Ռուբեն Վարդանյանին թույլ չեն տվել դիմել Ադրբեջանի օմբուդսմենին, ընտանիքը մտահոգված է
Ռուբեն Վարդանյանը փորձել է դիմել Ադրբեջանի օմբուդսմենին
«Ընտանիքի հետ հեռախոսազրույցի ժամանակ Ռուբեն Վարդանյանը փորձել է հրապարակային կոչով դիմել Ադրբեջանի օմբուդսմեն Սաբինա Ալիևային, բայց հեռախոսազրույցը հարկադրաբար ընդհատվել է»,- հայտնել են Ռուբեն Վարդանյանի ընտանիքի անդամները։
Արցախի նախկին պետնախարարը մեկ ամիս առաջ Բաքվի զինվորական դատարանի կողմից 20 տարվա ազատազրկման է դատապարտվել։
Հայտարարության համաձայն՝ Վարդանյանը Արդբեջանի օմբուդսմենին փորձել է կոչով դիմել օրեր առաջ՝ մարտի 13-ին։ Ընտանիքի փոխանցմամբ՝ նա ստիպված է եղել նման քայլի դիմել։
«Նախորդ 10 օրերին օմբուդսմենի հետ փաստաբանի միջոցով, գրավոր դիմումներով և հեռախոսազանգերով կապ հաստատելու փորձերը որևէ արդյունք չեն տվել»,- պարզաբանել են նրանք։
Շեշտել են՝ Ադրբեջանում ինստիտուցիոնալ պաշտպանությունից զրկված է ոչ միայն Վարդանյանը, այլև բոլոր հայ գերիները։ Որպես պատճառ մատնանշել են, մասնավորապես՝ Ադրբեջանում մարդու իրավունքների անկախ մեխանիզմների վերացումը, այդ թվում՝ երկրից Կարմիր Խաչի միջազգային կոմիտեի հեռացումը։
«Մենք նաև մտավախություն ունենք, որ նույնիսկ կարճ հեռախոսազրույցները՝ կապի պահպանված միակ միջոցը, կարող են դադարեցվել»,- ասված է հաղորդագրությունում։
- Բաքուն Ստեփանակերտում մնացած հայերից մեկին ահաբեկչության մեջ է մեղադրում
- «Լսումները վերածվել են բացահայտ ֆարսի»․ Ռուբեն Վարդանյանը՝ պաշտպանից հրաժարվելու մասին
- «Բաքվում ընտրովի արդարադատություն է իրականացվում»․ հայ գերիների գործի մասին
Օմբուդսմենի հետ հանդիպման խնդրանք․ Վարդանյանի անավարտ ուղերձը
Արցախի նախկին պետնախարարի ֆեյսբուքյան պաշտոնական էջում տեքստային հաղորդագրության հետ միասին հրապարակվել է նաև Ադրբեջանի օմբուդսմեն Սաբինա Ալիևային ուղղված դիմումի աուդիոձայնագրությունը, որն անավարտ է։ Ընտանիքն այն հրապարակել է՝ հույսով, որ «կհասնի հասցեատիրոջը»։
Աուդիոձայնագրությունը ռուսերենով է։ Ստորև ներկայացնում ենք դրա հայերեն թարգմանությունը՝
«Ադրբեջանի օմբուդսմեն տիկին Ալիևա, ստիպված եմ դիմել Ձեզ։ Չնայած 2023 թ․-ի հոկտեմբերին տեսախցիկի առաջ մեր առաջին հանդիպման ժամանակ Դուք մեծահոգաբար տրամադրել էիք Ձեր հեռախոսահամարը՝ վերջին 10 օրվա ընթացքում չեմ կարողացել կապվել Ձեզ հետ, թեև փաստաբանի միջոցով, գրավոր դիմումներով և զանգելու փորձերով գործադրել եմ հնարավոր բոլոր ջանքերը։
Հետևաբար, ստիպված եմ դիմել Ձեզ հրապարակայնորեն։ Եվ, ցավոք, ինձ ու իմ գործընկեր-համախոհների հետ այստեղ կատարվողը Ձեզ փոխանցելու այլ միջոց չունեմ։
Ես խնդրում եմ հանդիպում Ձեզ հետ։ Դուք հանրային միակ հաստատության ղեկավարն եք, որին կարող եմ դիմել այս իրավիճակում, քանի որ ադրբեջանական մյուս բոլոր մարմինները կամ իրականացնում են պետական վերահսկողություն, կամ ․․․․ (զանգն ընդհատվում է)։
Եվ հիմա նրանք նույնիսկ թույլ չեն տալիս ինձ դա անել։ Ուզում եմ ասել, որ, ցավոք, նրանք թույլ չեն տալիս ինձ դիմել Ձեզ, որպեսզի դուք՝ միակ մարդը, որը կարող է այս իրավիճակում, այնտեղ ․․․
Ես մեկ ամիս է՝ չեմ կարողանում ստանալ դատավճիռը ո՛չ ռուսերեն, ո՛չ հայերեն, ո՛չ ադրբեջաներեն։ Չգիտեմ՝ ինչի համար եմ դատապարտվել և որ հոդվածներով։ Ես հանդիպում եմ խնդրում, որպեսզի կարողանանք քննարկել այս ամենը։
Ցավոք, Կարմիր խաչը հեռացել է։ Ասյտեղ չկա որևէ այլ հաստատություն, որը կարող է մեզ հետ կապ պահել։ ՀՀ կառավարությունն այստեղ չունի ներկայացուցչություն և զբաղված է մատակարարումներով ․․․ [զանգն ընդհատվում է, կապը՝ ավարտվում]»։
Նախապատմություն
2025 թ․-ի փետրվարին Բաքվի զինվորական դատարանը 20 տարվա ազատազրկման էր դատապարտել Լեռնային Ղարաբաղի նախկին պետնախարար Ռուբեն Վարդանյանին։ Նրա գործը քննվում էր առանձին, այլ ոչ թե Արցախի ռազմաքաղաքական ղեկավարների գործերի հետ։
Դատարանը Վարդանյանին մեղավոր էր ճանաչել մի շարք ծանր հանցագործությունների, այդ թվում՝ պատերազմի սանձազերծման, ահաբեկչության ֆինանսավորման, մարդկանց տեղահանելու մեջ։
Հայ իրավապաշպաններն արձանագրել էին՝ գործ ունենք ոչ թե իրավական, այլ քաղաքական գործընթացի հետ։
Ինքը՝ Վարդանյանը, տեղի ունեցողը որակել էր ֆարս, արդարադատության իմիտիացիա, այլ ոչ թե դատավարություն։
Ավելի վաղ ադրբեջանական դատաանը ԼՂ-ի նախկին նախագահ Արայիկ Հարությունյանին, Պաշտպանության բանակի նախկին հրամանատար Լևոն Մնացականյանին, գեներալ-մայոր Դավիթ Մանուկյանին, Ազգային ժողովի նախկին նախագահ Դավիթ Իշխանյանին և նախկին արտգործնախարար Դավիթ Բաբայանին դատապարտել էր ցմահ ազատազրկման։ ԼՂ-ի նախկին նախագահներ Արկադի Ղուկասյանն և Բակո Սահակյանը ազատազրկվել էին 20 տարով․ Ադրբեջանի օրենսդրությունն արգելում է 65 տարին լրացած անձանց ցմահ ազատազրկել։
ԼՂ-ի նախկին ղեկավարների, ինչպես նաև Վարդանյանի դատավարություններին մասնակցելու հնարավորություն չի ունեցել որևէ անկախ ԶԼՄ և իրավապաշտպան։
Հետևեք մեզ — Facebook | Youtube
Ռուբեն Վարդանյանը փորձել է դիմել Ադրբեջանի օմբուդսմենին
