Yeni parlament. Niyə də müvəqqəti istirahətə getməsin?
Ermənistan yeni parlamentini seçdi. Parlamentdə deputat sayı daha az: ötən çağırışda olan 131 deputatın əvəzində 105 olacaq. Məhz bu 105 deputat baş nazir, prezident, prokuror… bir sözlə, hamını seçəcək. Bunun üçün də onlara ən çox üç gün lazım olacaq. Bəs bundan sonra nəylə məşğul olacaqlar? Bizim hər sahədə o qədər qanunlarımız, onların da hər birinin o qədər əlavə və düzəlişləri var ki, çətin yenilərinə ehtiyac yaransın. Qanunlarımız ictimai həyatımızın bütün aspektlərini tənzimləyir.
Deyək ki, yol hərəkəti təhlükəsizliyi qaydalarına əsasən, heyvan qoşulan arabanı arxa hissəsinə iki qırmızı fara quraşdırılmayıb və tormoz taxılmayıbsa yollarda idarə etmək olmaz.
Yeni parlament istəsə də, bundan daha dəyərli qanunlar qəbul edə bilməz. Mən həqiqətən də narahatam ki, yeni seçilmiş deputatlarımız işsiz qala bilər. Bu da təhlükəlidir: yeni qanunlar və düzəlişlərin meydana çıxması mümkündür.
Deyək ki, başqa bir qanuna görə, ancaq 20 yaşına çatmış şəxs tramvay idarə edə bilər. Pis deyil, amma axı Ermənistanda tramvay yoxdur. Amma bu da deputatların günahı deyil ki: onlar altırəqəmli maaş və bonus alırlar, odur ki, əllərini sallayıb boş otura bilməzlər.
Foto: Lüsi Sarqsyan
Parlamentin saxlanması üçün lazım olan büdcədən isə heç danışmağa dəyməz. Təsəvvür etmək çətindir ki, 2017-ci ildə vergi ödəyicilərinin 4,5 milyard dram (9.3 milyon dollar) ödəyəcəkləri qurum birdən tənbəllik etməyə başlasın.
Amma çətin olsa da, gəlin bir düşünək. Tutaq ki, parlamentimiz birinci sessiya zamanı seçilməli olan vəzifələrlə bağlı bütün işləri bitirib. Belə olan halda 105 deputata boşuna əziyyət verməyə nə ehtiyac var? İclas zalını yayda soyutmağa, qışda qızdırmağa nə ehtiyac var? Boş maşınları ora-bura sürməyə nə ehtiyac var? Bu qurumu yenidən ona ehtiyac yaranana qədər bağlamaq daha məqsədəuyğun olardı.
Bircə təəssüf doğuran məqam var: bu dəfə xoşladığımız kimi birinci olmaq artıq bizdə alınmayacaq. Seneqal bizi qabaqlayıb. Həm də beş il əvvəl. Demə, bu Afrika ölkəsində vəsaitə qənaət etmək üçün 100 deputatlıq parlamenti buraxıblar. Və təsəvvür edin ki, ölkə bir gün ərzində duran yerdə 15 milyon qazanıb. Ədliyyə naziri Aminatu Ture bildirib ki, bu vəsaitlə yağış və selin gətirdiyi fəsadlar aradan qaldırılacaq, həm də sel zamanı həlak olan 13 nəfərin ailəsinə müavinətlər ödəniləcək. Bu uğurdan ilhamlanan seneqallılar artıq beş ildir ki, vitse-prezident vəzifəsindən də imtina ediblər.
Foto: Seneqalın Müstəqillik Meydanı və paytaxt Dakarda senatın binası, CBS
Biz tez-tez aşağı həyat səviyyəsi məsələsində özümüzü Afrika ölkələriylə müqayisə edirik. Onlardan öyrənmək zamanı da çatıb. Bizim Baqramyan küçəsində təxminən 4,5 milyard dramımız və Gümridəki zəlzələdən sonra 3080 müvəqqəti yaşayış yerimiz var. Anlamıram… Məgər bir neçə il ərzində köhnə qanunlarla keçinmək və nəhayət, bu məsələni həll etmək olmaz?
Yaxud əgər iş dayandığına görə, “Nairit”, “Ximprom” və Ermənistan hava yollarının yüzlərlə işçisini ixtisar edirlərsə, niyə parlamenti də istirahətə göndərmək olmasın? Ya da heç olmasa, parlamentin işsiz-gücsüz oturan üzvlərini.
Əminəm ki, həmin bu deputatların özləri də qəlblərinin dərinliklərində bu qərarın “lehinə” səs verərdilər, çünki özləri də qanunvericilik buxovlarını öz üzərilərindən atmağı arzulayırlar.
