Գլխավոր տեսչությունը ստուգում է ոստիկանների կողմից Բաթումիում ԼԳԲՏ ակտիվիստիներին ծեծի ենթարկելու հնարավոր փաստը

Վրաստանի ներքին գործերի նախարարության Գլխավոր տեսչությունը քննություն է սկսել  «Հանուն իրավահավասարության շարժման» գործադիր տնօրեն Լևան Բերիանիձեին և այդ կազմակերպության անդամ Թոռնիկե Քուսիանիին ձերբակալելու ժամանակ ոստիկանության աշխատակիցների կողմից հնարավոր ուժի կիրառման փաստի առնչությամբ: Այս մասին հայտնում է On.ge առցանց պարբերականը՝ վկայակոչելով գերատեսչությանը:

Ըստ ՆԳՆ-ի՝ սույն թվականի օգոստոսի 25-ի լուսադեմին Բաթումիի ծառուղում՝ «Սոհո» ակումբի մոտ, վեճ է ծագել երկու անհայտ ինքնության անձանց միջև: Բերիանիձեն և Քուսիանին չեն ենթարկվել դեպքի վայր ժամանած իրավապահ մարմինների աշխատակիցների պահանջին:

«Երկու քաղաքացի, որոնք առանձնանում էին հատուկ ագրեսիվ վարքով, չեն ենթարկվել հասարակական կարգը պահպանելու ոստիկանների օրինական պահանջին, դիմադրություն են ցույց տվել իրավապահներին»,- պնդում են ՆԳՆ-ում՝ ընդգծելով, որ հենց  այդ պատճառով էլ նշված անձիք ձերբակալվել են, իսկ ոստիկանական բաժանմունք տեղափոխվելուց հետո շարունակել են վիրավորել օրենքի ներկայացուցիչներին:

Ըստ ՆԳՆ-ի՝ Բերիանիձեն և Քուսիանին ալկոհոլի առկայության թեսթ են անցել, որը դրական է եղել:

Ձերբակալվածները հայտարարում են, որ Բաթումիի ծառուղում սկզբում իրենց ծեծի են ենթարկել անհայտ անձիք, իսկ հետո ոստիկանական բաժանմունքում իրավապահ մարմինների աշխատակիցները շարունակել են իրենց նկատմամբ ֆիզիկական բռնությունը և վիրավորանքները: Բերիանիձեն և Քուսիանին նաև փաստաբաններին ասել են, որ ՆԳՆ աշխատակիցները տեսել են՝ ինչպես են իրենց ծեծի ենթարկում, բայց ոչ մի գործողություն չեն ձեռնարկել: Ձերբակալվածների խոսքով՝ ոստիկաններն իրենց ծեծել են հոմոֆոբ մղումներից ելնելով:

«Երկուսն էլ պնդում են, որ ոստիկանական բաժանմունք տանելիս ոստիկաններն իրենց վիրավորել են հոմոֆոբ մղումներից ելնելով, ասել են, որ իրենց նմանները գոյություն ունենալու իրավունք չունեն:

Արդեն ոստիկանական բաժանմունքում նրանց ծեծի են ենթարկել ոստիկանները, վիրավորական արտահայտություններ են հնչեցրել, ստիպել են հանվել՝ իբր ստուգելու համար: Այդ ամենը՝ նրանց ստորացնելու նպատակով»,-  «Нетгазета-ի  հետ զրույցում ասել է փաստաբան Սալոմե Գոգոբերիձեն:

Նրա խոսքով՝ և՛ Բերիանիձեի, և՛ Քուսիանիի մարմնի վրա հայտնաբերվել են ծեծի հետքեր: Բերիանիձեի մոտ նկատվել է քթի արյունահոսություն, աչքի տակ կապտուկ, ձեռքերին՝ հարվածների հետքեր, ծնկների վրա՝ կապտուկներ: Թոռնիկե Քուսիանիի մոտ՝ աչքի տակ կապտուկ, նա բողոքում է կողոսկրի ցավից և մեջքին ստացած հարվածներից:

Փաստի առթիվ հարուցվել է քրեական գործ Վրաստանի Քրեական օրենսգրքի 126-րդ հոդվածով, որը ենթադրում է «բռնի գործողությունների կիրառում»: