Վրաստանի Սվանեթի շրջանում ափերից դուրս է եկել Նենսկրա գետը: Ջուրը տանում է ծառերն ու քարերը
Բարձրադիր Սվանեթի շրջանի Չուբերի գյուղի մերձակայքում սողանքի պատճառով ափերից դուրս է եկել Նենսկրա գետը:
Գյուղի բնակիչները սոցցանցերում տեսանյութեր են տարածում, որոնցում երևում է, որ վարար գետը քշում-տանում է քարեր և արմատախիլ արված ծառեր:
Արտակարգ իրավիճակների ծառայությունում հայտարարում են, որ գետը մի քանի կամուրջ է ավերել: Հեղեղված է գետին հարող տարածքը:
Դեռևս ոչինչ հայտնի չէ վիրավորների կամ տուժածների մասին:
Ինչպես «Ինտերպրեսնյուս» գործակալությանը հաղորդել են արտակարգ իրավիճակների ծառայությունում, փրկարարները մոբիլիզացվել են և փորձում են հասնել աղետի վայր:
https://www.facebook.com/livepressge/videos/1977290622323217/
Տեղացիներից մեկն Ազատություն ռադիոկայանին հաղորդել է, որ սահմանապահները սողանքի մասին հաղորդել են գյուղապետարանին, որն էլ խնդրել է տեղացիների մի մասին լքել իրենց տները:
• Արդեն երկար տարիներ քննարկում է ընթանում Նենսկրա գետի վրա Վրաստանում ամենախոշոր հիդրոէլեկտրակայանի շինարարության թեմայի շուրջ: Կայանի նախագիծն արդեն պատրաստ է: Կառավարությունը «կանաչ լույս» է վառել 280 մեգավատ հզորությամբ հիդրոէլեկտրակայանի շինարարության համար 2015թ-ին: Շինարարությունը պետք է սկսվեր 2017թ-ին, սակայն տեղացիներն ու ակտիվիստ-բնապահպանները հայտարարում են, որ այդ շինարարությունը բնապահպանական աղետի կհանգեցնի:
