Վարչապետ Սերժ Սարգսյանի հանդիպումը նրա հրաժարականը պահանջող ընդդիմադրի հետ ավարտվեց ոչնչով
20:10, սպրիլի 22
Շարժմանը միացած անձինք գտնվում են Երևանի գլխավոր հրապարակում: Հարթակում նոր հռետորներ են հայտնվել, քանի որ շարժման առաջնորդ Նիկոլ Փաշինյանն ու նրա համախոհները, որոնցից երկուսը նույնպես խորհրդարանի պատգամավորներ են «Ելք» խմբակցությունից, ձերբակալված են: Շարժումը գործնականում գլխատվել է: Բազմահազարանոց ցույցի մասնակիցները պահանջում են ձերբակալվածներին ազատ արձակել և մտադիր են շարունակել անհնազանդության ակցիաները:
Ի նշան խաղաղ բողոքի շարունակման՝ հրապարակում աղավնիներ են բաց թողնվել երկինք:
Այսօր՝ ամբողջ օրվա ընթացքում, վարչապետ Սերժ Սարգսյանի և շարժման առաջնորդ Նիկոլ Փաշինյանի ձախողված բանակցություններից հետո, բողոքի ակցիաները շարունակվել են ամբողջ մայրաքաղաքով:
Հայաստանի նախագահ Արմեն Սարգսյանը, որն ապրիլի 21-ին հանդես էր եկել որպես վարչապետի և նրա հրաժարականը պահանջող ընդդիմադրի միջև հանդիպման միջնորդ, հայտարարությամբ է հանդես եկել: Նա կարծում է, որ դեպքերի զարգացումը հասել է վտանգավոր սահմանագծի, և անհրաժեշտ է կանխել անդառնալի հետևանքները: Նրա հայտարարությունում ասված է նաև.
«Ցավոք սրտի, հակառակ նախօրոք ձեռք բերված պայմանավորվածության, բանակցություններն ընդհատվեցին, այն դեպքում, երբ դրանք կարող էին հանգեցնել իրավիճակի լիցքաթափման եւ լարվածության թուլացման: Կոչ եմ անում մեր բոլոր քաղաքացիներին, սփյուռքի մեր հայրենակիցներին զերծ մնալ իրավիճակը լարելու փորձերից և դրսևորել զսպվածություն»:
Ոստիկանությունը հաղորդագրություն է տարածել այն մասին, որ վերահսկում է իրավիճակն ու «Հայաստանի սահմանադրական կարգին սպառնացող ցանկացած ոտնձգություն կանխելու և խափանելու նպատակով լիարժեք օգտագործելու է իրավաչափ պետական հարկադրանքի իր ողջ գործիքակազմը»:
Եվրամիությունը ներքաղաքական ճգնաժամի կարգավորման նպատակով քաղաքական երկխոսության կոչ է արել: Եվրոպական դիվանագիտության ղեկավարի պաշտոնական ներկայացուցիչ Մայա Կոսյանչիչի հայտարարությունում ասվում է.
«Եվրամիությունն ակնկալում է, որ Հայաստանի իշխանություններն ամբողջությամբ կհարգեն այդ իրավունքն, արդար և համաչափ կկիրառեն օրենքը՝ Հայաստանի միջազգային պարտավորությունների համապատասխան, այդ թվում՝ Մարդու իրավունքների և հիմնական ազատությունների եվրոպական կոնվենցիայի շրջանակում: Բոլոր նրանք, ովքեր ձերբակալվել են օրենքի համաձայն հավաքների անցկացման իրենց հիմնարար իրավունքի իրացման ժամանակ, պետք է անհապաղ ազատ արձակվեն»:
12:00 — 18:05, սապրիլի 22
Ընդդիմադիր պատգամավոր Նիկոլ Փաշինյանը ձերբակալվել է, նրա գտնվելու վայրը հայտնի չէ: Քաղաքացիական պայքարը շարունակվում է: Հազարավոր ցուցարարներ շարժվում են դեպի Հանրապետության հրապարակ, որտեղ, ինչպես նախապես հայտարարվել էր հենց անհնազանդության շարժման ղեկավար Փաշինյանի կոցմից, տեղի կունենա հերթական հավաքը:
11:00, սապրիլի 22
Հինգ րոպեից կարճ է տևել ընդդիմադիր պատգամավոր Նիկոլ Փաշինյանի հանդիպումը վարչապետ Սերժ Սարգսյանի հետ: Ինչպես երեկ երեկոյան հայտարարել է ընդդիմադիրը, հանդիպման օրակարգում վարչապետի հրաժարականն է: Սակայն բանակցությունները ձախողվեցին: Դրանք փաստացի չկայացան: Կողմերից յուրաքանչյուրն ընդամենն իր տեսանկյունը հայտնեց լրագրողների ներկայությամբ:
Սերժ Սարգսյանը սկզբում հայտարարեց.
«Ուրախ ենք, որ արձագանքեցիք խոսելու իմ բազմաթիվ կոչերին: Թեև ես լավ չեմ պատկերացնում, թե տասնյակ լրագրողների ներկայությամբ ինչքան կարող ենք բանակցել, այդուհանդերձ ուրախ եմ»:
Փաշինյանն անմիջապես հակադարձեց, թե ինքը չի եկել երկխոսելու, այլ եկել է քննարկելու Սերժ Սրգսյանի հրաժարականի պայմանները և իշխանության խաղաղ, անցնցում փոխանցման պայմանները:
«Սա բանակցություն չէ, սա երկխոսություն չէ: Սա փաստացի ուլտիմատում է, շանտաժ՝ պետությանը, օրինական իշխանություններին: Դուք չեք գիտակցում պատասխանատվության աստիճանը, դուք դասեր չեք քաղել Մարտի 1-ից», — հայտարարել է վարչապետը:
2008թ-ի մարտի 1-ին նախագահական ընտրությունների արդյունքների դեմ ցուցարարների հավաքը ցրելու ժամանակ 10 մարդ է զոհվել: Այն ժամանակ ընտրվել էր Սերժ Սարգսյանը: Նրա հիմնական հակառակորդը Լևոն Տեր-Պետրոսյանն էր, որի կողմնակիցները վստահ էին, որ հաղթել է իրենց թեկնածուն, և չէին ճանաչում ընտրությունների արդյունքները:
Սերժ Սարգսյանի վերջին խոսքերը հետևյալն էին.
«եթե պետք է խոսել այդ տոնով, ապա ինձ մնում է միայն ևս մեկ անգամ խորհուրդ տալ, որ գաք օրինական դաշտ և ընդհանրապես տրամաբանական գործողությունների սահման: Հակառակ պարագայում ողջ պատասխանատվությունը ձեր վրա է»:
Փաշինյանը պատասխանել է, որ իրավիճակը Հայաստանում փոխվել է, իշխանությունն անցել է ժողովրդի ձեռքը:
Սերժ Սարգսյանը հիշեցրել է ընդդիմադրին, թե ժողովրդի անունից 7-8% ձայն հավաքած խմբակցությունն իրավունք չունի խոսելու.
«Ես այլևս ցանկություն չունեմ ձեզ հետ շարունակելու խոսակցությունը: Եթե դուք պետության օրինական պահանջը չեք ընդունում, ցտեսություն: Պարոնայք լրագրողներ, դուք ինքներդ կարող եք հետևություն անել»:
Այս խոսքերից հետո վարչապետը հեռացել է «Մարիոթ» հյուրանոցից:
Ընդդիմադիր պատգամավորը հայտարարել է, որ Սարգսյանն ադեկվատ չէ, չի տիրապետում իրավիճակին, նա կոչ է արել շարունակել անհնազանդության ակցիաները ավելի մեծ թափով:
Նիկոլ Փաշինյանի և Սերժ Սարգսյանի հանդիպումը Երևանի Մարիոթ հյուրանոցում
Posted by Ջեմնյուզ — JAMnews Armenian on შაბათი, 21 აპრილი, 2018
