Վրացի բժիշկը Ցխինվալի բանտում 1 տարի 9 ամիս կանցկացնի

Թբիլիսիում հայտնի բժիշկ-վնասվածքաբան Վաժա Գապրինդաշվիլին, որն արդեն կրել է երկամսյա պատիժը Ցխինվալի բանտում «սահմանի ապօրինի հատման» համար, դատապարտվել է 1 տարվա և 9 ամսվա ազատազրկման։ Այսպիսի որոշում է դեկտեմբերի 20-ին կայացրել Հարավային Օսիայի մայրաքաղաքի դե ֆակտո դատարանը։

Բժիշկ Վաժա Գապրինդաշվիլին մեղադրվում է Հարավային Օսիայի դե ֆակտո իշխանությունների կողմից այսպես կոչված պետական սահմանի դիտավորյալ խախտման համար։ Հարավային Օսիայի Պետական անվտանգության կոմիտեի հայտարարությունում ասվում է, որ Գապրինդաշվիլիի նկատմամբ «քննությունը վարվել է Ռուսաստանի Դաշնության Քրեական օրենքսգրքի 322-րդ հոդվածով», որը ենթադրում է սահմանի ապօրինի հատում։

Գապրինդաշվիլին իր մեղքը չի ճանաչել։ Նա ձերբակալվել է նոյեմբերի 9-ին հակամարտության գոտում՝ Օրչոսանի բնակավայրում։ Թբիլիսցի բժշկի ձերբակալման մանրամասները հայտնի չեն։ Ըստ առավել տարածված վարկածի՝ Վաժա Գապրինդաշվիլին հակամարտության գոտի է մեկնել հիվանդին օգնություն ցուցաբերելու համար։

Ձերբակալությունից հետո նրան մեկ հեռախոսազանգի իրավունք են տվել, և նա իր ընտանիքին հակիրճ հաղորդել է կատարվածը։ Հայտնի է նաև, որ այսպես կոչված պետական սահմանի մոտ Վաժա Գապրինդաշվիլիին ոչ ոք չէր սպասում։ Որպես կանոն, Վրաստանի կողմից Հարավային Օսիայի Ախալգորիի շրջան մտնելիս տեղացիներից որևէ մեկն անպայման դիմավորում է անցակետի մոտ։