Իսպանիայում Վրաստանի դեսպանը դարձել է Համաշխարհային զբոսաշրջային կազմակերպության գլխավոր քարտուղար

Իսպանիայում Վրաստանի արտակարգ և լիազոր դեսպան Զուրաբ Պոլոլիկաշվիլին ընտրվել է Զբոսաշրջության համախարհային կազմակերպության գլխավոր քարտուղար: Մինչ այդ նա Վրաստանի մշտական ներկայացուցիչն էր այդ կազմակերպությունում:

Գլխավոր քարտուղարի պաշտոնը Պոլոլիկաշվիլին կզբաղեցնի մինչև 2021թ-ը: Գլխավոր քարտուղարի ընտրությունները կայացել են Մադրիդում Համաշխարհային զբոսաշրջային կազմակերպության գործադիր խորհրդի 105-րդ նստաշրջանի ժամանակ:

«Սա առաջին դեպքն է, երբ Վրաստանի ներկայացուցիչն ընտրվում է կարևոր միջազգային կազմակերպության ղեկավար պաշտոնում: Այդ փաստն ընդգծում է Վրաստանի դերն ու նրա ձգտումն իր ավանդը ներդնելու միջազգային կառավարման գործում: Զուրաբ Պոլոլիկաշվիլիի ընտրությունը Համաշխարհային զբոսաշրջային կազմակերպության գլխավոր քարտուղարի պաշտոնում նաև միջազգային հանրության կողմից այն բարեփոխումների աջակցության վկայությունն է, որոնք Վրաստանն իրականացրել է զբոսաշրջային ոլորտում, և նրա ձեռքբերումների ճանաչումը», — հայտարարել են Վրաստանի արտգործնախարարությունում:

Զուրաբ Պոլոլիկաշվիլին աշխատել է Միխայիլ Սահակաշվիլիի կառավարությունում 2005-2010թթ-ին սկզբում որպես արտաքին գործերի փոխնախարար, իսկ այնուհետև՝ որպես Իսպանիայում Վրաստանի դեսպան: 2009-2010թթ-ին նա եղել է Վրաստանի տնտեսական զարգացման նախարար: Մինչև 2012թ-ը Պոլոլիկաշվիլին աշխատել է որպես ТБС-բանկի խմբի փոխնախագահ, ինչպես նաև՝ որպես «Դինամո Թբիլիսի» ֆուտբոլային ակումբի գլխավոր տնօրեն: 2012թ-ին նա երկրորդ անգամ է նշանակվել Իսպանիայում Վրաստանի դեսպան: