Հայաստանում վարորդներին գնահատելու բալային համակարգ է ներդրվում

Հայաստանի ոստիկանությունն առաջարկում է վարորդներին վարչական պատժի ենթարկելու նոր համակարգ ներմուծել տուգանային բալերի տեսքով:

Ո՞րն է նախագծի իմաստը

Նախագիծն առաջարկում է ճանապարհային երթևեկության կանոնները խախտողներին պատժել տուգանային բալերով: Յուրաքանչյուր վարորդ տարեկան նախնական 9 բալ կստանա: Իսկ ճանապարհային երթևեկության կանոնների յուրաքանչյուր խախտման համար բալեր կհանվեն: Թե քանի բալ կհանվի, կախված է խախտման տեսակից: Լուրջ խախտումների համար կարելի է միանգամից 4 բալ կորցնել: Երբ բալերը վերջանան, վարորդը կզրկվի վարորդական իրավունքից:

Ոստիկանությունն արդեն հրապարակել է հստակ խախտման համար հանվող տուգանային բալերի ցանկը: Օրինակ, խաչմերուկի սխալ հատման համար 2 բալ կհանվի, սխալ վազանցի համար՝ 1 բալ, թույլատրելի արագության գերազանցումն ավելի քան 50կմ/ժ-ով խախտողը կզրկվի միանգամից 4 բալից:

• Կառավարությունը որոշել է ժամանակավորապես չտուգանել վարորդներին խախտումների համար: Տաքսու վարորդներն ուրախացել են, հետիոտնները՝ վրդովվել 

• Կովկասում ավտոբիզնեսի ամենապոպուլյար սխեման. որտեղից գնել, ինչպես տեղափոխել, որտեղ մաքսազերծել

Ո՞րն է նոր համակարգի ներդրման նպատակը

Հայաստանի ոստիկանությունում կարծում են, որ տուգանային բալերի նոր համակարգը կբարելավի իրավիճակը ճանապարհներին:

«Տուգանային բալային համակարգը զսպող գործոն կդառնա և կարգապահություն կսահմանի ճանապարհներին: Հույս ունենք, որ կկրճատվի նաև լուրջ վթարների թիվը», — հայտարարել է ոստիկանապետ Վալերի Օսիպյանը

Վարորդների արձագանքը սոցցանցերում

Վարորդների մեծ մասը բացահայտ բացասական վերաբերմունք ունի այս նորարարության հանդեպ: Նրանք կարծում են, որ տուգանքները շատ դաժան են, այդ համակարգը մի իրավիճակ կստեղծի, երբ շատերը երթևեկության կանոնների աննշան խախտումների համար վարորդական իրավունքից կզրկվեն:

Ահա, թե ինչ են նրանք գրում սոցցանցերում.

«Չեմ հասկանում. նոր կառավարությունը եկել է, որ ժողովրդի կյանքը թեթևացնի՞, թե՞ էլ ավելի բարդացնի: Թող մեր երկիրն ապրի, ինչպես Եվրոպան, հետո նոր եվրոպական օրենքներ մտցվեն»:

«Կարո՞ղ եք բացատրել, թե ինչու հենց 9-ը: Ինչո՞ւ ոչ 5, 7 կամ 20: Ինչպե՞ս եք հաշվարկ արել»:

Սակայն գտնվեցին նաև մարդիկ, որոնք կողմ են փոփոխություններին.

«Ժողովուրդը վրդովվում է, որովհետև ոչ ոք չի սիրում վարել՝ ըստ կանոնների: Սովորեք չխախտել երթևեկության կանոնները»: