145 հազար անձանց պարտքերը կներվեն. Կոբախիձեի նախընտրական խոստումները
Վրաստանի վարչապետի նախընտրական խոստումները
2024 թվականի հոկտեմբերին նախատեսված խորհրդարանական ընտրություններից մի քանի ամիս առաջ Վրաստանի կառավարությունը մտադիր է ամբողջությամբ ներել 145 հազար ֆիզիկական անձանց 590 միլիոն լարիի [մոտ 220 միլիոն դոլարի] հարկային պարտավորությունները, ինչպես նաև մեկնարկել լրացուցիչ չվերթներ դեպի Գերմանիա՝ Ֆուտբոլի Եվրոպայի առաջնություն:
Բացի այդ, երկրի նոր վարչապետ Իրակլի Կոբախիձեն հայտնել է, որ Թբիլիսիից ոչ հեռու՝ Վազիանի գյուղում կառուցվելու է նոր օդանավակայան։
Կոբախիձեն խոսել է նաև «օտարերկրյա գործակալների մասին» աղմկահարույց օրինագծի մասին, որը հանրության շրջանում ստացել է «ռուսական օրենք» անվանումը։ Հայտարարել է, որ թեև անցյալ տարի փորձը ձախողվեց, այս անգամ իշխանություններն անպայման կընդունեն այդ օրենքը։
Կոնկրետ ի՞նչ է ասել վարչապետը:
- Ո՞վ է Վրաստանի նոր վարչապետը. փաստեր Իրակլի Կոբախիձեի մասին
- «Վրացական երազանքը» միակ կեղծավոր կուսակցությունն է Եվրոպայում». վրացի քաղաքագետ
- «Պայքար է սպասվում». Վրաստանում նորից է շրջանառվում «օտարերկրյա գործակալների մասին» օրենքը
«Օտարերկրյա գործակալների մասին» օրենքի մասին
«Բնականաբար, ժողովրդավարական հասարակությունում թափանցիկությունն այլընտրանք չունի։ Ոչ ոք չի կարող բացատրել, թե ինչպես կարող է թափանցիկությունը վատ լինել:
Օրինագիծը սկզբից մինչև վերջ ճիշտ է: Միակ բանը, որ այն պահանջում է, հասարակական կազմակերպությունների և լրատվամիջոցների կողմից իրենց ֆինանսական միջոցների տարեկան հայտարարագրումն է։ Եվ մեզ փորձում են ապացուցել, որ թափանցիկությունը ռուսական ճանապարհն է, իսկ ոչ թափանցիկ լինելը՝ եվրոպական։
Անցյալ տարի նրանց հաջողվեց մոլորեցնել հասարակության մի զգալի մասին և գլխիվայր շուռ տալ արժեքները, բայց վստահ եմ, որ երկրորդ անգամ դա նրանց չի հաջողվի»։
Դեպի Գերմանիա լրացուցիչ չվերթների մասին
«Ինչպես գիտեք, հունիսի 18-ից Վրաստանի հավաքականը կսկսի մասնակցել Եվրոպայի առաջնության հանդիպումներին։ Ավիատոմսերի պահանջարկը շատ մեծ է, ինչից ավիաընկերություններն արդեն օգտվում են։ Սա է տնտեսագիտության օրենքը. պահանջարկն է որոշում առաջարկը: Ըստ այդմ՝ ավիատոմսերի գները բարձրացել են՝ որոշ դեպքերում նույնիսկ մի քանի անգամ։
Ես կցանկանայի խնդրել էկոնոմիկայի նախարարությանը աշխատանքներ մեկնարկել դեպի Դյուսելդորֆ և Համբուրգ լրացուցիչ ուղիղ չվերթներ ապահովելու ուղղությամբ։ Մեր քաղաքացիներին ֆիքսված ցածր արժեքով տոմսեր առաջարկելը կարևոր է»։
Պարտքերի ներման մասին
«Ամբողջությամբ կներվեն 145 հազար ֆիզիկական անձանց 590 մլն լարիի հարկային պարտավորությունները։
Վրաստանում կան բավականին մեծ թվով ֆիզիկական անձինք, ովքեր հարկային պարտավորություններ ունեն, և այդ պատճառով նրանք զրկված են տնտեսական գործունեություն ծավալելու հնարավորությունից, ուստի մենք որոշեցինք ներել այդ պարտքերը։
Մասնավորապես, ամբողջությամբ կներվեն բոլոր ֆիզիկական անձանց, այդ թվում՝ անհատ ձեռնարկատերերի՝ մինչև 2021 թվականի հունվարի 1-ը գոյացած և չվճարված պարտքերը, ներառյալ դրանց վրա գոյացած հարկերը։
Ըստ այդմ, մեր 145 հազար քաղաքացիներ հնարավորություն կունենան ակտիվորեն մասնակցել երկրի տնտեսական կյանքին, ինչը, բնականաբար, կնպաստի տնտեսության զարգացմանը»։
Սա առաջին դեպքը չէ, երբ ընտրություններից առաջ պարտքեր են ներվում։ 2018 թ․-ին՝ նախագահական ընտրությունների նախաշեմին, այն ժամանակվա վարչապետը խոսել էր կառավարության նոր նախաձեռնության մասին և հայտարարել, որ, այսպես կոչված, բանկային «սև ցուցակից» 600 հազար վարկառուներ են դուրս բերվելու։
Նոր օդանավակայանի մասին
«Մի քանի տարի հետո մենք կունենանք գերժամանակակից միջազգային օդանավակայան։
Երեկ տեղի է ունեցել տնտեսական խորհրդի նիստ, որի ընթացքում մենք կայացրել ենք այս մեգանախագծի իրականացման վերաբերյալ կարևորագույն որոշումը։
Այսօրվա օդանավակայանի թողունակությունը կազմում է մոտ 4-4,5 միլիոն ուղևոր։ Գիտեք, որ զբոսաշրջության ոլորտում ունենք շատ դրական դինամիկա, ապագայում սպասվում է այցելուների թվի արագ և հետևողական աճ, ինչին պետք է օժանդակեն ենթակառուցվածքները։
Մենք քննարկել ենք երկու այլընտրանքային տարբերակ, որոնցից մեկը վերաբերում էր գործող օդանավակայանի ընդլայնմանը, մյուսը՝ Վազիանիում նոր օդանավակայանի կառուցմանը։
Ընդլայնումը կարժենար մոտ 900 մլն դոլար, իսկ նորի կառուցումը՝ մոտ 1 մլրդ 260 մլն դոլար։
Միևնույն ժամանակ, ընդլայնումը թույլ կտար ավելացնել ուղևորահոսքը՝ այն հասցնելով մինչև առավելագույնը 15 միլիոն ուղևորի, զարգացման հեռանկարներ չկային։ Իսկ նոր օդանավակայանի կառուցումը թույլ է տալու ուղևորահոսքը հասցնել մինչև 19 միլիոնի՝ հետագա ընդլայնման հեռանկարով։
Հաշվի առնելով մի շարք գործոններ՝ մենք ի վերջո որոշեցինք կառուցել նոր օդանավակայան»։
Վազիանիի օդանավակայանի կառուցման մասին մեկ տարի առաջ առաջին անգամ հայտարարել էր այն ժամանակվա վարչապետ Իրակլի Ղարիբաշվիլին։ Նրա խոսքով՝ կառավարությունն ուզում է, որ Վրաստանը դառնա «տարածաշրջանի ավիացիոն հանգույցը», և հենց այդ նպատակով է նոր օդանավակայանի կառուցման համար ընտրվել Վազիանիի ռազմական օդակայանի տարածքը։
