Կորոնավիրուս․ ինչպիսի՞ պատկեր է աշխարհում մարտի 3–ին։ Հիմնական փաստեր և թվեր

Հիմնական աղբյուրներ՝ Բի–Բի–Սի և Առողջապահության համաշխարհային կազմակերպություն 

• «Աշխարհն այս պահին ոտք է դրել անհայտ տարածք, սակայն կորոնավիրուսը կարելի է կանգնեցնել, եթե բոլորն ընդունեն արագ, ճիշտ և գլխավորը՝ կանխարգելիչ միջոցներ», — հայտարարել է Առողջապահության համաշխարհային կազմակերպության ղեկավար Թեդրոս Ադհանոմ Գեբրեյեսուսը։

• «Խարանն ու խուճապը, որոնք տարածվել են աշխարհի որոշ երկրներում, հիվանդությունից ավելի վտանգավոր են», – նշել է նա։

• Աշխարհում կորոնավիրուսից մահացածների թիվը մարտի 3–ի դրությամբ 3, 125 մարդ է։ Զոհերի ավելի քան 90 տոկոսը Չինաստանում է գրանցվել։

• Սակայն մեկ օրում՝ մարտի 2–ին, Չինաստանի սահմաններից դուրս կորոնավիրուսով նոր վարակվածների ինն անգամ ավելի մեծ թիվ է գրանցվել, քան երկրի ներսում։

• Ընդհանուր առմամբ, հիվանդության 90,930 դեպք է հաստատվել ողջ աշխարհում մարտի 2–ի առավոտի դրությամբ։ Վարակը տարածվել է աշխարհի 76 երկրներում և տարածքներում։

• Ողջ աշխարհում ապաքինվել է 48,142 մարդ։

• Կորոնավիրուսի տարածման համաշխարհային վիճակագրությանը կարելի է հետևել այստեղ։

• Մարտի 2–ի վիճակագրությունն ու փաստերն՝ այստեղ։

•Ինչպե՞ս չվարակվել կորոնավիրուսով և ո՞րն է սպառնալիքը։ Հարցերի պատասախաններ երկու րոպեանոց տեսանյութում 

•Կորոնավիրուսն աշխարհում և Կովկասում։ Իրադարձությունների ժամանակացույց 

• Չինաստանում մեկ օրում մահվան 42 նոր դեպք է գրանցվել, բոլորը՝ Հուբեյի շրջանում, որտեղից սկսվել է համաճարակը։ Հենց այնտեղ է գրանցվում մահվան բոլոր դեպքերի ավելի քան 90 տոկոսը։ Մեկ օրում Չինաստանում գրանցվել է վարակվելու 206 նոր դեպք, սա ամենացածր վիճակագրությունն է երկրում հունվարի 22–ից ի վեր։ Մասնագետներն ասում են, որ դա վարակի տարածման կանխարգելման ակտիվ աշխատանքի արդյունք է։

• Չինաստանից հետո նախկինի պես առաջատարն են Հարավային Կորեան, Իտալիան և Իրանը։ Մտահոգություն է առաջացնում Ճապոնիայում հիվանդանալու վիճակագրության աճը։

• Եթե Չինաստանում նվազում է կորոնավիրուսով վարակվածների մակարդակն, ապա Չինաստանի սահմաններից դուրս վիճակագրությունն, ընդհակառակը, կտրուկ աճում է։ Գրաֆիկում Առողջապահության համաշխարհային կազմակերպության տվյալներն են փետրվարի 22–ից մարտի 2–ն ընկած ժամանակահատվածում։

• Իտալիայում շարունակվում է վարակման դեպքերի աճն՝ արդեն 2,036։ Մարտի 2–ին մահացածների թիվը 34–ից հասել է 52–ի։

• Իրանը լուրջ մտահոգություններ է առաջացնում միջազգային հանրության շրջանում, քանի որ իշխանոււթյունները կարող են թաքցնել իրական վիճակագրությունը, և այն կարող է ավելի բարձր լինել, քան հաղորդվում է։ Մեկ օրում այն հայտարարել է մահվան ևս 12 դեպքերի մասին, այժմ մահացածների ընդհանուր թիվը պաշտոնապես 66 է։ Մահացել է, այդ թվում, Իրանի գերագույն առաջնորդ Ալի Խամենեիի բարձրաստիճան խորհրդական Մոհամադ Միրմոհամադին։ Վարակվել է և հիվանդանոցում է գտնվում մի քանի բարձրաստիճան պաշտոնյա։

• Սակայն Իրանի նախագահ Հասան Ռոհանին հայտարարել է, որ քաղաքներ մեկուսացնելու պլաններ չկան։ Փակ չէ անգամ կրոնական կենտրոն համարվող Ղոմ քաղաքը, որտեղ գրանցվել են կորոնավիրուսով վարակվելու ամենաշատ դեպքերը։ Ավելին, այնտեղ շարունակում են ակտիվորեն աշխատել կրոնական կենտրոնները, որտեղ հարյուրավոր մարդիկ են հավաքվում։

• Ադրբեջանում հաստատված երեք դեպք կա, բոլոր երեք հիվանդներն էլ Իրանից են երկիր վերադարձել։ Ադրբեջանը փակել է Իրանի հետ սահմանը, ողջ երկրում փակվում են դպրոցներն ու մանկապարտեզները։ Ավելի քան 200 մարդ կարանտինի մեջ է, մարդիկ հաղորդում են աղաղակող հակասանիտարական պայմանների և մեկուսարաններում տարրական պայմանների բացակայության մասին, որտեղ անգամ օճառի և հակասեպտիկի հետ կապված խնդիրներ կան։

• Հայաստանում հաստատված մեկ դեպք կա։ Վարակվածն Իրանից է ժամանել։ Հայաստանն Իրանի հետ վիզային ռեժիմ է մտցրել, փակ են դպրոցներն ու մանկապարտեզները։ 

• Վրաստանում հաստատված երեք դեպք կա։ Երկու տղամարդ Իրանից է եկել, մի կին Իտալիայից է վերադարձել։ 40 մարդ կարանտինում է։ Վրաստանը փակել է Իրանի հետ սահմանը, փակ են դպրոցներն ու մանկապարտեզները։ 

• Հարավային Կորեայում վարակվել է արդեն 4,812 մարդ։ Վերջին մեկ օրում մահացել է ևս երկու մարդ, զոհերի ընդհանուր թիվը 28 է։ Նրանց կեսից ավելին քրիստոնեական աղանդի անդամ է, որն, ըստ մասնագետների, վարակի տարածման օջախ է դարձել, քանի որ հրաժարվել է ժամանակին հաղորդել դրա հայտնաբերման մասին։ Աղանդի առաջնորդների դեմ քրեական գործեր են հարուցվել։ Հարավային Կորեայում փակ են բոլոր կրոնների բոլոր տաճարները։

• ԱՄՆ–ում մեկ օրում մահացել է ևս չորս մարդ, զոհերի ընդհանուր թիվը հասել է վեցի։ Հիվանդները 103–ն են։

• Հիվանդությունների վերահսկման եվրոպական կենտրոնը բարձրացրել է Եվրամիությունում ռիսկի մակարդակը «չափավորից» մինչև «բարձր»։

• Ֆրանսիայում վարակման հաստատված դեպքերի թիվը մեկ օրում աճել է 61–ով։ Հիվանդների ընդհանուր թիվը 191 է։ Այս պահի դրությամբ երեք հոգի է մահացել։

• Հրապարակվել է Առողջապահության համաշխարհային կազմակերպության նոր վերլուծական հաշվետվությունը։ Այն հետազոտել է կորոնավիրուսով վարակվելու ավելի քան 44 հազար դեպք և դրա հետևանքով մահացածների դեպքերը Չինաստանում։ Հիմնական եզրակացությունը․ վարակն ախտահարում է հիմնականում 60–ից բարձր տարիքի, ինչպես նաև թույլ և հիվանդ մարդկանց։