Ուկրաինայի արևելքում մարտական գործողությունների նոր բռնկում է
Ուկրաինայի արևելքում՝ Ավդեևկա շրջանում, կիրակի օրը վերսկսվել են ակտիվ մարտական գործողություններն ուկրաինական կառավարական զորքերի և այսպես կոչված Դոնեցկի Ժողովրդական Հանրապետության ռուսամետ զինված կազմավորումների միջև: Մարտերի արդյունքում երկու կողմից էլ զոհեր կան, երկու կողմերն էլ հաղորդում են խաղաղ բնակչության շրջանում վիրավորների մասին:
Հակաահաբեկչական գործողության գոտու մամուլի կենտրոնի հաղորդագրության համաձայն՝ այսօր առավոտյան Ավդեևկայի շրջանում տանկերի և հրետանու գնդակոծման արդյունքում երկու ուկրաինացի մարտիկ է զոհվել, հինգը վիրավորվել է:
Ուկրաինական տվյալների համաձայն՝ հունվարի 29-ի առավոտյան զինյալները գրոհել են Ավդեևկայի արդյունաբերական գոտին՝ Դոնեցկի օդանավակայանին հարող տեղանքը: Ուկրաինայի զինված ուժերը ետ են մղել գրոհը: Ընդհանուր առմամբ, կիրակի զոհվել է 4 ուկրաինացի մարտիկ, 12-ը վիրավորվել է: Ավդեևկայի գնդակոծության արդյունքում երկու խաղաղ բնակիչ է վիրավորվել, ավանում անջատվել է էլեկտրաէներգիան:
Ուկրաինայի պաշտպանության նախարար Ստեփան Պոլտորակը հաղորդել է, որ Ուկրաինայի ԶՈւ հակահարձակման են անցել և ռազմավարական նշանակության դիրք են գրավել:
Ուկրաինայի Հետախուզության գլխավոր վարչությունը հաղորդում է 15 զինյալների, այդ թվում՝ հետևակային գումարտակի Հույն մականունով հրամանատարի մահվան մասին:
Իրենց հերթին, այսպես կոչված Դոնեցկի Ժողովրդական Հանրապետության ներկայացուցիչները մեղադրում են ուկրաինական զորքերին մարտական գործողություններ սադրելու համար և հաստատում են գումարտակի հրամանատարի մահվան լուրը: ԴԺՀ իշխանություններն ուկրաինական զորքերին մեղադրում են նաև Դոնեցկի գնդակոծման համար, որի արդյունքում խաղաղ բնակիչ է վիրավորվել:
Ուկրաինայի արևելքում ռազմական գործողությունների արդյունքում, ըստ ՄԱԿ տվյալների, 2014թ-ի գարնանից մինչև 2016թ-ի սեպտեմբեր 9,5 հազար մարդ է զոհվել: Ներկա պահին հակամարտության գոտում հաշտություն է՝ Մինսկի համաձայնագրերի համաձայն, որոնք նաև սահմանափակում են շփման գծում կողմերի մոտ ծանր զինամթերքի առկայությունը: Ռուսաստանը մինչ այսօր հերքում է իր մասնակցությունը հակամարտությանը:
