Վրաստանի խորհրդարանը երրորդ ընթերցմամբ ընդունել է Վրաստանի քաղաքացիություն ստանալու ընթացակարգը բարելավելու և պարզեցնելու փոփոխությունները։ Փոփոխություններին աջակցել է 84 պատգամավոր։
Փոփոխությունների համաձայն՝ Վրաստանում կարգավիճակ ունեցող, բայց քաղաքացիություն չունեցող անձինք, ովքեր երկրում ապրել են հինգ և ավելի տարի, մյուս պայմաններին բավարարելու դեպքում հնարավորություն կունենան ստանալ վրացական անձնագիր։
Ի՞նչ է նշանակում «պարզեցում» տերմինը
Օրինագծի նախաձեռնողը Վրաստանի արդարադատության նախարարությունն է։ Նախարարության տարածած հաղորդագրության համաձայն՝ փոփոխությունների նպատակը «արտերկրում ապրող հայրենակիցների` հայրենիքի հետ սերտ կապերի պահպանման և զարգացման խթանումն է»։
Մասնավորապես`
● Վրաստանի քաղաքացիություն չունեցող անձը այն կարող է ստանալ սովորական եղանակով՝ Վրաստանում օրինական բնակվելով հինգ տարի, այլ ոչ թե 10, ինչպես նախկինում։
● Եթե Վրաստանի քաղաքացիության դիմումը մերժվում է, ապա նոր դիմում ներկայացնելու ժամկետը կրճատվել է՝ մեկ տարուց դառնալով վեց ամիս։
● Ուժի մեջ է մնում այն, որ վրացական քաղաքացիություն ստանալով հետաքրքրված անձը պետք է քննություններ հանձնի վրացերենից, Վրաստանի պատմությունից և իրավունքի հիմունքներից։
● Վրաստանի քաղաքացիություն ստանալ ցանկացողը պետք է նախքան Հանրային ծառայությունների զարգացման գործակալությունում դիմում ներկայացնելը թեստ հանձնի։ Եթե արդյունքները գոհացուցիչ չլինեն, գործակալությունը այլևս չի նախաձեռնի քաղաքացիության տրամադրման պաշտոնական ընթացակարգեր:
● Քննության հանձնումը ձախողելու պարագայում, ըստ նոր օրենքի, անձն իրավունք ունի այն վերահանձնել այնքան անգամ, որքան անհրաժեշտ է՝ առանց սահմանափակումների։ Քննությունը հաջողությամբ հանձնելու դեպքում արդյունքներն ուժի մեջ կմնան մեկ տարի:
Քաղաքացիությունը ենթադրում է իրավահարաբերություն անհատի և պետության միջև։
Այն քաղաքացուն տալիս է անձնական ազատության, արժանապատիվ կյանքի, կրթության, ընտրություններին մասնակցելու, նվազագույն եկամուտ ունենալու իրավունքներ։ Բայց միևնույն ժամանակ որոշակի պարտավորություններ է դնում, օրինակ՝ երկրի օրենքների պահպանում։
Վրաստանի քաղաքացիություն կարելի է ստանալ երկու եղանակով՝ ծննդյան բերումով և իր ցանկությամբ՝ նատուրալիզացիայով։
Ծննդյան բերումով ստանալն ակնհայտորեն ամենահեշտ ճանապարհն է: Անձը ծնված օրվանից համարվում է Վրաստանի քաղաքացի, եթե՝
ծնվել է Վրաստանում, և նրա ծնողներից առնվազն մեկը Վրաստանի քաղաքացի է,
ծնվել է Վրաստանում փոխնակ մայրության միջոցով, և նրա օրինական ծնողները նրան չեն ճանաչում որպես իրենց երկրի քաղաքացի,
ծնվել է Վրաստանի տարածքում, և նրա երկու ծնողներն էլ Վրաստանի քաղաքացիներ չեն (ծնողները պետք է պաշտոնապես դիմում ներկայացնեն երեխայի կարգավիճակի համար),
ծնվել է Վրաստանում, ծնողներից մեկը քաղաքացիություն չունի, իսկ մյուս ծնողի ինքնությունն անհայտ է։
Նատուրալիզացիայի միջոցով քաղաքացիություն տալը նշանակում է, որ պետությունն իր քաղաքացիությունը շնորհում է օտարերկրացուն կամ քաղաքացիություն չունեցող անձին: Նման անձն ինքը պետք է դիմի պետությանը, քաղաքացիություն ստանալը պետք է լինի նրա ցանկությունը։
Ի՞նչ է ասում վիճակագրությունը
Տեղեկատվության ազատության զարգացման ինստիտուտի տվյալներով՝ չորս տարիների ընթացքում՝ 2018-2022 թվականներին, Պետական ծառայությունների զարգացման գործակալությունը քաղաքացիության տրամադրման վերաբերյալ 13644 դրական և 7360 բացասական կարծիք է փոխանցել նախագահին։ Նախագահը հաստատել է 13575-ը, ինչը նշանակում է, որ բացասական որոշում է կայացրել 69 դիմողների վերաբերյալ։
Դրական եզրակացություն ստացածներից 5111-ը ստացել է քաղաքացիություն, իսկ 8464-ը՝ Վրաստանի քաղաքացիություն բացառության կարգով (այսպես կոչված՝ երկքաղաքացիություն)։
Ընդ որում, վերջիններիս 72 տոկոսը (ավելի քան վեց հազար մարդ) եղել են Ռուսաստանի քաղաքացիներ։
Արդարադատության նախարարի պարզաբանումը
Այս մասին կառավարության գրասենյակում կայացած ճեպազրույցում հայտարարել է արդարադատության նախարար Ռատի Բրեգաձեն.
«Մեր կողմից որոշեցինք, որ պետությունը պետք է անի ամեն հնարավորը, որպեսզի պարզեցվեն այդ ընթացակարգերը արտերկրում ապրող մեր հայրենակիցների համար, ովքեր որոշել են Վրաստանի քաղաքացիություն ստանալ։
Վրաստանի քաղաքացիություն ստանալ ցանկացողից կպահանջվի համապատասխան թեստ հանձնել նախքան Հանրային ծառայությունների զարգացման գործակալություն դիմում ներկայացնելը։ Եթե արդյունքը գոհացուցիչ չլինի, գործակալությունը այլևս չի նախաձեռնի քաղաքացիության տրամադրման պաշտոնական ընթացակարգեր, ինչի արդյունքում կխնայի ժամանակ և ռեսուրսներ:
Անհաջողության դեպքում անձը իրավունք կունենա վերահանձնել քննությունը առանց սահմանափակումների։ Եթե արդյունքը դրական է, ապա քննության արդյունքն ուժի մեջ կլինի մեկ տարի:
Բացի այդ, Վրաստանի քաղաքացիություն ստանալու դիմումի վերաբերյալ բացասական որոշման ընդունման դեպքում ընթացակարգը վերսկսելու ժամկետը կրճատվել է՝ մեկ տարուց դառնալով վեց ամիս»։
