Վրաստանում առևանգված 17-ամյա աղջկան 4 օր է՝ փնտրում են
Չորս օր է, ինչ ընտանիքը փնտրում է 17-ամյա աղջկան, որին հոկտեմբերի 12-ին առևանգել են տնից, ենթադրաբար, ամուսնանալու նպատակով:
Ընտանիքն ու ոստիկանությունը գիտեն առևանգողի անձը, սակայն մինչև հիմա չեն կարողացել գտնել նրան:
Սագարեջոյի շրջանի Լամբալո գյուղի բնակիչների 99%-ը, որտեղ տեղի է ունեցել առևանգումն, էթնիկ ադրբեջանցիներ են:
Վրաստանի ադրբեջանական համայնքում մինչ այսօր տարածված է ամուսնության նպատակով աղջիկ առևանգելը:
Կայքում կարդացեք նաև. Ֆոտոպատմություն. ինչո՞ւ են հեռավոր շրջանների և գյուղերի աղջիկները վաղ ամուսնանում
«Նեթգազեթի» վեբ-պորտալը զրուցել է առևանգված աղջկա ազգականի՝ Կազանֆար Մամեդովի հետ: Նրա խոսքով՝ աղջկա ընտանիքը ոչինչ չգիտի նրա ճակատագրի մասին:
«Մենք ուզում ենք, որ նրան ցույց տան, որ, առաջին հերթին, համոզվենք, որ նրա հետ ֆիզիկապես ամեն ինչ լավ է», — ասել է նա:
Կայքում կարդացեք նաև. «Ժողովուրդն՝ ընդդեմ աղջիկների». JAMnews-ը փորձել է պարզել, թե ինչու պետությունը չկարողացավ արմատախիլ անել աղջիկներին առևանգելու երևույթը
Աղջկան առևանգել են հոկտեմբերի 12-ին իր սեփական տնից: Առևանգումից առաջ նա վերադարձել է դպրոցից և ընթրել իր 12-ամյա քրոջ հետ: Առևանգողները ներխուժել են նրանց տուն, երբ երեխաների հայրը դուրս է եկել, և աղջկան առևանգել են կրտսեր քրոջ աչքի առաջ:
«Երեկոյան վեցի կողմերն էր, կամ վեցն անց քսան… Պարզվում է, նրան հետևելիս են եղել դրսից, և, երբ հայրը տնից դուրս է եկել և մի քիչ հեռացել, նրանք ներխուժել են տուն և առևանգել աղջկան: Այդ պահից նրանց ոչ ոք չի տեսել, և մենք չգիտենք [որտեղ է նա]: Ողջ գիշեր ոստիկանությունն էլ, մենք էլ փնտրել ենք, սակայն հետքն էլ չենք գտել», — ասում է Կազանֆար Մամեդովը:
Նրա խոսքով՝ աղջիկը չէր ճանաչում իրեն առևանգողին.
«Նա 17 տարեկան է, սովորում էր, [այդպիսի բան] չէր պլանավորում, և նրանք անձամբ ծանոթ չէին: [Նրան ուժով] են տարել, ճիչերով և բերանը փակելով», — ասում է Մամեդովը:
Կարդացեք նաև. «Պետությունը փաստացի վաճառում է աղջիկներին», — ասում են Վրաստանի քաղաքացիական ակտիվիստները
Մամեդովի խոսքով՝ առևանգված աղջկա ընտանիքն արդեն գիտի, թե ով է առևանգողը:
«Ընտանիքից, ընկերներից են իմացել… Գյուղում ականատեսներ կան, նրանք են ասել, թե ով է եղել ղեկին… Մենք չգիտենք, թե ինչ է կատարվում, որովհետև այն տղան, ում մասին ասում են, թե առևանգել է աղջկան ամուսնության նպատակով, մեկ այլ աղջկա հետ արդեն նշանված էր, նա հարսնացու ուներ…», — ասում է Մամեդովը:
ՆԳՆ-ում հայտարարում են, որ ոստիկանությունն ակտիվորեն որոնում է առևանգողներին: Քննությունը սկսվել է՝ քրեական օրենսգրքի 143-րդ հոդվածի համաձայն: Հանցագործությունը 2-4 տարվա ազատազրկմամբ է պատժվում:
___________________
• Յուրաքանչյուր տարի Վրաստանում մի քանի տասնյակ դպրոցական աղջիկների են առևանգում ամուսնության նպատակով:
• Վիճակագրություն. օմբուդսմենի 2016թ-ի հաշվետվությունում ասվում է, որ կրթության նախարարությունից ստացված տվյալների համաձայն՝ 2015թ-ին ընտանիք կազմելու նպատակով ուսումը դադարեցրել է 13-17 տարեկան 408 աշակերտ, իսկ 168 դեպքերում ուսումը դադարեցրել են 18 տարին լրացած աշակերտները: Սակայն նշվում է, որ այդ վիճակագրությունը սխալ է, և իրականում այդպիսի դեպքերն ավելի շատ են:
• Հատկապես ծանր է իրավիճակը շրջաններում, որտեղ հիկմնականում էթնիկ ադրբեջանցիներ են ապրում: Վաղ ամուսնություններն այնտեղ սովորական բան են, և, ինչպես նշում են տեղացիներն ադրբեջանական ավանդույթի մի մաս են:
• Վրաստանի ՔՕ 140-րդ հոդվածի համաձայն՝ պատժելի է չափահասի սեռական կապը 16 տարին չլրացած անձի հետ: Չնայած օրենսդրական փոփոխություններին՝ վաղ ամուսնությունները չեն դադարում:
• Առևանգված աղջիկներին հաճախ չեն աջակցում նրանց սեփական ընտանիքները, որոնք հետո նրանց հետ չեն ընդունում, քանի որ այդ աղջիկները «խայտառակված» են համարվում; աղջիկներին չի պաշտպանում պետություն, որը գործարքի մեջ է մտնում առևանգողների հետ, նրանցից երես են թեքում համայնքի մեծերը, ազգականներն ու հարևանները:
