ABŞ İlham Əliyevin təyyarəsi üçün ehtiyat hissəsi ixracını dayandıra bilər
ABŞ Qubad İbadoğlunun azad edilməsi üçün Qanun layihəsi hazırlayır
ABŞ Konqresində ev dustaqlığında olan iqtisadçı Qubad İbadoğlunun azad olunması tələbi ilə İlham Əliyevin təyyarəsinə ehtiyat hissələrinin ixracını qadağan edən qanun layihəsi hazırlandığı deyilir.
Bu barədə Vaşinqtonda (ABŞ) yaşayan azərbaycanlı jurnalist Aleks Raufoğlu özünün sosial şəbəkə hesabında yazıb.
Onun yazdığına görə, “Azərbaycan təyyarə mühərriklərinin ixracına məhdudiyyətlər aktı” adlı qanun layihəsinin tələbi, Qubad İbadoğlu azad olunana qədər Prezident İlham Əliyevin təyyarəsinə ehtiyat hissələrinin ixracının qadağan edilməsidir.
Layihə ikipartiyalı qanunvericilər qrupu tərəfindən hazırlanıb.
Qanun layihəsi ABŞ Dövlət Katibi Marko Rubiodan qəti şəkildə istəyir ki, qüvvəyə minəndən sonra 30 gündən gec olmayaraq Konqresin müvafiq komitələrinə Qubad İbadoğlunun saxlanma vəziyyəti, ABŞ-nin onun azad edilməsi üçün diplomatik səyləri, Azərbaycanın sanksiyadan yayınma cəhdlərinə dair hesabat təqdim etsin.
Qanun qüvvəyə minəcəyi təqdirdə, hər hansı bir xarici şirkət, maliyyə institutu və ya hökumətin “GE90-110B1L” və ya “GE90-115B” mühərrik hissələrinin Azərbaycana ixracına yardım etdiyi aşkar edilərsə, ABŞ onlara sanksiyalar tətbiq edəcək. O cümlədən, pozuntu törədən qurumun iştirak etdiyi maliyyə əməliyyatlarını bloklanacaq və Qanunu pozan təşkilat üçün ABŞ-dən ixrac imtiyazlarını ləğv edəcək.
Xatırlatma
İqtisadçı Qubad İbadoğlu London İqtisadiyyat Məktəbinin keçmiş tədqiqatçısı və 2024-cü il, mayın 14-də fəaliyyətini dayandırmış Azərbaycan Demokratiya və Rifah Partiyasının (ADR) keçmiş sədridir.
- Qubad İbadoğlu partiyasının fəaliyyətini dayandırıb
- Qubad İbadoğlu ev dustaqlığına buraxılıb
- Qubad İbadoğlunun işi üzrə istintaq 13 ay davam edəcək
O, Azərbaycanda dövlət xərcləri, dövlət müəssisələrindəki korrupsiya hallarını ifşa etməklə də tanınır.
İqtisadçı 2023-cü il iyulun 23-də saxlanılıb.
Ona qarşı Cinayət Məcəlləsinin 204.3.1 maddəsi ilə ittiham irəli sürülüb.
İbadoğlu 2024-cü il aprelin 22-də ev dustaqlığına buraxılıb.
Ev dustaqlığına buraxıldıqdan sonra bu qətimkan tədbiri “polis nəzarətinə vermə” ilə əvəz olunub.
