Մարդիկ կարող են ազատ տեղաշարժվել, բիզնեսի մեծ մասը՝ վերսկսել աշխատանքը․ մայիսի 4-ից Հայաստանում հանվում են սահամանափակումները

Ազատ տեղաշարժի սահմանափակումները Հայաստանում հանվում են մայիսի 4-ից։

Այս մասին հաղորդել է էկոնոմիկայի փոխնախարար Վարոս Սիմոնյանը։ Նա ներկայացրել է փոփոխությունների ողջ փաթեթը, որն ուժի մեջ կմտնի երկուշաբթի օրվանից։

Հանվում են գրեթե բոլոր սահմանափակումները՝ այդ թվում, տնտեսական գործունեության։

Բացառություն կկազմեն որոշ ոլորտներ: 

Այսպիսով, չեղարկվում են մանրածախ և մեծածախ առևտրի սահմանափակումները, չեն գործի միայն մոլերը և հանրախանութները: 

Վերանում են մշակող արդյունաբերության աշխատանքի սահմանափակումները, կգործեն բոլոր տեքստիլ, կահույք, կոշիկ արտադրող ընկերությունները:

Կաշխատեն նաև բացօթյա սրճարաններն ու ռեստորաններն. չի թույլատրվի միայն հաճախորդների սպասարկումը դրանց փակ տարածքներում։

Կբացվեն բուսաբանական և կենդանաբանական այգիները, բնության հատուկ պահպանվող տարածքները, արգելոցները:

Մարզասրահների գործունեությունը կթույլատրվի բացառապես պրոֆեսիոնալ մարզիկների համար, կանցկացվեն սպորտային միջոցառումները, կթույլատրվի սպորտային ակումբների գործունեությունը: 

Ինչպես արդեն հայտարարվել էր արտակարգ դրության պարետի կողմից, վարսավիրանոցների և գեղեցկության սրահների գործունեությունը նույնպես կթույլատրվի։ Կգործեն լվացման, մաքրման և չոր մաքրման ծառայությունները:

Սակայն դեռ չի գործի հանրային տրանսպորտը: 

Էկոնոմիկայի փոխնախարարը հայտարարել է, որ այս արգելքը մնում է, «քանի որ կան որոշակի ռիսկային մոտեցումներ՝ համավարակի տարածման հետ կապված»։

Փաստորեն, մարդիկ պետք է կարողանան հասնել աշխատանքի առանց տրանսպորտի։