Հայաստանը հայտարարվել է համաճարակների կանխարգելման «կանաչ գոտի»

Հայաստանը համաճարակների կանխարգելման բարձր ցուցանիշ ունի՝ 90 միավոր։ Դրա շնորհիվ երկիրը ներառվել է «կանաչ» (անվտանգ) գոտում։ Սա միջազգային մասնագետների կարծիքն է, որը հրապարակվել է preventepidemics.org կայքում։ Այն որոշում է աշխարհի երկրների համաճարակներին հակազդելու պատրաստվածության ցուցիչը «Համատեղ արտաքին գնահատականի» (JEE) սանդղակով։ Այս սանդղակը հաստատված է Առողջապահության համաշխարհային կազմակերպության կողմից։

Հայաստանում դեռևս հայտնաբերվել է կորոնավիրուսով վարակվելու մեկ դեպք։ Վարակվածը մարտի մեկին ժամանել է Իրանից։ Հայաստանի սահմանն այդ երկրի հետ փակ է փետրվարի 23–ից։ Հայաստանի 29-ամյա քաղաքացին ժամանել էր այն հատուկ չվերթներից մեկով, որոնք Հայաստանի և Իրանի քաղաքացիներին թույլ են տալիս հայրենիք վերադառնալ։ Նրա հետ շփման մեջ եղած բոլոր անձինք մեկուսացված են, նրանք, ինչպես նաև վարակվածն, իրենց լավ են զգում։ Վերջինս բուժում չի ստանում, քանի որ նա հիվանդության ախտանշաններ և ջերմություն չունի։

• Զբոսաշրջիկներ չկան, հյուրանոցները սնանկացման եզրին են․ Կորոնավիրուսը հարվածել է Վրաստանի զբոսաշրջության ոլորտին

• Բաց սահման՝ Վրաստանի հետ և վիզային ռեժիմ՝ Իրանի հետ․ Հայաստանում կորոնավիրուսի հայտնաբերումից հետո

• Տեսանյութ․ ինչպե՞ս խուսափել կորոնավիրուսից, և ո՞րն է դրա սպառնալիքը

Տվյալներ Հայաստանի վերաբերյալ

Preventepidemics.org կայքում արված հրապարակման մեջ ասվում է․

«Հայաստանում կան գործառնող համակարգեր՝ առողջության համար սպառնալիքները հայտնաբերելու, կասեցնելու և կանխելու համար, սակայն նրանք պետք է աշխատեն պահպանել պաշտպանության այս մակարդակն իրենց ժողովրդի համար»։

Հայաստանն այն երկրների թվին է պատկանում, որոնք պաշտպանության անվտանգ մակարդակ ունեն, այդ պատճառով էլ կայքի ինտերակտիվ քարտեզի վրա կանաչ գույնով են ներկված։

Այստեղ ասվում է նաև, որ համաճարակների կանխարգելման հարցում Հայաստանի ուժեղ կողմերն են համակարգումը, կապը, քարոզչությունն ու անվտանգ սնունդը։

 Կորոնավիրուսի դեմ պայքարը բանակ է հասել

Այդ ընթացքում երկրում շարունակում են միջոցներ ձեռնարկվել վարակի տարածման դեմ, մասնավորապես, Զինված ուժերում։ Այժմ հարազատներից որևէ մեկին բուժում ստացող զինվորականների մոտ թողնելիս, բժշկական հաստատություններում չափում են նրանց ջերմությունը և տրամադրում են պաշտպանիչ դիմակներ։

Ռազմական հոսպիտալներում այժմ սահմանափակվել է նաև պլանային բուժօգնության տրամադրումը։

Արդյո՞ք դասերը վերսկսվելու են ուսումնական հաստատություններում

Հայաստանի դպրոցներում և բուհերում դասերն, ըստ ամենայնի, կվերսկսվեն մարտի 9–ից։ Այս մասին մարտի հինգին հաղորդել է կրթության, գիտության, մշակույթի և սպորտի նախարար Արայիկ Հարությունյանը․

«Հատուկ ցուցումներ չունենք դասերը չշարունակելու հետ կապված, եթե այսպես շարունակվի, երկուշաբթի օրվանից դասերն արդեն կսկսվեն»։

Մեկշաբաթյա կարանտինն ուսումնական հաստատություններում սկսվել է մարտի երկուսից։ Որոշումը, արդյոք արժե երկարաձգել այն, ընդունելու է առողջապահության նախարար Արսեն Թորոսյանը։

Նրա խոսքով՝ Չինաստանում սանիտարական և բժշկական միջոցները բավականին կազմակերպված են իրականացվել, հիվանդության նոր դեպքեր ավելի հազվադեպ են գրանցվում։

Լարված իրավիճակը պահպանվում է Հարավային Կորեայում, Իրանում և Իտալիայում։ Ըստ նախարարի՝ Վրաստանում և Ռուսաստանում իրավիճակը համեմատաբար հանգիստ է։

«Ես մշտապես կապի մեջ եմ այդ երկրների մեր գործընկերների հետ, և կարծում եմ, որ հիվանդության տարածման գագաթնակետին հասնելուց հետո կրճատում կտեսնենք։ Այդ դեպքում մենք կարող ենք վերանայել մարդկանց տեղաշարժի հարկադիր սահմանափակումները»։