Əli Kərimli böhtan ittihamı ilə cərimələnib
Azərbaycanda repressiyalar – Əli Kərimli
Bakıda müxalif Azərbaycan Xalq Cəbhəsi Partiyasının (AXCP) lideri Əli Kərimli böhtan ittihamı ilə məhkəmə tərəfindən cərimələnib. Müxalifətçi özü hesab edir ki, ona qarşı məhkəmə hökmü “hakimiyyətin fərqli düşünənlərə, o cümlədən də ona və rəhbərlik etdiyi partiyaya qarşı repressiya siyasətinin tərkib hissəsidir”.
- Gürcüstan prezidenti: “Etirazlar özünütəşkil səviyyəsində qalmalıdır”
- “Paşinyanın siyasi müqəddaratı Azərbaycanla münasibətlərdən asılıdır”. Bakıdan baxış
- Batan Rusiya, üzməyə çalışan azərbaycanlılar…
Bazar ertəsi, dekabrın 2-də Bakının Nəsimi rayon Məhkəməsində AXCP-nin keçmiş üzvü Aydın Əliyevin bu təşkilatın lideri Əli Kərimliyə qarşı iddiası üzrə proses başa çatıb.
Dövlət ittihamçısı son çıxışında Kərimlinin 6 ay azadlıqdan məhrumetmə cəzasına məhkum edilməsini tələb etmişdi. Müdafiə tərəfi bəraət isə hökmünün çıxarılmasına israr edirdi.
Məhkəmə Kərimlini CM-in 147.1-ci (böhtan) maddəsi ilə təqsirli bilərək, 1500 manat cərimə edib.
“Bu hökm əsassız, qanunsuz və ədalətsizdir. Əli Kərimlinin fikirlərində 147.1-ci maddənin əlaməti olmayıb. Onun fikirləri ümumi, qiymətləndirmə xarakteri daşıyırdı. Məhkəmə ümumiyyətlə işi icraata götürməməli idi”, – deyə vəkil Fəxrəddin Mehdiyev “Turan”a bildirib.
Onun sözlərinə görə, Avropa İnsan Hüquqları Məhkəməsinin Azərbaycanla bağlı presedent qərarları var və bənzər hallarda bu cür hökmlər ifadə azadlığına xələl gətirən hökmlər kimi dəyərləndirilib.
Müdafiə tərəfi apellyasiya şikayəti verəcək.
Kərimli özü məhkəmənin hökmünü hüquqla əlaqəsi olmayan “sifarişli qərar” adlandırıb.
“Azərbaycan hakimiyyəti bu uydurma işə 4 ay ərzində baxıb, lakin ölkə və dünya ictimaiyyəti onu ciddi qəbul etmir. Hamı başa düşüb ki, hakimiyyət sadəcə olaraq öz rəqibini absurd ittihamla həbs etməyə çalışır”, – deyə Kərimli bildirib.
“Mənim Aydın Əliyev haqqında fikrim həqiqətdir və heç bir şəkildə onun şərəf və ləyaqətini alçaltmır”, – deyə partiya sədri əlavə edib.
AXCP-nin keçmiş üzvü Aydın Əliyev Kərimlini Azərbaycan CM-in 147.1-ci (böhtan) maddəsi ilə məhkəməyə vermişdi. O, Kərimlinin məhkəmənin AXCP-nin qurultayının qərarını Aydın Əliyevin şikayətindən sonra ləğv etdiyi haqqında şərhini “böhtan” adlandırıb.
Kərimliyə qarşı onun aşağıdakı fikirləri ilə əlaqədar iddia irəli sürülüb:
“Partiyanın siyasi kursundan yayındığına və hakimiyyətlə əməkdaşlığa görə Azərbaycan Xalq Cəbhəsi Partiyasından xaric edilmiş Aydın Əliyev məhkəmənin qərarı ilə zorla Nəzarət-Təftiş Komissiyasının rəhbəri vəzifəsinə bərpa edilib. Partiyaya zorla bərpa edilmiş həmin şəxsin şikayəti əsasında 05.07.2024-cü il tarixində Nəsimi rayon Məhkəməsi 24.06.2023-cü il tarixli qurultayın 287 “lehinə”, bir “əleyhinə” səslə qəbul edilmiş qərarlarını etibarsız sayıb”.
Əli Kərimlinin işi üzrə prosesin keçirildiyi məhkəmənin binasına gedən yollar hüquq-mühafizə qüvvələri tərəfindən bağlanıb. Polis güc tətbiq edərək səkkiz AXCP fəalını saxlayıb.
Partiyanın sədr müavini Seymur Həzinin “Turan”a verdiyi məlumata görə, polis məhkəmə binası ətrafında geniş bir ərazini mühasirəyə alıb və yaxınlaşmağa çalışanları sıxışdırır.
Bir neçə saat sonra bütün saxlanılanlar sərbəst buraxılıb. Onlardan bəziləri polis əməkdaşları tərəfindən zorakılığa məruz qaldıqlarını bildiriblər.
