Լեռնային Ղարաբաղի պաշտպանության նախկին նախարար Սամվել Բաբայանն ազատ է արձակվել

Լեռնային Ղարաբաղի պաշտպանության նախկին նախարար, Ղարաբաղի Պաշտպանության բանակի նախկին հրամանատար Սամվել Բաբայանն այսօր  ազատ է արձակվել դատարանի դահլիճից: Վճռաբեկ դատարանը փոխել է Բաբայանի խափանման միջոցը Հայաստանի Ազգային ժողովի 11 պատգամավորների անձնական երաշխավորության հիման վրա: Նրանցից յուրաքանչյուրը պարտավոր է դատարանի դեպոզիտային հաշվեհամարին 500 հազար դրամ (մոտ $1000) փոխանցել:

Սամվել Բաբայանը ձերբակալվել է 2017թ-ի մարտի 22-ին Հայաստան մաքսանենգ ճանապարհով «Իգլա» զենիթահրթիռային համալիրի ներկրմանը մասնակցելու կասկածանքով: Նա մեղադրվում էր 235-րդ հոդվածի (զենքի, զինամթերքի, պայթուցիկ նյութերի կամ պայթուցիկ սարքերի ապօրինի ձեռքբերում, վաճառք, պահպանում, տեղափոխում կամ կրում, որը կատարել են մի խումբ անձինք՝ ըստ նախնական պայմանավորվածության) խախտման համար: Դատարանը նրան 6 տարվա ազատազրկման էր դատապարտել:

Բաբայանի կողմնակիցները հայտարարել են, որ դա քաղաքական հետապնդում է Հայաստանում քաղաքական գործընթացներին մասնակցելու կապակցությամբ: 2017թ-ի ապրիլի 2-ին անցկացված խորհրդարանական ընտրություններից առաջ Բաբայանը հանրային կերպով հայտարարել էր հայ երեք նախարարների հիմնած «Օհանյան-Րաֆֆի-Օսկանյան» դաշինքին աջակցելու մասին և ձերբակալվել քվեարկությունից երկու օր առաջ:

Բաբայանն այդպես էլ չի ճանաչել իր մեղքը: Այսօր նա հայտարարել է, որ իր գործը քաղաքական բնույթ էր կրում: Սակայն այս ողջ ընթացքում դատարանում նա չի օգտագործել «քաղբանտարկյալ» տերմինը, որպեսզի խուսափի ինչ-որ քաղաքական գործիչների կողմից շահարկումներից:

«ԱԱԾ շենքում ինձ ձերբակալելուց հետո ասացին, որ մենք արդեն անցել ենք 5% շեմը [դա թույլ կտար դաշինքին խորհրդարան անցնել — JAMnews]: Արդեն պառլամենտում չէին կարող (խոսքը ՀՀԿ մասին է, որը մեծամասնություն ստացավ խորհրդարանում և դարձավ իշխող կուսակցություն — JAMnews) ունենալ այդ մեծամասնությունը, որ ունեին: Իմ այն հարցին՝ ինչո՞ւ ես, օրինակ, ցուցակում չկամ, լիդեր չեմ, չեմ երևում, պարզ բացատրել են՝  պարոն Բաբայան Դուք եք կազմակերպում, շտաբը Դուք եք ղեկավարում, Դուք եք մեզ պետք, Դուք եք խանգարողը, մնացածը չեն խանգարում: Ինձ սա ասել է անվտանգության ծառայության պետի առաջին տեղակալը, ով զբաղվել է օպերացիայիով»:

Բաբայանը նշել է նաև, որ իրեն հստակ մեկն է հանձնարարել ձերբակալել, սակայն հրաժարվել է նրա անունը տալ.

«Հայաստանում մի մարդ է պատվեր տալիս, 7 հոգի չկան»:

Հրապարակման մեջ տեղ գտած եզրերը, տեղանունները և գաղափարները կարող են չհամընկնել JAMnews-ի կամ նրա առանձին աշխատակիցների կարծիքների և գաղափարների հետ: JAMnews-ն իրեն իրավունք է վերապահում հեռացնել հրապարակման այն մեկնաբանությունները, որոնք կգնահատվեն որպես վիրավորական, կպարունակեն բռնության կամ սպառնալիքի կոչեր, կամ այլ պատճառներով էթիկապես անընդունելի կլինեն: