Հայաստանի վարչապետը պատրաստ է որդուն փոխանակել Ադրբեջանում պահվող գերիների հետ
Հայաստանի վարչապետի պաշտոնակատար Նիկոլ Փաշինյանը հայտարարել է, որ պատրաստ է իր միակ որդուն փոխանակել բոլոր ռազմագերիների հետ, որոնք Արցախյան երկրորդ պատերազմից հետո դեռևս Ադրբեջանում են։ Հայտարարությունը հնչել է նախընտրական քարոզարշավի երկրորդ օրը։
Հայաստանում հունիսի 20-ին արտահերթ խորհրդարանական ընտրություններ են կայանալու։ Իշխանությունն ու ընդդիմությունը եզրակացության են եկել, որ միայն ընտրությունները կարող են հանգուցալուծել քաղաքական ճգնաժամը, որն առաջացել է Արցախյան պատերազմից հետո։ Հայկական կողմի պարտությունից հետո ընդդիմությունը սկսել էր պահանջել վարչապետի հրաժարականը։ Սակայն Նիկոլ Փաշինյանը հայտարարել էր, որ ընտրվել է համաժողովրդական քվեարկության արդյունքում և չի հեռանա միայն ընդդիմության կողմնակիցների պահանջով։
Վարչապետի որդին սատարել է հորն ու արդեն հայտարարել, որ պատրաստ է Ադրբեջան մեկնել՝ հայ գերիների վերադարձի պայմանով։
Ադրբեջանից հայ ռազմագերիների վերադարձն ընտրողների հետ քննարկման գլխավոր թեմաներից մեկն է դարձել նախընտրական քարոզարշավին մասնակցող բոլոր քաղաքական ուժերի համար։ Այս առնչությամբ Հայաստանի մարդու իրավունքների պաշտպան Արման Թաթոյանը հայտարարել է, որ «Ադրբեջանում ապօրինի պահվող գերիների վերադարձի հարցերի շահարկումը նախընտրական քարոզարշավի ընթացքում անթույլատրելի է», առավելևս՝ երբ խոսքը գնում է «այլ մարդկանցով գերիների փոխանակման և այդ պատրաստակամության մասին»։
Բոլոր մանրամասները, թե ինչու է Փաշինյանը նման հայտարարություն արել, ինչից է դժգոհ օմբուդսմենը, և ինչ են այս ամենի մասին գրում սոցցանցերում։
- Ադրբեջանի սահմանին ձերբակալվել է Հայաստանի ԶՈւ ևս մեկ զինծառայող, որը նույն օրը վերադարձվեց
- Գերակտիվություն և առաջին խախտում․ Հայաստանում մեկնարկել է նախընտրական քարոզարշավը
- Քամել առավելագույնը․ ինչո՞ւ են ադրբեջանցի զինվորականները ներխուժել Հայաստանի տարածք
Վարչապետի հայտարարությունն՝ ի պատասխան նախկին նախագահի հայտարարության
Գերիների հետ վարչապետի որդու փոխանակման առաջարկի պատմությունը սկսվել է նախընտրական քարոզարշավի առաջին իսկ օրը, որպես հեռակա երկխոսություն Փաշինյանի և Հայաստանի նախկին նախագահ Սերժ Սարգսյանի միջև։ Երկու քաղաքական գործիչներն էլ ընտրողների հետ հանդիպումներ են անցկացնում տարբեր բնակավայրերում։
Արմավիրի մարզի բնակիչների առջև ելույթ ունենալիս, Նիկոլ Փաշինյանը հայտարարել էր, որ «հայ ռազմագերիները, որոնք Բաքվի բանտերում են, ըստ էության, պայքարում են Հայաստանի անկախության և ինքնիշխանության համար»։ Այդ պատճառով էլ, ըստ նրա, այդ մարդիկ իրեն կներեն գերության մեջ ևս մեկ-երկու ամիս անցկացնելու համար, սակայն չեն ների, եթե իշխանությունը վտանգի երկրի անկախությունը՝ հանուն նրանց ազատության։
Նրա այս հայտարարությանն արձագանքել է նախկին նախագահ Սերժ Սարգսյանը՝ Աշտարակ քաղաքում ընտրողների հետ հանդիպմանը․
«Ինչպե՞ս կարելի է այդպես խոսել գերիների մասին, երբ նրանց հետ ինչ ասես կարող է տեղի ունենալ։ Մարդիկ ամեն օր սպասում են, որ իրենց հետ սարսափելի մի բան են անելու, որ իրենց խոշտանգելու են, բռնաբարելու կամ սպանելու։ Փաշինյանն ընդհանրապես հասկանո՞ւմ է, թե ինչ վիճակում են այդ մարդիկ։ Թող իր Աշոտիկին [Աշոտը Նիկոլ Փաշինյանի որդին է] փոխանակի Ադրբեջանում պահվող 20-25 զինվորների հետ»։
Փաշինյանը պատասխանել է Սարգսյանի այս հայտարարությանը․
«Ես համաձայն եմ։ Պաշտոնապես հայտարարում եմ Ալիևին․ առաջարկում եմ որդուս փոխանակել բոլոր գերիների հետ։ Իսկ Սերժիկին [Սերժ Սարգսյան] և Ռոբիկին [Հայաստանի նախկին նախագահ Ռոբերտ Քոչարյան]՝ որպես մարդկանց վաճառքի մասնագետների, լիազորում եմ այս հարցով բանակցություններ վարել։ Եթե դրանից մի քանի հազար դոլար աշխատեք, կարծում եմ, դա չի խանգարի ձեր կերակրատաշտին»։
Այնուհետև նրա որդին՝ Աշոտ Փաշինյանը, Ֆեյսբուքում գրել է, որ պատրաստ է Ադրբեջան մեկնել «պատանդի կամ որևէ այլ կարգավիճակով՝ հայ ռազմագերիների վերադարձի պայմանով»։
Նա նշել է նաև, որ որոշ քաղաքական ուժեր շահարկում են այս թեման, սակայն հայրենիքին ծառայելն ավելի կարևոր է, քան «սեփական ես-ը»։
Պատմությունը շարունակվել է հաջորդ օրը, Շիրակի մարզի Մեծ Մանթաշ գյուղի բնակիչների հետ Փաշինյանի հանդիպմանը։ Այստեղ նա հայտարարել է, որ հանձնարարել է պաշտոնապես Ադրբեջանին փոխանցել իր որդուն բոլոր հայ գերիների հետ փոխանակելու առաջարկը։
Փաշինյանը նշել է նաև, որ «գերիներին հայրենիք վերադարձնելու ուղղությամբ ինտենսիվ աշխատանք է տարվում», սակայն մանրամասներ չի հաղորդել՝ գործընթացին չխանգարելու համար։
Օմբուդսմենի արձագանքը
Քանի որ ռազմագերիների թեման շատ ցավոտ է հասարակության համար և անընդհատ քննարկվում է նախընտրական քարոզարշավին մասնակցող բոլոր քաղաքական գործիչների կողմից, Արման Թաթոյանը հայտարարել է, որ դրա «շահարկումն» անթույլատրելի է, առավելևս, այլ անձանց հետ գերիների փոխանակման մասին խոսակցությունները․
«Ակնհայտ է, որ նման բան տեղի ունենալ չի կարող, իսկ շահարկումները միայն ավելացնում են լարվածությունը երկրում և ավելի են բարդացնում գերիների վերադարձը. այդ կերպ ադրբեջանական իշխանությունների համար պարզապես բարձրացվում է գերիների վերադարձի «գինը»: Եվ, իհարկե, դա բացահայտ անհարգալից վերաբերմունք է գերիների ու նրանց ընտանիքների անդամների, նրանց զգացմունքների նկատմամբ»։
Մարդու իրավունքների պաշտպանը պահանջել է դադարել շահարկել այս հարցը։
Ի՞նչ են գրում սոցցանցերում
Սոցցանցերի հայկական տիրույթի օգտատերերն ակտիվորեն քննարկում են նախընտրական քարոզարշավն ու որդուն գերիների հետ փոխանակելու Նիկոլ Փաշինյանի առաջարկը։
Ահա մի քանի մեկնաբանություն․
«Պետք է կասեցնել բոլոր թեկնածուների կողմից ցանկացած մանիպուլյացիա նախընտրական քարոզարշավի ընթացքում։ Այդ թվում՝ ոչ նորմատիվ բառապաշարի, սպառնալիքների, անկարգությունների կոչերի օգտագործումը։ Հուսով եմ՝ Հայաստանի Քրեական օրենսգրքում այդպիսի հոդված կգտնվի»։
«Կրկես են սարքում սպանված նահատակների ոսկորների վրա և խաղում են հարազատների ու մտերիմների զգացմունքների հետ։ Գերիներին պահում են, որպեսզի քաղաքական դիվիդենդներ ստանան։ Բնականաբար, նրանց դիվիդենդները մեր կորուստներն են (ինքնիշխանության, հողերի)»։
«Սա բացարձակ խայտառակ իրավիճակ է։ Կարևոր չէ, թե որ քաղաքական ուժն է օգտագործում ռազմագերիների թեման։ Դա հավասար չափով զզվելի է։ Իշխանությունը հավերժ չէ, իսկ մարդու և նրա ընտանիքի դեմքին թքելու են դեռ երկար տարիներ»։
«Փաշինյան, որդուդ տալու ես գերիների դիմա՞ց։ Իսկ պատրա՞ստ ես նրան այնտեղ թողնել ընդմիշտ։ Թե՞ ընդհակառակը, դա ամեն ինչ և բոլորին հանձնելու ևս մեկ հզոր խթան է լինելու։ Բանաձևը պարզ է։ Վերադարձնում եմ գերիներին։ Տալիս եմ տղայիս։ Հաղթում եմ ընտրություններում։ Տալիս եմ հողերը։ Վերադարձնում եմ որդուս։
Սա է տրամաբանությունը, սակայն իրականում սա պարզապես հերթական խեղաթյուրված դատարկաբանությունն է, որը հաշվարկված է մանկամիտների համար»։
