Մեծ Բրիտանիան պատժամիջոցներ է սահմանել երկու վրացի դատավորների դեմ
Բրիտանական պատժամիջոցներ վրացի դատավորների դեմ
Մեծ Բրիտանիան պատժամիջոցներ է սահմանել Վրաստանի երկու դատավորների՝ Միխեիլ Չինչալաձեի և Լևան Մուրուսիձեի նկատմամբ: Պատժամիջոցների սահմանմանն ուղեկցող փաստաթղթի համաձայն՝ կսառեցվեն նշված դատավորների՝ Մեծ Բրիտանիայում գտնվող բոլոր ակտիվները, այդ թվում՝ բանկային հաշիվները։
Փաստաթղթում նշվում է դատավորների հնարավոր կոռուպցիոն կապերի մասին:
Պատժամիջոցների մասին որոշումն ընդունվել է 2018 թվականի «Պատժամիջոցների և փողերի լվացման դեմ պայքարի մասին» օրենքի համաձայն և նախատեսում է ֆինանսական սահմանափակումների կիրառում:
Պատժամիջոցները ենթադրում են լուրջ կոռուպցիային մասնակցող կամ մասնակցած անձանց միջոցների և ռեսուրսների սառեցում:
Փաստաթղթում կոչ է արվում ձեռնպահ մնալ պատժամիջոցների ցանկում ներառված անձանց պատկանող դրամական միջոցների կամ տնտեսական ռեսուրսների հետ կապված գործարքներից, եթե դրա համար չկա Ֆինանսական պատժամիջոցների իրականացման վարչության (OFSI) թույլտվությունը կամ այլ բացառություններ:
Մեծ Բրիտանիայի կողմից սահմանված ֆինանսական պատժամիջոցները չպահպանելը կամ դրանք շրջանցելու փորձերը կարող են հանգեցնել քրեական պատասխանատվության:
Պատժամիջոցներ Միխեիլ Չինչալաձեի դեմ
Փաստաթղթի համաձայն՝ Միխեիլ Չինչալաձեն ենթարկվել է պատժամիջոցների, քանի որ «որպես Թբիլիսիի վերաքննիչ դատարանի նախագահ՝ ստացել է ֆինանսական օգուտներ և պարգևատրումներ՝ իր պետական պարտականությունները ոչ պատշաճ կերպով կատարելու դիմաց: Մասնավորապես՝ նա անօրինական կերպով օգտագործել է իր ազդեցությունը՝ ազդելով դատական որոշումների և դատավորների նշանակումների վրա՝ ի շահ իշխող «Վրացական երազանք» կուսակցության»:
«Նա ցմահ պաշտոն է ստացել Թբիլիսիի վերաքննիչ դատարանում, […] որպեսզի դատարանի որոշումներն առաջվա նման կայացվեն «Վրացական երազանք» կուսակցության օգտին»,- նշվում է փաստաթղթում:
Պատժամիջոցներ Լևան Մուրուսիձեի դեմ
Լևան Մուրուսիձեի վերաբերյալ փաստաթղթում նշվում է, որ նա՝ «որպես Վրաստանի Արդարադատության բարձրագույն խորհրդի անդամ, ստացել է ֆինանսական օգուտներ և պարգևատրումներ՝ իր պետական գործառույթները ոչ պատշաճ կերպով կատարելու դիմաց»:
Մասնավորապես՝ նա «անօրինական կերպով օգտագործել է իր ազդեցությունը՝ ազդելով դատական որոշումների և դատավորների նշանակումների վրա՝ ի շահ «Վրացական երազանք» կուսակցության: Լինելով Վրաստանի Արդարադատության բարձրագույն խորհրդի անդամ՝ նա ստացել է արտոնություն Թբիլիսիի վերաքննիչ դատարանում ցմահ պաշտոնի տեսքով։ Այնտեղ նա կոչված էր ղեկավարելու դատական համակարգն այնպես, որ դատավորների նշանակումներն ու դատական որոշումները ծառայեն իշխող կուսակցության շահերին»:
2024 թվականի դեկտեմբերի 19-ին Մեծ Բրիտանիան պատժամիջոցներ սահմանեց հինգ վրացի բարձրաստիճան պաշտոնյաների նկատմամբ: Պատժամիջոցների տակ հայտնված անձանց թվում են Վրաստանի ներքին գործերի նախարար Վախթանգ Գոմելաուրին և նրա տեղակալը, Հատուկ հանձնարարությունների դեպարտամենտի պետ Զվիադ Խարազիշվիլին և նրա տեղակալը, ինչպես նաև Թբիլիսիի ոստիկանապետը:
Բրիտանական կառավարության տվյալների համաձայն՝ նրանք պատասխանատվության են ենթարկվում լրագրողների և խաղաղ ցուցարարների դեմ դաժան հարձակումների համար:
Պատժամիջոցները հաջորդեցին Մեծ Բրիտանիայի որոշմանը, այն է՝ կասեցնել Վրաստանի կառավարությանն աջակցող բոլոր ծրագրերը, այդ թվում՝ պաշտպանական ոլորտում: Բացի այդ, երկրի կառավարությունը սահմանափակել է համագործակցությունը «Վրացական երազանք» կուսակցության հետ:
Հետևեք մեզ — Facebook | Youtube | Telegram
Բրիտանական պատժամիջոցներ վրացի դատավորների դեմ
