Ինչո՞ւ ԱՄՆ-ն չի արձագանքում գործընկերությունը վերականգնելու առաջարկին․ Կոբախիձեն՝ Թրամփին
Վրաստանի վարչապետ Կոբախիձեի նամակը Թրամփին
«Վրացական երազանք» կուսակցության ներկայացուցիչ, վարչապետ Իրակլի Կոբախիձեն բաց նամակ է հղել ԱՄՆ նախագահ Դոնալդ Թրամփին և փոխնախագահ Ջեյ Դի Վենսին՝ արտահայտելով իր զարմանքն առ այն, որ Վրաստանի և ԱՄՆ կառավարությունների միջև ամենաբարձր մակարդակով որևէ շփում չի եղել։
Նամակում նաև նշվում է, որ «անհասկանալի» է, թե ինչու են շարունակում ուժի մեջ մնալ ԱՄՆ պատժամիջոցները վրացական կառավարության այն պաշտոնյաների նկատմամբ, ովքեր «փաստացի ճնշել են «USAID-ի կողմից ծրագրված և ֆինանսավորված հեղափոխության փորձը» և դիմադրել Բայդենի վարչակազմի բռնությանը»։
Կոբախիձեի խոսքով՝ վերջին քաղաքական իրադարձությունները վրացական հասարակության մեջ առաջ են բերել այն զգացողությունը, որ «խորքային պետության» նկատմամբ հաղթանակի մասին Թրամփի հայտարարությունները ոչ այլ ինչ են, քան վերաբրենդավորման փորձ։
Կոբախիձեի նամակը Թրամփին․ ամբողջական տեքստը
«Մի քանի շաբաթ առաջ մենք ձեզ գրեցինք վրաց-ամերիկյան հարաբերությունների մասին։ Այդ նամակին նախորդել էին իմ հրապարակային հայտարարությունները, որոնցում ես բացահայտ արտահայտել էի Վրաստանի պատրաստակամությունը վերսկսել Վրաստանի և Միացյալ Նահանգների միջև ռազմավարական գործընկերությունը՝ մաքուր էջից և կոնկրետ ճանապարհային քարտեզով։ Սակայն մինչ օրս մենք պատասխան չենք ստացել մեր նամակին և հրապարակային հայտարարություններին։ Ավելին, Վրաստանի և ԱՄՆ կառավարությունների միջև բարձր մակարդակի շփում չի եղել։
Այս լռությունը զարմացնում է վրաց ժողովրդին և վրացական կառավարությանը մի քանի պատճառներով։
Նախևառաջ, Վրաստանը տարիներ շարունակ եղել է Միացյալ Նահանգների ամենահուսալի գործընկերը ԱՄՆ համար ռազմավարական նշանակություն ունեցող շատ դժվարին տարածաշրջանում։ Վրաստանը աջակցել է Միացյալ Նահանգներին ամենաթեժ կետերից մի քանիսում, այդ թվում՝ Իրաքում և Աֆղանստանում, որտեղ Վրաստանն ուներ մեկ շնչի հաշվով ամենաբարձր զորքերի մակարդակը։ Միայն այս երկու առաքելություններին մասնակցելով՝ մեր փոքրիկ երկիրը ԱՄՆ-ի համար խնայեց 2.5 միլիարդ դոլար, ինչը մի քանի անգամ գերազանցում է ԱՄՆ բյուջեից Վրաստանին տրամադրված իրական (!) օգնությունը (իրական օգնությունը չի ներառում ԱՄՆ բյուջեից նախկին նախագահ Միխեիլ Սաակաշվիլիի ռեժիմը փրկելու համար հատկացված միջոցները 2008-11 թվականներին՝ այն բանից հետո, երբ Սաակաշվիլին «խորքային պետության» հրամանով պատերազմ սկսեց Ռուսաստանի հետ):
Իրական օգնությունը չի ներառում նաև ԱՄՆ դեսպանատան, USAID-ի, NED-ի, Սորոսի հիմնադրամի և այլ խողովակներով Վրաստանում արմատականություն և ատելություն հրահրելու, հեղափոխություններ կազմակերպելու, Վրաց ուղղափառ եկեղեցու հեղինակությունը վարկաբեկելու, կրոնական ծայրահեղականությունը խրախուսելու, պետական ինստիտուտները թուլացնելու, գենդերային և ԼԳԲՏ քարոզչության և այլ նմանատիպ նպատակներով հատկացված միջոցները։ Հաշվի առնելով, որ Վրաստանը տարիներ շարունակ եղել է Միացյալ Նահանգների իսկական ռազմավարական գործընկերը և շարունակում է արտահայտել իր պատրաստակամությունը վերականգնելու այդ ռազմավարական գործընկերությունը, նոր վարչակազմի լռությունը զարմացնում է թե՛ Վրաստանի կառավարությանը, թե՛ վրաց ժողովրդին։
Միջազգային վարկանիշների համաձայն՝ Վրաստանը տարածաշրջանում առաջատար է ժողովրդավարության, օրենքի գերակայության, մարդու իրավունքների, լրատվամիջոցների ազատության, դատական համակարգի անկախության, պետական ինստիտուտների ամրության, կոռուպցիայի ցածր մակարդակի և այլ չափանիշների առումով։ Վրաստանի առաջատար լինելը հաստատում են նաև այն կառույցները, որոնց հանդեպ ձեր վարչակազմը հատուկ վստահություն է տածում։ Հաշվի առնելով այս ամենը և այն փաստը, որ ակտիվորեն երկխոսում եք և հաղորդակցության մեջ եք մի շարք ակնհայտորեն ոչ ժողովրդավար և ավտորիտար պետությունների հետ, Վրաստանի հանդեպ ձեր ցուցաբերած լռությունը մեզ համար որևէ տրամաբանական բացատրություն չունի։
Հատկապես կարևոր է, որ եթե նայենք մեր կառավարության և ձեր վարչակազմի հրապարակային հռետորաբանությանը, կտեսնենք արժեքների և գաղափարախոսության լիակատար համընկնում։ Մենք տարիներ շարունակ բացահայտ խոսում էինք «խորքային պետության», USAID-ի, NED-ի և այլ համապատասխան կազմակերպությունների հանցավոր գործունեության մասին, նախքան դուք նույնաբովանդակ հայտարարություններ կանեիք։
Մենք ունենք բացարձակապես նույնական գնահատականներ Ուկրաինայում պատերազմի, գենդերային և ԼԳԲՏ քարոզչության և շատ այլ հարցերի վերաբերյալ։ Նման արժեքային և գաղափարախոսական մերձեցման ֆոնին վրաց ժողովուրդը սպասում էր, որ Վրաստանը կդառնա առաջին երկրներից մեկը, որի նկատմամբ ձեր վարչակազմը կցուցաբերի հատուկ հետաքրքրություն։ Դուք նման հետաքրքրություն եք ցուցաբերել Ռումինիայի և Գերմանիայի նկատմամբ, որտեղ ոչ ժողովրդավարական գործողություններ են իրականացվել եվրոպական բյուրոկրատիայի աջակցությամբ։ Սակայն ի զարմանս վրաց ժողովրդի և մեզ, դուք դեռևս նման ուշադրություն չեք ցուցաբերել Վրաստանի նկատմամբ։
Ավելին, դեռևս գործում են բացարձակապես անհասկանալի պատժամիջոցներ Վրաստանի փոխվարչապետի և կառավարության այլ պաշտոնյաների նկատմամբ, ովքեր փաստացի կանխել են Բայդենի վարչակազմի կողմից պլանավորված և USAID-ի կողմից ֆինանսավորվող հեղափոխության և բռնության փորձը։ Բացի այդ, մի քանի օր առաջ ԱՄՆ Կոնգրեսն ընդունեց աբսուրդային օրենք, այսպես կոչված, «MEGOBARI ակտը», որը լի է վրաց ժողովրդի և նրա ընտրված կառավարության նկատմամբ թշնամանքով։
Հաշվի առնելով «ընկեր» բառի իմաստը (megobari վրացերեն նշանակում է «ընկեր»– JAMNews), այս օրենքը մեզ հիշեցնում է Ջորջ Օրուելի մոդելը, որի համաձայն՝ պատերազմը խաղաղություն է, իսկ թշնամին՝ բարեկամ։ Վերջին ժամանակներում մենք ընտելացել ենք տարբեր երկրների խորհրդարանների կողմից աբսուրդային ակտերի ընդունմանը, ուստի ուշադրություն չէինք դարձնի «MEGOBARI ակտին», եթե շատերը այն չվերագրեին ձեր վարչակազմին։ Այս ընկալումն ամրապնդվում է այն փաստով, որ ձեր վարչակազմը որևէ քննադատական հայտարարություն չի արել ակտի վերաբերյալ։ Հաշվի առնելով վերոնշյալը՝ MEGOBARI օրենքը խաթարում է վրաց ժողովրդի վստահությունը ոչ միայն Կոնգրեսի, այլև ձեր վարչակազմի նկատմամբ, որի հետ վրաց հանրությունը բոլորովին այլ հույսեր էր կապում։
Վերջին իրադարձությունները վրացական հասարակության մեջ առաջ են բերել զգացողություն, որ [Թրամփի] հայտարարությունները «խորքային պետության» նկատմամբ հաղթանակի մասին պարզապես վերջինիս վերաբրենդավորման փորձ են և ոչինչ ավելին։ Մարդիկ զարմացած են, որ դուք այդքան քննադատաբար եք մոտենում Բայդենի որոշումներին, բայց դեռ չեք ուղղել դրանք։ Այնուամենայնիվ, մեր կառավարությունը շարունակում է հրապարակավ լավատեսություն և հույս հայտնել, որ ձեր վարչակազմը իսկապես կկարողանա հաղթել «խորքային պետությանը», ինչը, անկասկած, կազդի վրաց-ամերիկյան հարաբերությունների վերագործարկման և ռազմավարական գործընկերության վերականգնման վրա։ Եթե դա տեղի չունենա, Բայդենի վարչակազմի կողմից մշակված սցենարը կշարունակվի։
Հիշեցնում ենք, որ Թբիլիսիի կենտրոնական պողոտայում ամեն օր շարունակում են հավաքվել USAID-ի և NED-ի կողմից կրթված և ֆինանսավորված մինչև 250 անձինք, ինչը անհերքելի ապացույց է այն բանի, որ Վրաստանում հեղափոխություն իրականացնելու «խորքային պետության» ծրագիրը դեռևս չի հետաձգվել։
Ինչպես արդեն նշեցինք, չնայած մենք դեռ շատ հարցեր ունենք, առաջվա նման պահպանում ենք լավատեսությունն ու հույս ունենք, որ «խորքային պետությանը» ձեր դիմադրությունը կլինի անկեղծ և կավարտվի դրա պարտությամբ։ Վրաստանի կառավարությունը համբերատար սպասում է այդ պահին, որը պետք է ծառայի որպես վրաց-ամերիկյան հարաբերությունների վերագործարկման և մեր երկրների միջև ռազմավարական գործընկերության վերականգնման հիմք։ Հաջողություն այդ պայքարում։
Ամերիկայի Միացյալ Նահանգներին մաղթում ենք ուժ և բարգավաճում։
Վրաստանի վարչապետ Կոբախիձեի նամակը Թրամփին
