Հայաստանի նախկին նախագահի եղբորորդին դատապարտվել է 5,5 տարվա ազատազրկման

Երևանի դատարանը Հայաստանի նախկին նախագահ Սերժ Սարգսյանի եղբորորդի Նարեկ Սարգսյանին դատապարտել է 5,5 տարվա ազատազրկման։ Նա մեղադրվում է զենքի ապօրինի պահպանման, թմրանյութերի ապօրինի շրջանառության և մարդու առևանգման կազմակերպման համար։ Դատավճիռը կարդալիս դատավորը պարզաբանել է, որ Սարգսյանն արդեն կալանքի տակ որոշ ժամանակ է անցկացրել, և նրա ազատազրկման ժամկետը կավարտվի 3.5 տարուց։

Մեղադրյալը դատավճռի հրապարակումից հետո ձեռքով է արել լրագրողներին և հեռացել դատարանի դահլիճից։

Նարեկ Սարգսյանն ընտանիքում և  Հայաստանի նախկին նախագահի շրջապատից միակը չէ, որը 2018 թ-ի «թավշյա» հեղափոխությունից հետո իրավապահ մարմինների ուշադրության կենտրոնում է հայտնվել։ Մասնավորապես, քրեական գործեր են հարուցվել Սերժ Սարգսյանի եղբայրների, եղբորոդիների և փեսայի դեմ։

Ավելին՝ նախկին նախագահը (2008-2018 թթ․) ինքն էլ է մեղադրվել այսպես կոչված «դիզելի գործով»։ Ենթադրվում է, որ նա բյուջետային միջոցներից ավելի քան 1 մլն դոլար է վատնել։

Բոլոր մանրամասներն այն մասին, թե ինչի համար են մեղադրվում Նարեկ Սարգսյանն ու նրա հարազատները։

• Հայաստանի նախկին նախագահ Սերժ Սարգսյանի մերձավոր շրջապատն՝ իրավապահ մարմինների ուշադրության կենտրոնում

• Ինչի՞ համար են նստեցրել Հայաստանի նախկին նախագահ Ռոբերտ Քոչարյանին

Նարեկ Սարգսյանի գործը

Նախկին նախագահի եղբորորդու դեմ քրեական գործը հարուցվել է 2018 թ-ին, նրա նկատմամբ հետախուզում էր հայտարարվել։

Անցյալ տարվա դեկտեմբերի վեցին Նարեկ Սարգսյանը հայտնաբերվել էր Պրահայում՝ Գվատեմալայի քաղաքացի Ֆրանկլին Գոնսալեսի կեղծ անձնագրով։

Նա իր մեղքն ընդունել է մեղադրանքի բոլոր հոդվածներով և, ըստ ամենայնի, մտադիր չէ բողոքարկել դատարանի վճիռը։

Ինչի՞ համար են մեղադրվում նախկին նախագահն ու նրա հարազատները

Նախկին նախագահ Սերժ Սարգսյանը մեղադրվում է այսպես կոչված «դիզելի գործով»։

Հայաստանի նախկին նախագահի գործով նախաքննությունն ավարտվել է 2020 թ-ի հունվարին։ Քննչական մարմինը հավաքված ապացույցները բավարար է համարել՝ մեղադրանք առաջադրելու և գործը դատարան ուղարկելու համար։

Պետության նախկին ղեկավարն իր մեղքը չի ճանաչում և  այդ գործը քաղաքական հետապնդում է համարում։

Սերժ Սարգսյանից զատ՝ իրավապահ մարմինների ուշադրության կենտրոնում են հայտնվել նաև նրա հարազատները։

Քրեական գործ է հարուցվել նաև Սերժ Սարգսյանի ավագ եղբոր՝ Լևոն Սարգսյանի դեմ։ Նա մեղադրվում է առանձնապես խոշոր չափերի հափշտակության համար։

Նախկին նախագահի մյուս եղբորորդի Հայկ Սարգսյանը 2018 թ-ին կասկածվում էր մարդասպանության փորձի համար։

Քրեական գործ է հարուցվել նաև Սերժ Սարգսյանի մյուս եղբոր՝ Ալեքսանդր Սարգսյանի դեմ։ Նա մեղադրվում է առանձնապես խոշոր չափի խարդախության համար։

Սերժ Սարգսյանի փեսա Միքայել Մինասյանը մեղադրվում է ապօրինի հարստացման, իր եկամուտների մասին կեղծ տեղեկությունների հայտարարագրման և ապօրինի ճանապարհով ստացած սեփականության օրինականացման համար։ Հայաստանի դատարանը բազմիցս որոշում է կայացրել նրան կալանավորելու մասին, իսկ դատավճռի բողոքարկումից հետո չեղարկել է մեղադրանքը։ Մինասյանը Հայաստանում չէ, նրա գտնվելու վայրն անհայտ է։

Միքայել Մինասյանի հորը՝ նախկին նախագահի խնամուն, նույնպես մեղադրանք է առաջադրվել առանձնապես խոշոր չափի հափշտակության, լիազորությունների չարաշահման և փաստաթղթերի կեղծման համար։ Արա Մինասյանը երկար տարիներ գլխավորում էր «Սուրբ Գրիգոր Լուսավորիչ» բուժկենտրոնը։ Հեղափոխությունից հետո նա պաշտոնանկ էր արվել։