Հարավային Օսիայում ներդրողների համար վեբ պորտալ է բացվել
Հարավային Օսիայում պաշտոնական ներդրումային առցանց պորտալ է ստեղծվել՝ www. investrso.su: Դրա գործառույթը Հարավային Օսիայի տնտեսությունում ներդրումներ անելու ցանկություն ունեցող արտասահմանյան ներդրողներին անհրաժեշտ ամբողջական տեղեկատվության տրամադրումն է:
Կայքում արդեն տեղադրվել են բազային տեղեկություններ ներդրումային հարթակների (ազատ հողակտորների կամ շենքերի մասին), ինչպես նաև աշխատող ձեռնարկությունների մասին, որոնցով կարող են հետաքրքրվել հնարավոր ներդրողները: Կա նաև բազային տեղեկատվություն Հարավային Օսիայի մասին:
«Այդ պորտալը մշակել և ստեղծել է մեր նախարարությունը: Այսօրվա դրությամբ Հարավային Օսիայում ներդրում է կատարել մոտ տասն արտասահմանյան գործարար: Վստահ եմ, որ այդ ներդրումային պորտալը խթանում է նոր ներդրողներին», — JAMnews-ին ասել է էկոնոմիկայի նախարար Գենադի Կոկոևը:
Կայքում կա նաև «Հաճախ տրվող հարցեր» բաժինը, որում բացատրվում է, թե ինչ է պետք Հարավային Օսիայում ներդրող դառնալու համար և հստակ ինչ օգնություն նրանք կարող են ստանալ: