Լուսարձակներ, սեր և Նավալնի․ ֆոտոռեպորտաժ Ռուսաստանում անցկացված ակցիայից
«Սերը վախից ուժեղ է»․ այսպիսի կարգախոսով ողջ Ռուսաստանի տարածքում ֆլեշմոբ-ակցիա է անցկացվել՝ ի աջակցություն ընդդիմության կալանավորված առաջնորդ Ալեքսեյ Նավալնիի։ Ակցիայի մասնակիցները փողոց էին դուրս գալիս և լուսարձակներ միացնում։ Իշխանություններն ամեն կերպ փորձում էին թույլ չտալ այդ ակցիան անցկացնել։
Ինչպես ավելի վաղ բացատրել էին ակցիայի կազմակերպիչները, դրա իմաստը կալանավորված քաղաքական գործչին աջակցություն, ինչպես նաև՝ միմյանց համերաշխություն ցուցադրելն է՝ սեփական բակում կամ փողոցում համախոհների հանդիպելով։
Ըստ ռուսական լրատվամիջոցների՝ կիրակի օրը Ռուսաստանի տարբեր քաղաքներում Նավալնիին աջակցելու ցույցերում 12 մարդ է բերման ենթարկվել:
Մարդիկ լուսանկարներ էին տեղադրում սոցցանցերում։ #ՍերըՎախիցՈւժեղԷ թեգով Թվիթերում ավելի քան 8000 հաղորդագրություն է գրվել։ Ոմանք գրում էին, որ ակցիային մասնակցել են միայնակ և համախոհների չեն հանդիպել։ Բայց այդ մասին չեն ափսոսում։
Ռուսական ընդդիմության առաջնորդ Ալեքսեյ Նավալնին կալանավորվել է հունվարի 18-ին, օդանավակայանում՝ Գերմանիայից վերադառնալուն պես։ Նա այնտեղ բուժվում էր «Նովիչոկ»-ով թոնավորվելուց հետո։ Իր նկատմամբ մահափորձի համար նա մեղադրել է Ռուսաստանի իշխանություններին։
Ավելի ուշ դատարանը փոխել է քրեական գործերից մեկով պայմանական ազատազրկումն իրականով և նրան դատապարտել 2 տարի և 8 ամիս ժամկետով ազատազրկման։
Քաղաքական գործչին ազատ արձակելու զանգվածային ակցիաներ են անցկացվել ողջ Ռուսաստանում հունվարի 23-ին և 31-ին։ Իշխանությունները ցույցերին պատասխանել են կալանքով և բռնաճնշումներով։
Սիրո պարտադրանք
Ակցիային նախորդած օրերին ռուսական բոլոր պետական կառույցներն ակտիվորեն փորձում էին խանգարել դրա անցկացմանը։
Ռուսաստանի Գլխավոր դատախազությունը, Քննչական կոմիտեն և ՆԳՆ-ն զգուշացումով էին հանդես եկել «ապօրինի ակցիաներին» մասնակցության համար պատասխանատվության մասին։ Իսկ Ռոսկոմնադզորը՝ կոմունիկացիաների կարգավորման մարմինը, առցանց պարբերականներից պահանջել էր հեռացնել փետրվարի 14-ի լուսարձակներով ակցիայի մասին հայտարարությունները։ Անկախ պարբերականներից որոշները ստիպված էին ենթարկվել՝ արգելափակման սպառնալիքի պատճառով։
Ակցիայի մասին նյութի պատճառով Ռոսկոմնադզորը Ռուսաստանի տարածքում արգելափակել էր «Սպեկտր» պարբերականի կայքը, որը տեղակայված է Լատվիայում։
Սոցցանցերի խմբերի միջոցով նույնպես նախազգուշացումներ էին ուղարկվել ուսանողներին, դպրոցականների ծնողներին։ Ուսանողներին սպառնացել էին դուրս թողնել համալսարաններից չարտոնված ցույցերի մասնակցելու համար։
Միաժամանակ, Երիտասարդության հարցերով դաշնային գործակալությունը դպրոցներին և համալսարաններին հորդորել էր փետրվարի 14-ին երկրով մեկ ակցիա անցկացնել՝ «Ռուսաստան՝ սիրո երկիր» կարգախոսով։
Ուսանողներին առաջարկվել էր Սուրբ Վալենտինի օրը զանգվածաբար ծաղիկներ նվիրել «շրջապատի բոլոր մարդկանց»։ Իշխանամետ մեդիան նույնիսկ հոդվածներ էր հրապարակել այն մասին, թե որքան վտանգավոր է լուսարձակների գործառույթը սմարթֆոններում, և թե ինչու է պետք դրանք անջատել։
Պուտինը՝ Նավալնիի մասին
Այդ ընթացքում Ռուսաստանի նախագահ Վլադիմիր Պուտինը մեկնաբանել է ի աջակցություն Նավալնիի անցկացվող բողոքի ակցիաները լրատվամիջոցների գլխավոր խմբագիրների հետ հանդիպմանը։ Ինչպես հաղորդում է «Նովայա գազետան»՝ նրա կարծիքով՝ Նավալնիին «օգտագործում են», իսկ բողոքի ցույցերը նա կապել է կորոնավիրուսի համավարակի և տնտեսական խնդիրների պատճառով բնակչության դժգոհության հետ։
«Այդ ֆիգուրանտին (Պուտինը նախկինի պես խուսափում է Նավալնիի անունը նշել) օգտագործում են հենց հիմա՝ այն ժամանակ, երբ աշխարհի բոլոր երկրներում, այդ թվում՝ մեզ մոտ, հոգնածություն է առաջանում, մարդկանց մեջ կուտակված լարվածություն, դժգոհություն է առաջանում, այդ թվում՝ այն պայմանների նկատմամբ, որում նրանք ապրում են, եկամտի մակարդակի նկատմամբ», — ասել է Պուտինը։
Նրա խոսքով՝ «մարդիկ սկսել են ավելի վատ ապրել, այդ պատճառով էլ նրանք մեղադրում են ղեկավարությանը», և այստեղ ոչ մի նոր բան չկա։
«Հավակնությունները շատ են, էներգիան շատ է, ավելի շատ փող աշխատելու ցանկություն, իշխանատենչությոն կա […]։ Եվ այս ամենը պարզապես ամենաակտիվ կերպով օգտագործվում է», — ասել է Պուտինը։
