Իրանը խոստովանել է իր մեղքն ուկրաինական ինքնաթիռի խոցման համար
Իրանը խոստովանել է, որ իր զինվորականներն են սխալմամբ խոցել Ուկրաինայի միջազգային ավիաուղիների Բոինգը, որն ուղևորվում էր Կիև, և որում 176 մարդ էր գտնվում, հաղորդում է Բի-Բի-Սին։ Աղետի հեևանքով ոչ ոք կենդանի չի մնացել։
Ինքնաթիռը խոցվել է հունվարի ութին Թեհրանի միջազգային օդանավակայանից օդ բարձրանալուց մի քանի րոպե անց։ Դա տեղի է ունեցել այն բանից մի քանի ժամ անց, երբ Իրանը հրթիռակոծել էր Իրաքի տարածքում գտնվող երկու ամերիկյան ռազմաբազաներն ու պատասխան գործողությունների էր սպասում։
Իրանի նախագահ Ռոհանիի հայտարարությունում կատարվածը «հրեշավոր սխալ» է անվանվել․
«Բոինգը «ոչ միտումնավոր» կերպով խոցվել է այն բանից հետո, երբ մոտեցել է Իրանի Իսլամական հեղափոխության պահապանների կորպուսի գաղտնի օբյեկտին, և զինվորականներն այն ընկալել են որպես հակառակորդի թռչող սարք»։
Իրանի նախագահը խոստացել է, որ բոլոր մեղավորները պատասխանատվության են ենթարկվելու։
Ավելի վաղ Իրանը հերքում էր իր մասնակցությունը միջադեպին՝ պնդելով, որ աղետի պատճառը կարող է տեխնիկական անսարքությունը լինել։
• Ղասեմ Սոլեյմանի։ Ո՞վ էր նա։ Եվ ի՞նչ հետևանքներ կարող է ունենալ նրա մահը
