ՀՀ ԱԺ-ում լուծարվել է մարդու իրավունքների հարցերով զբաղվող հանձնաժողովը

Հայաստանի նորընտիր խորհրդարանի իշխանական մեծամասնության առաջարկով Ազգային ժողովում գործող Մարդու իրավունքների և պաշտպանության մշտական հանձնաժողովը լուծարվել է:

Իշխող «Հանրապետական» կուսակցության ներկայացրած նախագծով առաջարկվել էր նախկինում գործող 12 հանձնաժողովների թիվը նվազեցնել`հասցնելով 9-ի: Հարցը ներկայացնող ՀՀԿ պատգամավոր Հրայր Թովմասյանը որոշումը պարզաբանել է հետևյալ կերպ. Աժ հանձնաժողովները աշխատել են տարբեր ծանրաբեռնվածությամբ, հաշվի առնելով այս հանգամանքը, առաջարկվել է մարդու իրավունքների ոլորտը, որը փոխկապակցված է պետաիրավական հարցերին, միավորել մեկ հանձնաժողովում:

Խորհրդարանական ընդդիմությունն առարկել էր առաջարկին: «Ելք» դաշինքի պատգամավոր Արտակ Զեյնալյանը հայտարարել էր, որ, փակելով այս հանձնաժողովը, մեծամասնությունը «վատ ուղերձ է տալիս հայ հանրությանը»:

Հանձնաժողողովի լուծարմանը բացասական գնահատական են տվել, իրենց դժգոհությունն են արտահայտել նաև իրավապաշտպանները:

Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցն այս որոշումը սխալ է համարում: Նա նշել է, որ Հայաստանն անցել է կառավարման խորհրդարանական համակարգին, և տեսականորեն այս հանձնաժողովը ոչ թե պետք է լուծարվեր, այլ դառնար ամենակարևորներից մեկը:

«Պառլամենտական վերահսկողության իրականացման բովանդակային մոտեցման տեսակետից, միջազգային պարտավորությունների կատարման, Եվրամիություն-Հայաստան նոր համաձայնագրի տրամաբանությունից ելնելով՝ թվում էր, թե պետք է ավելի մեծ քաղաքական նշանակություն տրվի Մարդու իրավունքների հարցերով զբաղվող հանձնաժողովին: Իսկ նրան միավորել՝ նշանակում է տալ մնացորդային բնույթ»,- շեշտել է իրավապաշտպանը:

Իրավաբան Էլինար Վարդանյանն էլ, ով ի դեպ նախորդ գումարման խորհրդարանում այս հանձնաժողովի նախագահն է եղել, լրատվամիջոցներին ասել է, որ ցավում է հանձնաժողովի լուծարման կապակցությամբ՝ մարդու իրավունքների պաշտպանության վիճակը Հայաստանի Հանրապետությունում մտահոգիչ է, այս պահին նման որոշում չպետք է կայացվեր: