Տարածաշրջանում դեռևս չի կարելի խոսել վերջնական կայունացման մասին, Լեռնային Ղարաբաղի կոնֆլիկտը մնում է չլուծված։ Հոկտեմբերի 12-ին Մոսկվայում ՌԴ նախագահ Պուտինի հետ հանդիպման ժամանակ ասել է Հայաստանի վարչապետ Նիկոլ Փաշինյանը։
Փաշինյանը Մոսկվա է ժամանել կարճատև այցով, Ռուսաստանի նախագահի հրավերով։
Հանդիպման մեկնարկին Պուտինն ընդգծել է, որ թեև ՀՀ վարչապետի հետ մշտական հեռախոսային կապի մեջ է, բայց «անմիջական հանդիպումը միշտ ավելի արդյունավետ է»։
«Հույս ունեմ, որ այսօրվա հանդիպումը ևս բացառություն չի լինի»,- ասել է Վլադիմիր Պուտինը։
Նիկոլ Փաշինյանը շնորհակալություն է հայտնել Պուտինին հրավերի համար, նշելով, որ նման հանդիպումները վկայում են ռազմավարական գործընկերության կարևորության մասին։
Խոսելով տարածաշրջանում տեղի ունեցող դինամիկ գործընթացների մասին՝ Հայաստանի վարչապետը մատնանշել է, որ «դեռևս չի կարելի խոսել վերջնական կայունացման մասին»։
«Լեռնային Ղարաբաղի կոնֆլիկտը մնում է չլուծված։ Կոնֆլիկտի կարգավորման և տարածաշրջանում անվտանգության ապահովման հարցում Ռուսաստանը կարևոր դերակատարություն ունի, հանդիսանում է ԵԱՀԿ Մինսկի խմբի համանախագահ»,– նշել է Փաշինյանը։
Այս համատեքստում ՀՀ ղեկավարը կարևորել է դաշնակիցների հաճախակի հանդիպումներն ու անելիքների համաձայնեցումը։
ՌԴ նախագահն ասել է, որ քննարկվող հարցերի թվում են ինչպես տարածաշրջանի կայունացմանը վերաբերող հարցերը, այնպես էլ ԱՊՀ առաջիկա գագաթնաժողովի օրակարգը։
Այլ մանրամասներ չեն հաղորդվում։ Հանդիպումը շարունակվում է փակ դռների հետևում:
Ավելի վաղ Կրեմլը հաղորդագրություն էր տարածել՝ տեղեկացնելով, որ Պուտինն ու Փաշինյանը քննարկելու են նոյեմբերի 9-ի և հունվարի 11-ի եռակողմ հայտարարությունների իրագործման ընթացքը, ինչպես նաև տարածաշրջանում կայունության ամրապնդման և տնտեսական կապերի հաստատման ուղղությամբ ձեռնարկվող հետագա քայլերը։
ՌԴ նախագահի մամուլի քարտուղար Դմիտրի Պեսկովը ԶԼՄ ներկայացուցիչներին հայտնել էր, որ Պուտին-Փաշինյան «բանակցությունների ձևաչափը ենթադրում է զրույց և աշխատանքային ճաշ»։
Հիշեցնենք, որ սա Պուտին-Փաշինյան չորրորդ հանդիպումն է 2021 թվականի ընթացքում։ Այս անգամ, սակայն, այցը կարճատև է։ Այլ հանդիպումներ նախատեսված չեն։ Պուտին-Փաշինյան բանակցություններից հետո մամուլի ասուլիսի անցկացում կամ հայտարարության հրապարակում Կրեմլը չի պլանավորել։
