfi ilə mütəmadi əlaqədədir. Yaxın zamanda bu həll yolu tapılacaq”.

Prezident əmin edib ki, vətəndaşlar üçün epidemiyanın fəsadlarını minimuma endirmək üçün bütün tədbirlər görülür.

Deputatda koronavirus

Abxaziya parlamentinin deputatlarından birinin COVID-19 virusuna yoluxduğu təsdiqlənib – bu haqda parlament spikeri Valeri Kvarçiya bildirib. Bununla əlaqədar olaraq Xalq Məclisi üzvlərinin hamısının testdən keçirilməsi qərara alınıb.

Deputat Levon Qalustyan könüllü şəkildə sürücüsü ilə birlikdə COVID-19 testi vermək qərarına gəlib, çünki onun qonşularında bir neçə gün əvvəl koronavirus aşkarlanıb.

Deputatın sürücüsünün testi mənfi nəticə verib, deputatın özünün analizləri isə ləngiyib. Deputatın sözlərinə görə, analizinin müsbət nəticə verdiyi haqda o, yalnız epidemioloji laboratoriyanın mühafizəçisindən öyrənə bilib. Amma Qalustyan diaqnozu təsdiq edən heç bir rəsmi sənəd görməyib.

“Biz bu informasiyanı mütəxəssislərdən almışıq. Diaqnoz təsdiqlənib”, – parlamentin spikeri Valeri Kvarçiya bildirib.

İyulun 30-da Xalq Məclisində deputatların Abxaziya prezidenti Aslan Bjaniya ilə görüşü baş tutmalı idi. Amma Levon Qalustyanın xəstəliyi ilə əlaqədar olaraq görüş təxirə salınıb, bütün deputatlar isə testdən keçməyə gediblər.

Foto: go-abxazia.ru

Məqalədəki terminlər, toponimlər, fikir və ideyalar JAMnews, və ya ayrı-ayrı əməkdaşlarının fikir və ideyaları ilə üst-üstə düşməyə bilər. JAMnews məqaləyə yazılan təhqir, təhdid, zorakılığa çağırış kimi dəyərləndirilə bilən və ya başqa səbəbdən etik sayılmayan şərhləri silmək haqqını özündə saxlayır.