Հայաստանում քննարկում են ազգային օրհներգը փոխելու հարցը

Լուսանկարը՝ NPR.org-ից

Աշխարհահռչակ շանսոնյե Շարլ Ազնավուրն օրերս առաջարկել էր իր «Քե՛զ համար, Հայաստա՛ն» երգը դարձնել Հայաստանի Հանրապետության նոր օրհներգը:

Այս հայտարարությունը բուռն քննարկման տեղիք է տվել հայաստանյան լրատվական դաշտում: Արվեստագետները, մտավորականները կարծիքներ են արտահայտում՝ արդյո՞ք հարկավոր է փոխել Հայաստանի ներկայիս «Մեր հայրենիք» ազգային օրհներգը, թե ոչ:

Երգիչ Արթուր Իսպիրյանն, օրինակ, ասել է, որ շանսոնյեյի երգը շատ գեղեցիկ է և կարելի է օգտագործել որպես երկրի օրհներգ. «Ազնավուրն այնքան արժանիքներ ունի, ինքը թե ինձ, թե մեր ազգի համար մեծություն է, ըստ այդմ էլ` պետք է հետևել նրա առաջարկներին»: Երգիչը կարծում է, որ օրհներգի փոփոխության պարագայում մարդիկ ժամանակի ընթացքում կընտելանան նորին, կհամակերպվեն:

ՀՀ կոմպոզիտորների միության նախագահ Արամ Սաթյանը դեմ է այս առաջարկին: «Ես չեմ կարծում, որ Հայաստանի օրհներգը պետք է փոխարինել այդ երգով, որովհետև այն երգ է, օրհներգ չէ»,- ասել էր Սաթյանը:

Երաժիշտ Եղիշե Պետրոսյանն էլ ասել էր, որ կողմ է Հայաստանի օրհներգը փոխելուն, բայց ոչ «Քեզ համար Հայաստան» երգով: «Այդ երգն օրհներգ դարձնելը շատ ամոթ բան է»,- ասել է նա:

Ֆեյսբուքյան օգտատերը ևս այս առնչությամբ կարծիքներ են արտահայտել: Չնայած դրան, որ Շարլ Ազնավուրը Հայաստանում անվերապահորեն ընդունված, հարգված և սիրված անձ ու երաժիշտ է, նրա առաջարկը հիմնականում մերժողական արձագանք է ստացել սոցիալական ցանցում.

«Ես զարմանում եմ, որ Արամ Խաչատրյանի հրաշալի օրհներգը [Հայաստանի սովետական ժամանակների հիմնի մասին է խոսքը] թողած կամ «Երազ իմ երկիր հայրենի» ժողովրդական օրհներգը թողած, սկսում են Ազնավուրի ասած «Քեզ համար, Հայաստան» երգը որպես օրհներգ դիտարկել։ Ու Աստված չտա, այս երգն օրհներգ դառնա, ամեն անգամ լսելուց երկրաշարժը աչքներիս առաջ է գալու ու դեպրեսիայի մեջ ենք մշտական մնալու»:

«Եթե փոխում են, թող Արամ Խաչատրյանինը դնեն նորից, այլ ոչ թե երկրաշարժի մասին հիշեցնող երգը, հերքի է էլի, դարձել ենք ողբն ամեն տեղ հիշող ու հիշատակող ազգ»:

«Սթափ մտածե’ք: Պետական օրհներգը խաղալիք չէ, որ ամեն մի տեղից ելնողն այն իր ձեռքը վերցնի: Եվ ՀՀ օրհներգը փոխելու հարգելի խանդավառներ, վերջապես ձեռքներդ դրեք սրտներիդ ու անկեղծորեն ասեք, որ միշտ էլ տեղին ու լավ է հնչել «Մեր հայրենիք»-ը»: