Վրաստանի դատախազությունը հետաքննում է «բարձրաստիճան հոգևորականի» դեմ կատարված մահափորձը

«Բարձրաստիճան հոգևորականի» հանդեպ մահափորձ կատարելու մեղադրանքով ձերբակալվել է Պատրիարքարանի գույքի կառավարման ծառայության ղեկավար, ավագ երեց Գեորգի Մամալաձեն: Այդ մասին հայտարարել է Վրաստանի գլխավոր դատախազ Իրակլի Շոթաձեն փետրվարի 13-ին կայացած հատուկ մամուլի ասուլիսին:

Նա նշել է, որ հայր Գեորգի Մամալաձեն ձերբակալվել է փետրվարի 10-ին Թբիլիսիի օդանավակայանում Բեռլին ուղևորվելիս: Խուզարկության ընթացքում նրա մոտ թունավոր նյութ՝ ցիանիդ, է հայտնաբերվել: Բացի այդ, նրա տանը հրազեն և 6 գնդակ է հայտնաբերվել:

Ինչպես հայտարարում է դատախազությունը, Մամալաձեի վրա դուրս գալ քննիչներին օգնել է մի մարդ, որը հայտարարել է, որ ավագ երեցը խնդրել է իրեն ցիանիդ գտնել՝ խոստանալով վճարել:

Մամալաձեի դեմ գործ է հարուցվել մահափորձի հոդվածով, որը 7-15 տարվա ազատազրկում է ենթադրում:

Դատախազությունում հայտարարում են, որ ավագ երեցը տվյալ պահին իր մեղքը չի ընդունում:

Փետրվարի 12-ի երեկոյան «Ռուսթավի-2» հեռուստաընկերությունը տեղեկատվություն է տարածել, որ Գեորգի Մամալաձեի ձերբակալությունը կապված է Վրաց ուղղափառ եկեղեցու պատրիարք Իլյա Երկրորդին թունավորելու փորձի հետ:

Վրաց եկեղեցու ղեկավարը փետրվարի 2-ից Բեռլինի Helios Berlin bux կլինիկայում է գտնվում, որտեղ այսօր վիրահատել են նրա լեղապարկը: Ինչպես հայտարարել են բժիշկները վրացական լրատվամիջոցներին տված հարցազրույցում, վիրահատությունը հաջող է անցել, և 84-ամյա պատրիարքն իրեն բավարար է զգում: