Ուկրաինան ենթադրաբար Հյուսիսային Կորեային օգնել է ռազմական միջուկային մշակումներում
Միջուկային օբյեկտ Հյուսիսային Կորեայում: Լուսանկարը՝ Reuters, այն արվել է 2008թ-ի հունիսի 27-ին
Հյուսիսային Կորեան կարողացել է միջաշխարհամասային հրթիռների փորձնական գործարկման հարցում հաջողության հասնել շնորհիվ ուկրաինական արտադրամասից գնված հզոր շարժիչի, պնդում են փորձագետներն ու հետախուզական համայնքի նարկայացուցիչները, գրում է New York Times-ը՝ հղում անելով Ռազմավարական հետազոտությունների միջազգային ինստիտուտի փորձագետ Մայքլ Էլեմանի զեկույցին:
Երու տարվա ընթացքում հյուսիսկորեական հրթիռներն անհաջողություններ էին կրում, ինչը կապված էր մեծ մասամբ հրթիռների մասերի մատակարարների հանդեպ ԱՄՆ կողմից կիրառվող կոշտ սահմանափակումների հետ: Սակայն այժմ Հյուսիսային Կորեան փոխել է հրթիռների կոնստրուկցիան և փոխել մատակարարներին: Հենց Ուկրաինայից բերված շարժիչն է օգնել Հյուսիսային Կորեային հրթիռների հաջող գործարկմանը, պնդում է Մայքլ Էլեմանը:
Այն լուսանկարների վերլուծությունը, որոնց վրա Հյուսիսային Կորեայի առաջնորդ Կիմ Չեն Ինը ստուգում է նոր հրթիռները, վկայում են այն մասին, որ դրանց շարժիչները կարող էին արտադրված լինել միայն նախկին ԽՍՀՄ տարածքի մի քանի արտադրամասերում: Այդ շարժիչների հզորությունն այնպիսին է, որ թույլ է տալիս մեկ հրթիռի վրա 10 մարտագլխիկ տեղադրել:
Այդպիսի արտադրամասերի մեծ մասը Ռուսաստանում է գտնվում: Սակայն հիմնական կասկածի տակ է «Յուժմաշ» գործարանը, որը տեղակայված է ուկրաինական Դնեպր քաղաքում, որում արտադրվել են միջաշխարհամասային СС-18 բալիստիկ հրթիռները:
«Հավանականություն կա, որ այդ շարժիչները Հյուսիսային Կորեայում են հայտնվել Ուկրաինայից, — ասել է Մայքլ Էլեմանը The New York Times-ին: Հնարավոր է, որ դա ապօրինի է տեղի ունեցել, սակայն դա մեծ անհանգստություն է առաջացնում»:
Ուկրաինական իշխանությունները կտրականապես հերքել են այդ ենթադրությունները:
«Ուկրաինական ձեռնարկությունները Հյուսիսային Կորեա զենք և ռազմական տեխնոլոգիաներ չեն արտահանել, — հայտարարել է Ուկրաինայի Ազգային անվտանգության խորհրդի քարտուղար Ալեքսանդր Տուրչինովը: — Ուկրաինան Հյուսիսային Կորեայի իշխող ռեժիմը «տոտալիտար, վտանգավոր և անկանխատեսելի է համարում և կողմ է այդ երկրի դեմ գործող բոլոր պատճամիջոցներին», — հաղորդում է Hromadske.ua ուկրաինական տեղեկատվական պորտալը:
