Նախագահներ Թրամփի և Պուտինի խորհրդավոր հանդիպումը

Վերջերս Համբուրգում կայացած G-20 գագաթնաժողովին բացի այն հանդիպումը, որի մասին հայտնի է, կայացել է նաև նախագահներ Պուտինի և Թրամփի երկրորդ հանդիպումը: Այդ մասին հաղորդում է CNN-ը:

Գագաթնաժողովի մասնակիցների պատվին տված հանդիսավոր ընթրիքին ԱՄՆ նախագահն անսպասելիորեն վեր է կացել իր տեղից և նստել Վլադիմիր Պուտինի սեղանի մոտ: Նրանց միջև զրույցը տևել է մոտ մեկ ժամ:

Դիտորդները նշում են, որ նման իմպրովիզացված բանակցությունները հաճախակի երևույթ են գագաթնաժողովներում, սակայն այս դեպքը ծայրահեղ անսովոր է: Զրույցին չի մասնակցել ամերիկացի թարգմանիչ: Այսինքն՝ սղագրություն, որի կազմելը թարգմանչի պարտականություններնն է, կունենա միայն ռուսական կողմը:

Սպիտակ տունը հաստատել է Թրամփի և Պուտինի միջև հանդիպման փաստը, սակայն այն «կարճ» է անվանել և բնութագրել որպես «նախագահի կողմից համաշխարհային առաջնորդների հետ կապերի հանդեպ պարտավորությունների սովորական կատարում»:

Սակայն ամերիկյան լրատվամիջոցների մեծ մասը, որոնք այս նորությունը թոփերի շարքում են հրապարակել, այլ կարծիքի են: Ռուսաստանի հետ ապօրինի կապերի մեղադրանքները Թրամփի աշխատակիցների և ազգականների հասցեին բազմապատկվում են և ավելի հստակ դառնում: Այդ կապերի հետաքննություն է այժմ վարում ԱՄՆ Կոնգրեսի Ներկայացուցիչների պալատն ու Սենատը, ինչպես նաև արդարադատության նախարարության հատուկ դատախազը: