«Գործարք տեղի չի ունեցել, ՀԷՑ-ը 100%-ով կպետականացվի»․ ժամանակավոր կառավարիչ
Ռոմանոս Պետրոսյանը՝ ՀԷՑ-ի պետականացման մասին
«Հայաստանի կառավարությունը պաշտոնական առաջարկ է արել ՀԷՑ-ի սեփակատերերին, սակայն գործարք տեղի չի ունեցել»,- Factor TV-ի եթերում հայտարարել է «Հայաստանի էլեկտրական ցանցեր» ընկերության ժամանակավոր կառավարիչ Ռոմանոս Պետրոսյանը։
Պետրոսյանի փոխանցմամբ՝ բանակցություններ, որպես այդպիսին, տեղի չեն ունեցել։ Ասում է՝ օրենքի համաձայն՝ լիցենզիայից զրկելուց հետո եռամյսա ժամկետում՝ մինչև փետրվարի 21-ը գործադիրը պետք է առաջարկ աներ սեփականատերերին, ինչպես և արվել է, սակայն արձագանք չի եղել։
«Փետրվարի 21-ից հետո արդեն Սահմանադրության 60-րդ հոդվածի համաձայն՝ կառավարությունը, որպես հանրային գերակա շահ, պետք է ճանաչի ընկերության 100% բաժնետոմսերը, և փոխհատուցման վճարումից հետո պետականացվի 100%-ով։ Գործընթացը թևակոխել է այդ փուլ»,- ընդգծել է նա։
2017 թվականի ապրիլից ՀԷՑ բաժնետերերն են «Տաշիր Կապիտալ» (բաժնետոմսերի 70%) և Liormand Holdings Limited (բաժնետոմսերի 30%) ընկերությունները։ «Տաշիր Կապիտալը» մտնում է «Տաշիր» հոլդինգի մեջ, որի սեփականատերն է ռուսաստանաբնակ հայ գործարար Սամվել Կարապետյանը։ Մյուս ընկերությունը ևս կապվում է նրա անվան հետ։ Հունիսի 18-ից Կարապետյանը կալանավորվեր էր, այժմ տնային կալանքի տակ է, մեղադրվում է իշխանազավթման հրապարակային կոչ անելու մեջ։
Թե ինչ գին է գործադիրը պատրաստ վճարել ընկերության համար՝ Պետրոսյանը չի հանրայնացրել։ Շաբաթներ առաջ ՀԷՑ-ի գլխավոր տնօրենի նախկին պաշտոնակատար Դավիթ Ղազինյանը հայտարարել էր, որ ընկերության արժեքը կազմում է գրեթե 1 միլիարդ դոլար։
Հարցազրույցում Ռոմանոս Պետրոսյանն անդրադարձել է ինչպես ՀԷՑ-ի պետականացմանը, այնպես էլ գնագոյացման հարցին, կառույցում հայտնաբերված խախտումներին և քննվող քրեական վարույթներին։
Կարևոր դրվագները՝ հակիրճ
- «Նպատակը Հայաստանը ՌԴ ֆորպոստի վերածելն է»․ Սամվել Կարապետյանը՝ վարչապետի թեկնածու
- Խաղադրույք «նոր դեմքերի» վրա. ինչպե՞ս է ՌԴ-ն փորձում առաջ մղել իր շահերը Հայաստանում
- «Ոչ ոք չի կարող սպառնալ ՀՀ-ին»․ Փաշինյանը՝ ռուսաստանաբնակ հայ գործարարին
«ՀԷՑ-ի շուկայական արժեքը գնահատվում է»
«Ընկերությունն այժմ գտնվում է համալիր գնահատման փուլում՝ որպես շուկայական արժեք»,- նկատել է ժամանակավոր կառավարիչը։
Սակայն Պետրոսյանը չի բարձրաձայնել կառավարության կողմից առաջարկվելիք գինը․
«Դա որոշակի լեգալ գործընթացների, նաև գնագոյացման կառուցվածքի, իրավակարգավորումների, այդ թվում՝ սահմանադրական նորմերի, օրենսդրական նորմերի խիստ պահպանմամբ իրավական գործընթաց է, որն այս պահին կոնֆիդենցիալ է համարվում»։
ՀԷՑ-ի ժամանակավոր կառավարչի խոսքով՝ ընկերության իրական արժեքի վրա մեծապես կազդեն նաև «նախաքննության արդյունքում ի հայտ եկած հանգամանքները»։
Շեշտել է՝ իրական արժեքը ձևավորվում է «սեփական կապիտալից, կապիտալիզացված բոլոր ակտիվներից»։ Տեղեկացրել է՝ գնագոյացման և գնահատման գործընթացներում ներգրավված են լուրջ մասնագետներ, ինչպես նաև պետական մարմիններ։
Ըստ Պետրոսյանի՝ իրենց լիազորությունների շրջանակում ներգրավվածություն ունեն Տարածքային կառավարման և ենթակառուցվածքների նախարարությունը, Հանրային ծառայությունները կարգավորող հանձնաժողովը, Ֆինանսների և Արդարադատության նախարարությունները։
«Գործընթացը գնում է օրենքի տառին համապատասխան։ Վերջնարդյունքում հանրությունը պատշաճ ձևով կիրազեկվի»,- վստահեցրել է նա։
Երկու տասնյակից ավելի քրեական վարույթներ են նախաձեռնվել
«Այս պահին շուրջ երկուսուկես տասնյակ քրեական վարույթներ են նախաձեռնվել ամենատարբեր հանցակազմի հատկանիշներ պարունակող հանգամանքների բերումով»,- հնարավոր չարաշահումների մասին խոսելիս՝ արձանագրել է ժամանակավոր կառավարիչը։
Շեշտել է՝ մեծ մասի հաղորդումներն ինքն է ներկայացրել Գլխավոր դատախազություն։ Ռոմանոս Պետրոսյանի փոխանցմամբ՝ այդ գործերի 60 տոկոսը քննվում է Հակակոռուպցիոն կոմիտեում, մնացածը՝ Քննչական կոմիտեում։
«Կան և՛ քրեաիրավական գնահատականի ենթակա ֆինանսատնտեսական մեքենայությունների փաստեր, և՛ կան խոշոր, առանձնապես խոշոր գումարների որոշակի միգրացիայի, այսպես ասած, առերևույթ փաստաթղթավորված փաստեր»։
Պետրոսյանի խոսքով՝ գրանցվել են նաև դեպքեր, երբ քաղաքացիներից գանձել են գումարներ չսպառած էլեկտրաէներգիայի դիմաց կամ քիչ են վճարել սեփական արևային կայանի արտադրած էլեկտրաէներգիայի դիմաց։
Նրա խոսքով՝ հանրայնացված խախտումները «այսբերգի երևացող մասն են», իսկ խորքային մասը դեռևս նախաքննության առարկա է, ընկերության լավագույն շահից ելնելով՝ հանդիսանում է «կոմերցիոն գաղտնիք»։
«Նախաքննությունը կպարզի»․ Սամվել և Նարեկ Կարապետյանների մեղավորության մասին
Ռոմանոս Պետրոսյանից հետաքրքրվել են՝ արդյոք արձանագրված խախտումներն ու չարաշահումների մասշտաբները վկայում են այն մասին, որ դրանցում ներգրավված են եղել նաև ընկերության սեփականատեր Սամվել Կարապետյանն ու նրա եղբորորդին՝ Նարեկ Կարապետյանը։
«Չեմ կարող ասել՝ կոնկրետ նշված անձինք որքանով են ներգրավված եղել կամ քաջատեղյակ եղե։ Բայց շատ դեպքեր ունենք, երբ ստորին ու միջին օղակի պաշտոնյաների ձեռամբ այդ մասշտաբի մեքենայություններ և առերևույթ հանցակազմի հատկանիշներ պարունակող գործողություններ են իրականացվել»,- պատասխանել է նա։
Պաշտոնյայի փոխանցմամբ՝ արձանագրվել են նաև միլիարդավոր դրամների մեքենայություններ։
«Շատ դեպքեր ունենք, երբ խոսքը միլիոնավոր և միլիարդավոր դրամների մեքենայությունների մասին է, որտեղ որ ես չեմ պատկերացնում մի իրավիճակ, որ իր կապիտալով մտահոգ և ուղղաձիգ կառավարում իրականացնող սեփականատերն ու կառավարման այլ մարմիններ, այդ թվում՝ տնօրենների խորհուրդն ու խորհրդի նախագահը այդ գործառնություններին այսպես, թե այնպես որևէ առնչություն ունեցած չլինեն»,- շեշտել է նա։
Միևնույն ժամանակ Պետրոսյանը նշել է, որ չի կարող խախտել «որևէ մեկի անմեղության կանխավարկածն», ու հավելել՝ մնացած հարցերի պատասխանը կտա նախաքննությունը։
«Ազնիվ չէ ՀԷՑ-ի շուրջ կատարվողը վերագրել Սամվել Կարապետյանի քաղաքական հայտին»
Ժամանակավոր կառավարիչ Ռոմանոս Պետրոսյանն անդրադարձել է նաև ընդդիմության քննադատությանը, թե ՀԷՑ-ի շուրջ զարգացումներ տեղի ունեցան միայն այն բանից հետո, երբ «իր ձևով եկեղեցին պաշտպանելու մասին» քաղաքական հայտարարություն արեց Սամվել Կարապետյանը՝ «Տաշիր կապիտալ» ընկերության սեփականատերը, որին պատկանում է ՀԷՑ-ը։
Ընդգծել է՝ ՀԷՑ-ի պետականացման հարցը պետք է դիտարկել ոչ թե քաղաքական, այլ բացառապես էներգետիկ, տնտեսական, կառավարչական ճգնաժամի համատեքստում․
«Մեղմ ասած, ազնիվ չէ ՀԷՑ-ի շուրջ կատարվող իրադարձությունները քաղաքականացնել և վերագրել իրենց քաղաքական հայտին և դրան հաջորդած գործողություններին»։
Հիշեցրել է՝ էլեկտրաէներգիայի բաշխիչ ցանցերում առկա խնդիրները կառույցի ներկայացուցիչների հետ քննարկվել են դեռևս 2024 թվականի աշնանը՝ Կարապետյանի հայտարարությունից 1,5 տարի առաջ։ Նրա փոխանցմամբ՝ ՏԿԵՆ նախարարը քննարկումներ է անցկացրել ՀԷՑ-ի սեփականատերերի, այդ թվում՝ Տնօրենների խորհրդի նախագահ Նարեկ Կարապետյանի հետ։
Ժամանակավոր կառավարչի փոխանցմամբ՝ Նարեկ Կարապետյանը յուրաքանչյուր անգամ երաշխավորել է նախարարին, որ իրավիճակը վերահսկողության տակ է, լուծումներ կգտնեն։
«Ճանապարհային քարտեզներ են մշակվել, ՀԷՑ-ում պաշտոնյաների՝ կառավարիչների փոփոխություններ, ազատումներ և ռոտացիաներ են տեղի ունեցել, մասնաճյուղերի տնօրեններ են փոխվել։ Այդ ամենը խոսում է այն մասին, որ սեփականատերերը դեռևս 1,5 տարի առաջ ընդունել են, որ ՀԷՑ-ում կան խորքային խնդիրներ»։
Պետրոսյանը չի բացառել, որ գուցե Սամվել Կարապետյանը ի պաշտպանություն եկեղեցու հայտարարություն է արել այն ժամանակ, երբ տեսել է՝ «ՀԷՑ-ի շուրջ օղակը սեղմվում է, և վաղ, թե ուշ ազգային հարստություն հանդիսացող, բնական մենաշնորհային դիրքով օժտված, ռազմավարական թիվ մեկ ընկերությունը անխուսափելիորեն պիտի պետականացվի»։
«Գուցե դրանով էր պայմանավորված այդ հայտարարությունը։ Դա թող դատի պատմությունը»,- ամփոփել է նա։
Հետևեք մեզ — Facebook | Youtube
Ռոմանոս Պետրոսյանը՝ ՀԷՑ-ի պետականացման մասին
