Արցախ, մարտեր և հայտարարություններ։ Հոկտեմբերի 20-ի իրադարձությունները, բախումների երեք շաբաթ

Տեղեկություններ Երևանից և Ստեփանակերտից

• Հայաստանի պաշտպանության նախարարությունը հաղորդել է, որ հյուսիսային հատվածում հակառակորդը կիրառում է ավիացիա և հրետանի, ինտենսիվ մարտերը հարավում (Իրանի սահմանին մոտ) շարունակվում են։

• Հայաստանի վարչապետ Նիկոլ Փաշինյանը հանդիպել է Լեռնային Ղարաբաղի նախկին նախագահներ Արկադի Ղուկասյանին և Բակո Սահակյանին և քննարկել «Լեռնային Ղարաբաղում ադրբեջանաթուրքական ագրեսիայի հետևանքով ստեղծված իրավիճակին» հակազդելու քայլերը։

• Նույն օրակարգն է նախանշված արտախորհրդարանական և խիստ ընդդիմադիր կուսակցությունների ներկայացուցիչների հետ Փաշինյանի հանդիպմանը։

• Հանդիպումից հետո «Դաշնակցություն» կուսակցության ներկայացուցիչ Իշխան Սաղաթելյանը հայտարարել է, որ հայ ժողովուրդն իրավունք չունի նահանջելու, քանի որ այս պատերազմում վճռվում է պետության գոյության հարցը։

««Դաշնակցության» համար անընդունելի է կարգավորումն առանց Արցախի անկախության ճանաչման։ Եվ ինչպես նախկինում, այնպես էլ այժմ անընդունելի է փուլային լուծման որևէ տարբերակ»։

• Հայաստանի Հանրապետական կուսակցության ներկայացուցիչ Էդուրադ Շարմազանովը հայտարարել է, որ «Լեռնային Ղարաբաղը երբեք չի լինելու Ադրբեջանի կազմում։ Արցախի ժողովրդի ինքնորոշման իրավունքի իրացումն այլընտրանք չունի»։

• Հայաստանի փոխարտգործնախարար Շավարշ Քոչարյանը խորհրդարանում հայտարարել է․

«Ամեն ինչ որոշվում է մարտադաշտում։ Ինչ վերաբերում է համաշխարհային հանրությանը, ՄԱԿ-ին և այլն, մեզ համար ծայրահեղ ցավալի է այս ամենը տեսնելը։ Սակայն մենք պետք է գիտակցենք, որ երբ խոսքն անվտանգության ապահովման մասին է, ապա, առաջին հերթին, դա մեր պարտքն է ու մեր պարտավորությունը։

Հայաստանը պատերազմական դրության մեջ է, որում ներգրավված է նաև Թուրքիան, ինչը նոր ցեղասպանության սպառնալիք է նշանակում»։

• Հայաստանի վարչապետը ֆեյսբուքյան իր էջում հաղորդել է, որ պատերազմի ընթացքում Արցախի Պաշտպանության բանակը մոտ տասնյակ «Բայրաքթար» թուրքական ԱԹՍ է խոցել, և հայկական կողմը «կարծես «Բայրաքթարի» բեկորներ ունի»։

Հայաստանի վարչապետը դա Արցախի դեմ ահաբեկչական պատերազմին Թուրքիայի ներգրավվածության ապացույց է անվանել և կոչ է արել երկրներին, որոնք Թուրքիային «Բայրաքթարի» համար անհրաժեշտ բաղադրամասեր են տրամադրում, հետևել Կանադայի օրինակին և կասեցնել հետագա մատակարարումները։

Տեղեկություններ Բաքվից

Տվյալներ մարտերի մասին

• Ադրբեջանի պաշտպանության նախարարությունը հաղորդում է Աղդերե-Աղդամ, Ֆիզուլի-Հադրութ-Ջաբրայիլ և Գուբաթլի-Զանգելան ուղղություններով մարտերի մասին, հայկական բանակը հրազեն, ականանետներ և հրանոթներ է կիրառում։

Հաղորդվում է նաև, որ հայ զինվորականները հրետակոծում են Տերտերի և Աղդամի շրջանները։

• Ադրբեջանի նախագահ Իլհամ Ալիևը հերթական ուղերձն է հղել ժողովրդին։ Նա հաղորդել է, որ ադրբեջանական բանակն իր վերահսկողության տակ է առել ևս 24 գյուղ և Զանգելան քաղաքը ղարաբաղյան հակամարտության գոտում։

• Ադրբեջանի Ռուս ուղղափառ եկեղեցին հայտարարությամբ է հանդես եկել․

«Զորքը կռվում է զորքի դեմ, իսկական մարտիկը երբեք ձեռք չի բարձրացնի երեխաների, կանանց և ծերերի վրա։ Հայաստանի զինված ուժերի կատարած չարագործությունները բացահայտ կարելի է ահաբեկչական ակտ անվանել։ Համաշխարհային հանրությունը պարտավոր է դատապարտել ագրեսիայի այս աղաղակող ակտերն ու պատժել մեղավորներին»։

Հայտարարությունում խոսվում է Տերտեր քաղաքում սգո թափորի հրետակոծման և գիշերը Գյանջա քաղաքի բնակելի շրջանների հրթիռակոծության մասին։ Երկու գործողությունների հետևանքով էլ տասնյակ մարդիկ են զոհվել, մինչև հարյուրը վիրավորվել է։

• Նոր տվյալներ խաղաղ բնակչության շրջանում զոհերի մասին՝ 61 մարդ է զոհվել, 291-ը վիրավորվել է։